حاول تستمتع بحياتك : )

السلام عليكم و رحمة الله و بركاته

بما إن السمة الجديدة شبه جاهزة، فبقالي فترة متحمس و عاوز انقل للمدونة بعض الحاجات اللي كتبتها قبل كدا، او بعض الأشياء اللي بعملها او بقراها.
 

ساعات الواحد بيفضل يقول "بكرة هيكون أحسن"، و يفضل مستنى بكرة، بعد كدا يكتشف إن بكرة مش أحسن أوي من دلوقتي، أو حتى مش أحسن خالص! و يفضل حابس نفسه في دايرة مغلقة، و يجي عليه وقت يكون قضى جزء كبير من عمره و هو لسه مستني بكره عشان يمكن يكون أفضل! الأفضل إن الواحد يستمتع بحياته زي ما هي، و يستمتع بكل فترة فيها، أيوه شيء غبي إنك تبقى عارف بوجود مشكلة  و كمان عارف حلها، بس عارف إنها مش هتتحل غير بانتهاء فترة معينة! فالأفضل إنك تتعامل مع الوضع الحالي بكل ما فيه. إستمتع وقت الفرح، و حاول متزلعش وقت الحزن، لإن كل شيء و ليه نهاية : )


مع إني مش بحب كلمة "خاطرة" بس مش لاقي ليها اسم تاني بصراحة! عموما اهه الخاطرة اللي جت في دماغي من حوالي تلات اسابيع، و كتبت عنها بدون تحضير، حبيت افكر نفسي بيها و أفكر اللي حواليا كمان : )

-------

حاول تستمتع بحياتك و بكل فترة فيها مهما كانت المشاكل اللي فيها، مفيش حياة وردية على طول و مفيش حياة سودة على طول، كل الناس عندهم مشاكل بس في بيقدر يستمتع، وجود مشاكل مش معناه انك متستمتعش بحياتك، استمتاعك بحياتك مش معناه ان مفيش مشاكل، الموضوع بسيط بس المهم انك تفهم الموضوع ده فالوقت المناسب مش بعد ما يضيع جزء كبير من عمرك.

حاول تستمتع بكل فترة و مرحلة في حياتك و متفضلش مستني المرحلة اللي بعديها و تقول اكيد المرحلة اللي جاية هتكون افضل، و لما تيجي المرحلة دي تلاقي نفسك برده حاطط أمل على المرحلة اللي بعديها، و تيجي بعد فترة تلاقي نفسك قضيت اغلب عمرك و لسه مش مستمتع و مش حاسس انك سعيد،،، و افتكر ان السعادة طريق بيتمشي فيه مش هدف بتوصله.

كل الناس عندها مشاكل في حياتها، حاول تحل مشاكلك بذكاء، الشيء القوي الصلب لو اتعرض لضغط قوي هيتكسر، و الشيء الطري و ملهوش هيكل لو اتعرض لضغط هيتشكل بحسب الضغط ده و هيفضل على طول كدا، حاول يبقى عندك نوع من المرونة مع المشاكل، متكنش صلب اوي فتتكسر و مكنش طري اوي فتتغير تماما، ببساطة خليك مرن!

مش كل المشاكل لازم تتحل! في مشاكل خاصة بمرحلة معينة في حياتك و بمجرد انتقالك للمرحلة اللي بعدها المشكلة هتروح لوحدها، في مشاكل بتكون محتاجة وقت مش اكتر، حل المشكلة بسرعة ممكن يكون تأثيره أسوأ من المشكلة نفسها، كل مشكلة ليها حل، بس لازم تدور على الحل المظبوط، الحل ممكن يكون ببساطة انه تسيبها من غير حل، لانها هتتحل لوحدها، سواء عشان نوع المشكلة كدا او انها مشكلة مؤقته مرتبطة بفترة معينة مش اكتر.



اللي عاوز قوله باختصار، مفيش حد معندهوش مشاكل، حاول تستمتع بكل فترة من حياتك و اياك تفضل منتظر المرحلة الجاية و تقول اكيد هتبقى احسن و هكون سعيد فيها، و إذا ملقتش اللي يسعدك حاول تسعد نفسك.


بس كدا.