التحضير للمذاكرة .

السلام عليكم و رحمة الله و بركاته

اخيرا جدول الامتحانات نزل بتأخير كبير عن ميعاد نزوله في كل سنة ، و بداية الامتحانات هتكون ان شاء الله يوم 16\1\2010 ! (في الحقيقية ناس كتير كانت متوقعة التاريخ ده عشان احنا بنبدأ مع كلية التجارة ، و امتحانات تجارة هتبدأ يوم 15 تقريبا)
طبعا انا بدأت المذاكرة من فترة لكن دي تدوينة في السريع كدا : )


كل فترة قبل الامتحانات لازم يكون في تحضيرات لتكثيف المذاكرة
من اهم التحضيرات الاساسية للامتحانات تلات حاجات :

١. الكمبيوتر يتشال عشان اقدر اذاكر و اركز بشكل افضل .
٢. احلق شعري ! ده برده متعلق بالتركيز .
٣. اعمل جولة تسوق عند العطار ههههههه .


الكمبيوتر لازم يتشال عشان احظى بشوية صفاء ذهني و تركيز اكبر في المذاكرة ، الكمبيوتر كدا متشال بقاله اسبوعين و شوية ، لكن التدوينة دي من على جهازي في البيت لاني بظبط شوية حاجات في النت ، التلفون كان مقطوع اكتر من تلات اسابيع و بالرغم من التبيلغ عن المشكلة اكتر من مرة ، السنترال مبعتش فني غير لما كتبت شكوى لمدير السنترال !! (مع ان العطل كان عبيط جدا و مش محتاج كل التأخير ده ، مجرد الفني يجي يظبط الخط من الكابينة الرئيسية مش اكتر !)

لازم احلق شعري عشان اعرف اذاكر ، مش عارف ليه لازم احلق لكن بحس براحة نفسية ، يبقى ليه ﻷ
و بما اني في الفترة دي بستهلك كمية كبيرة من المشروبات و لاني مش من مدمني الشاي و عشان مخلصش التوابل اللي في البيت كلها فلازم اعدي على العطاراشتري حاجات زي قرفة ، قرنفل ، ينسون ، شمر ، كركديه ، نعناع ، الخ الخ الخ

بحاول استغل الفترة دي في عمل حاجات تانية لاني بالتأكيد مش هقعد اذاكر ٢٤ ساعة في اليوم ! - ده فضلا عن اني لو قعد اذاكر بس هتخنق من المذاكرة ! -

بحاول احفظ قرآن ، او في الحقيقة براجع على الحاجات اللي كنت حافظها ، للاسف بقالي فترة كبيرة جدا مش بحاول احفظ حاجة !

و من ناحية تانية ، بحاول اعمل بنصيحة الاستاذ طه الوكيل مدرس الخط اللي قدم دورة تنمية مهارات الخط العربي في جامعة القاهرة ، و نصيحة الاستاذ طه هي عمل تدريب على الخط لمدة خمس دقايق يوم بعد يوم (تلات مرات في الاسبوع يعني) ، و فعلا نصيحة ممتازة جدا جزاه الله خير عنها ، لان خير الاعمال ادومها و ان قل ، مجرد خمس او عشر دقايق كل يومين اكتب تدريب خط ، هتلاقي نفسك مع الوقت بتتقن الخط و بتكون اسرع في الكتابة : )

بجد الدورة دي استفدت منها كتير جدا و عرفتني على مجال الخط العربي الرائع ، انا الحمد لله خطي كويس لكن لما عرفت قواعد كتابة الحروف خطي انتقل لمستوى تاني خالص ، و كمان عرفت بعض الاخطاء زي خطأ شائع جدا (و انا شخصيا كان مضحوك عليا لمدة ١٥ سنة ) كانوا ديما في المدرسة بيقولولنا ان الكاف اللي في الاخر عليها همزة ! الواقع ان اللى على الكاف المفردة او في نهاية الكلمة => "ك" ده مش همزة ! شارة الكاف دي مش همزة فعلا ! افتح اي مصحف و قارن بين شارة الكاف و الهمزة ، دي شيء و دي شيء تاني خالص !
و برده حاجة كمان ، في التنوين بالفتح ، الفتحتين مش بتكون على حرف الالف الزائد انما بتكون على الحرف الاخير الحقيقي زيه زي التنوين بالضم و التنوين بالكسر ! برده افتح المصحف و شوف

و من يومين عديت على مدرسة تحسين الخطوط العربية بالجيزة و مقرها مدرسة السعيدية الثانوية اخدت من هناك شوية معلومات و بيانات عن المدرسة و الدارسة فيها و المعارض اللي بتتعمل كل آخر سنة دراسية و الاساتذة هناك ناس محترمة جدا ما شاء الله ، و ربنا يسهل بعد الامتحانات كدا هيكون جاهز تقرير مدعم بالصور و الفيديوهات عن مدرسة تحسين الخطوط لاني اعتقد ان خسارة جدا مدرسة عريقة زي دي مش واخدها حقها بالمستوى الكافي اعلاميا و خصوصا على الانترنت !


--------

يا رب سنة رابعة تخلص على خير ، و ربنا ييسر للجميع في الامتحانات ، دعواتكم : )

المزيد »

حملة خطايا وندوز 7 .

السلام عليكم و رحمة الله و بركاته



من فترة قريبة تم ترجمة موقع خطايا وندوز سبعة للعربية ، او زي ما بحب اسمي الحملة خطايا وندوز سبعة السبعة
الحملة برعاية مؤسسة البرمجيات الحرة (Free Software Foundation)
ـ
Windows7Sins.org

الخطايا السبعة زي ما في موقع الحملة :

١. تسميم التعليم .
٢. خرق الخصوصية .
٣. التصرف باحتكارية .
٤. الحبس .
٥. استغلال المعايير .
٦. فرض إدارة القيود الرقمية (DRM) .
٧. تهديد أمن المستخدم .

لو عاوز تعرف اكتر عن كل نقطة ادخل موقع الحملة هتلاقي تفصيل عن كل نقطة ، و في الموقع من فوق هتلاقي حاجة زي تلميحات كدا ، اضغط عليها و هتلاقي معلومات مفيدة عن كل مشكلة .


اضغط على الصورة للتكبير

Windows7Sins.org

و ممكن تضيف شعار الحملة لمدونتك زي كدا



أضف ودجة خطايا ويندوز 7 إلى موقعك!

-------

كنت كتبت موضوع عن خطايا وندوز سبعة و علقت عليه و اشرت لبعض النقاط و الامثلة الواقعية لتسميم التعليم و استغلال المعايير و ادارة القيود الرقمية DRM

حملة خطايا ويندوز 7 - منتدى طلاب جامعة القاهرة .
حملة خطايا ويندوز 7 - منتدى طلاب جامعة عين شمس .


و للمرة الـ ١٢٠ ! للناس اللي حافظة مش فاهمة و محبي الفزلكة ، دي في الاساس حملة اخلاقية بتنتقد افعال معينة و مش غرضها الاساسي الكلام عن اي حاجة تقنية !! و غرضها توعية المستخدمين بأضرار البرمجيات المقيدة و الاحتكارية و على رأسها شركة ميكروسوفت و برامجها .

زيها زي المنظمات و الجمعيات البيئية ، لما يكون في جمعية نشاطها هو الحفاظ على البيئة و توعية الناس بمخاطر التلوث و اللي بيكون سببه المصانع و الشركات الكبيرة ، و لما جمعيات البيئة بتنتقد المصانع دي مش بتنتقدها في حد ذاتها انما بتنتقد التلوث اللي بتعمله و بيأثر على البيئة ، و مش منطقي نقول اصل الشركات دي بتشغل ناس كتير و الناس دي فاتحين بيوت و الكلام ده ! لان ببساطة اذا البيئة بتاعتنا اتدمرت (مثلا بسبب ارتفاع درجة حرارة الارض او تخريب طبقة الاوزون) البشر كلهم هيكونوا معرضين للاخطار !!
و السيء في الموضوع ان الشركات دي ممكن تقلل من التلوث بتاعها اذا اتبعت الطرقة الصحيحة في التخلص من مخلفاتها لكن ده هيكلفها شوية فلوس و عشان كدا مش بتعمله !! يعني الجمعيات دي مش بتقول اتوقفوا عن الصناعة انما بتقول انتجوا و لكن بأقل خسائر ، مش حاجة مستحيلة يعني !

و زيها زي مؤسسة مختصة بالصحة ، و وجهت انتقادات لمنتج معين و قالت ده فيه عيوب كذا و كذا و ممكن يجيب امراض كذا و كذا ، المؤسسة ملهاش اي مصلحة خاصة في شراء او بيع المنتج ، يهمها حاجة واحدة بسيطة صحة المستهلكين !

برده مؤسسة البرمجيات الحرة يهمها حاجة واحدة بس و هي حرية المستخدمين على المستوى الرقمي !


ربنا يبعد عننا الناس اللي حافظة مش فاهمة و محبي الفزلكة و الدمغة المقفلة

المزيد »

مقابلة لينوكساوية سريعة .

السلام عليكم و رحمة الله و بركاته

من وقت للتاني بحاول اكسر حدود العالم الافتراضي اللي عايشين فيه و اللي اتعرفت من خلاله على عدد كبير من الناس ، و عشان كدا بحاول اقابل بعض الناس اللي اتعرفت عليها من النت اذا جت فرصة مناسبة .

تالت يوم العيد ، قابلت كريم و عبد الرحمن ، عملنا اتجمعنا ناحية الجامعة كدا ، و طبعاً كانت قعدة لطيفة جداً ^_^

كريم كنت قابلته قبل كدا ، من الناس اللطيفة اللي اتعرفت عليه ^_^
عبد الرحمن كانت اول مرة اشوفه ، و هو برده ما شاء الله عليه ، من الناس اللي الوحد يفرح بمعرفتهم ^_^

و الاتنين ليهم اهتمام ب روبي (دي لغة برمجية مش حاجة تانية ! ) و هي لغة ممتازة جدا و سهلة و منافس قوي لبايثون (انا بقى بتاع بايثون )

اتكلمنا في حاجات كتير ، طبعا منها لينوكس و البرمجيات الحرة و شوية حاجات عن البرمجة و حاجات تانية كتير .

كان لقاء لذيذ جدا ، و ان شاء الله يتكرر تاني ^_^

المزيد »

طريقة عمل البسطرمة في البيت D:

السلام عليكم و رحمة الله و بركاته

العيد اللي فات طقت في دماغي افتكاسة ! بما اننا في عيد الاضحى و اللحوم متوفرة اكتر من اي وقت في السنة ، قولت اجرب اعمل بسطرمة !!


اعتقد ان كل المصريين عارفين يعني ايه بسطرمة ، و اعتقد برده ان دول الشام تعرف كويس البسطرمة ، عموما للي ميعرفش ، البسطرمة هي عبارة عن لحم متبل بيتم تجفيفه بتركه في الهواء ، الملح و الثوم بتعملوا كمواد حافظة ، و هنا على ويكيبيديا توضيح ممتاز عن البسطرمة .

المهم يعني ، في موضوعين منتشرين في كتير من المنتديات العربية ، مجرد عمل بحث عن طريقة عمل البسطرمة" هتلاقي الموضوعين منقولين في منتديات كتير .

الطريقة من ويكيبديا :
طريقة أخرى منزلية و يمكن استخدامها و هى مناسبة و أقل في الوقت و تتم كالتالي أولا تغسل قطعة اللحم جيداً بالماء الجارى فقط ثم يتم يجفف سطح قطعة اللحم بالقماش ويتم عمل شقوق (قطع غير عميق) في اتجاه واحد و يتم حشو تلك الشقوق بالملح ثم يتم لفها بفرخ أو ورق اللحمة الذى يلف به عادة الجزار(ورق جرائد غير مطبوع عليه أو ورق أسمر) و يتم وضع ثقل مناسب فوقها و تترك لمدة 24 ساعة أو يوم كامل، في اليوم التالي تشطف بالماء و تعلق لمدة يوم آخر مع وضع شاشة فوقها و يتم فرم الثوم جيدا و يخلط بالملح و الحلبة المطحونة و الفليفلة الحمراء الحلوة Paprika مع قليل من الماء حتى يتم تكوين عجين متناسق و متماسك غير طرى ولكن ليس صلباً بحيث يتم فرده بسهولة على قطعة اللحم و يغطيها كلها بسماكة متناسقه ثم يتم تعليقها في الهواء و الشمس لمدة 3 أيام إلى أسبوع و يمكن بعد ذلك استهلاكها .

- - - - -

انا جربت الطريقة دي و النتيجة بشكل عام كانت ممتازة ، ده بغض النظر عن اني زودت نسبة الملح و كانت مالحة شوية
طبعا جربت في كمية صغيرة ، حوالي ربع كيلو ، اكيد مش عاوز اجرب حاجة لسه اول مرة اعملها في كمية كبيرة

صورة لما ستبدوا عليه البسطرمة و هي متعلقة


الصورة دي مش بتاعتي انما موجوده على الانترنت في اكتر من موقع .


السنة دي ممكن اجرب اعمل سلامي (salami)

المزيد »

عيد اضحى سعيد : )

السلام عليكم و رحمة الله و بركاته


كل سنة و انتوا طيبين : )

- - - - - -

مش عارف مالي منشكح انهاردة كدا ليه و حاسس بطعم ليلة العيد فعلا ! (مع انه عيد لحمة يعني D:)
يا رب يكون عيد كويس على كل الناس : )

و الواحد كدا يستعد للاكلات الرسمية للعيد ، فتة ، رقاق ، مكرونة بالبشاميل و الذي منه



و يا رب يكون العيد ده وقت للهدوء و التسامح فيما يتعلق بالاحداث الاخيرة بين مصر و الجزائر .
انا مش عاوز اتكلم في الموضوع ده لاني خلاص اتقرفت من كلام مع المصريين و الجزائريين ! كل شعب عاملي فيها شعب الله المختار و بيتعصب لنفسه على حساب الحق و يخلط الحابل بالنابل ! زهقت من عصبية الجاهلية المنتة اللي انتشرت الفترة اللي فاتت ! كل شعب عمال يتهم التاني انه سبب المشكلة ! مع ان الاتنين غلطانين ! و حتى العقلاء من الجانبين كان موقفهم ضعيف للاسف !

اللي حصل حصل ، لكن انا فعلا استفد كتير من اللي حصل ده ! و اكتشفت مدى قلة الوعي عند شعوبنا ! و اكتشفت طريقة التفكير الحقيقة لبعض الاشخاص اللي كنت بحترمهم !
و يبدوا ان مصر و الجزائر اقرب مما نتصور ! البلدين اتقاسموا المركز ١١١ في تقرير الشفافية و الفساد الدولي لسنة ٢٠٠٩ !! (اساسا عدد الدول في التقرير 180 دولة ، يعني احنا الاتنين في اسوء المراكز و خيبتنا مشتركة ما شاء الله !!)

عموما بلاش تخريب المناسبة دي بالكلام عن اللي حصل ، انا اتكلمت كتير في المنتديات و راح صوتي من كتر الكلام !


- - - -

عيد سعيد على كل الناس و براحة على جهازكم الهضمي p:

^_^

المزيد »

القصيدة النونية لابن قيم الجوزية - بصوت طه محمد عبد الرحمن

السلام عليكم و رحمة الله و بركاته

في شوية حاجات عاوز اكتب عنها قبل ما الكمبيوتر يتشال (غالبا هيتشال على آخر الاسبوع ده ، انا فعلا محتاج اذاكر بشكل افضل)

المهم ،

من كام شهر كان ليا مزاج اسمع حاجة لابن القيم ، دورت على نونيته الشهيرة ، لقيت الاخ الفاضل "طه محمد عبد الرحمن" مسجل القصيدة النونية كاملة بصوته ^_^

راسلت الاخ طه عشان اعرف اذا كان ينفع انشر التسجيل على الانترنت ، قالي - جزاه الله كل خير - مفيش اي مشاكل ، و مسموح بنشر تسجيلاته ^_^

دي صفحة الاخ القارئ طه على موقع المتون العملية

القصيد نظمها الإمام "شمس الدين محمد بن أبي بكر الزُّرعي الدمشقي" المعروف بـ "أبو عبد الله" و "ابن قيم الجوزية" (حد ميعرفش ابن القيم ؟!!) . القصيدة حوالي ستة الاف بيت !! و سماها "الشافية الكافية في الانتصار للفرقة الناجية" .

صفحة ابن القيم على ويكيبيديا
و ده موقع خاص بالإمام ابن القيم (جزى الله الشخص القائم عليه كل خير)
www.IbnalQayem.com

- - - - - - -

القصيدة متقسمة على ست اجزاء ، كل جزء ما بين ساعتين لتلات ساعات (بنتكلم في قصيدة عدد ابياتها ٦ الاف بيت متوقع ايه يعني !!) و مجموع حجمهم مش كبير أوي ١٣٤ ميجا بس (بمتوسط حاجة و عشرين ميجا لكل جزء) و جودة التسجيل جميلة و صوت الاخ طه ما شاء الله عليه ^_^

الروابط مباشرة و طبعاً الملفات بصيغة ogg الحرة ^_^

[ الجزء الأول ]
[ الجزء التاني ]
[ الجزء التالت ]
[ الجزء الرابع ]
[ الجزء الخامس ]
[ الجزء السادس ]

و هنا نص القصيدة النونية على موقع ويكي مصدر

و ده مقطع صغير (خمس دقايق) من القصيدة عن وصف الجنة ، مقطع جميل بس بصراحة مش عارف هو بصوت مين لانه عندي من فترة كبيرة ، و هو اقرب للاناشيد منها للقصائد .


و بس كدا : )



** غالبا صيغة ogg هتشتغل معاك عادي خالص على البرنامج اللي بتفضله اذا كنت بتستخدم الكودك المناسب ، و لافضل اداء انصح باستعمال البرنامج الرائع VLC .

المزيد »

دليل البرامج الحرة و المفتوحة لنظام وندوز - نسخة منقحة .

أطلق إصدار جديد من الكتاب! حمّل آخر نسخة منه عبر الرابط التالي:
"دليل البرامج الحرة مفتوحة المصدر"

السلام عليكم و رحمة الله و بركاته

من حوالي ١٠ ايام نشرت نسخة من الوثيقة دي ، هي كانت تقريبا منتهية بس فضلت انشرها في تلات مواقع بس و بعد كدا اشوف تعليقات و ملاحظات الناس و بعد كدا انزل نسخة منقحة و انشرها بشكل عام ، و ادي النسخة جاهزة للتحميل - شكراً لكل شخص ساهم و لو بتعليق : ) -

الكتاب الالكتروني ده يعتبر تحديث لـ "المدخل نحو المصادر المفتوحة" اللي كنت عملته من سنتين تقريباً ، حاجات كتير اتغيرت في السنتين دول ، اتعرفت اكتر على البرمجيات الحرة و المفتوحة و افكارهم ، و خلال السنتين دول كنت بستعمل نظام جنو\لينوكس بشكل كامل و حتى الموضوع ده عمله على لينوكس مع انه موجه اساسا لمستخدمي وندوز ، و كمان اتطورت معرفتي بمجموعة OpenOffice.org و اللي استخدمت منها برنامج writer (برنامج تحرير النصوص) في عمل الوثيقة دي : )

متنسوش تقروا التقديم و المقدمة ، فيهم حاجات مهمة و مفيدة : )
( و كمان الخاتمة فيها حاجات مهمة كمان)

و ده الموضوع زي ما كتبته في المنتديات

-----------------

تم الانتهاء من عمل و تنقيح "دليل البرامج الحرة و المفتوحة" و هو يعتبر الإصدار الثاني حيث أن الإصدار الأول تم إطلاقه من سنتين تقريباً ، تحت اسم "المدخل نحو المصادر المفتوحة" ، و قد تم تغيير الاسم ليكون معبر و أكثر وضوحاً ، و هذه الوثيقة تحتوي على قائمة بأهم البرامج الحرة و المفتوحة المصدر لمستخدمي نظام وندوز ، و تحتوي برامج متنوعة في كل المجالات و تهم كل المستخدمين خصوصاً المستخدميين العاديين .

يقول عماد الدين الأصفهاني : «إني رأيت أنه لا كتب أحد كتاباً في يومه إلا قال في غده لو غـير هذا لكان حسن ، و لو زيد هذا لكان يستحسن ، و لو قدم هذا لكان أفضل ، و لو ترك هذا لكان أجمل ، و هذا من أعظم العبر ، و هو دليل على استيلاء النقص على جملة البشر ...» .
و جاء هذا الإصدار الجديد بأسلوب أفضل ، منسق بشكل اجمل ، برامج أكثر و عدد صفحات أقل ، و بالعديد من التحديثات شكلاً و مضموناً ، إضافةً و حذفاً و تعديلاً ، مع مراعاة العديد من الأشياء الصغيرة هنا و هناك و التي تحدث فارق فعلاً .


و الهدف من هذه الوثيقة كما في الإصدار الأول يتلخص في ثلاثة نقاط :
– التعريف بالبرمجيات الحرة و المصادر المفتوحة و دعمها .
– الحث على عدم استخدام البرامج المقرصنة .
– التعود على البرمجيات متعددة المنصات .

ففي بداية الوثيقة مقدمة صغيرة و مختصر للتعريف بالبرمجيات الحرة و المفتوحة و تحيل لعدد من المواضيع المفيدة في التعرف على حركة البرمجيات الحرة و المفتوحة .
و أيضاً تحث على عدم استخدام البرامج المقرصنة (أي التي لم يتم دفع ثمنها و تعمل بالكراك و السريال) حيث أن كل البرامج التي تم ذكرها هي برامج مجانية و تحتوي الوثيقة على ما يقارب الـ ٢٠٠ برنامج مع العديد من الروابط المفيدة .
و أخيراً التعود على استخدام البرامج المتعددة المنصات التي تعمل على اكثر من نظام تشغيل و بالتالي لا تكون مرتبط بنظام وندوز و يمكنك الانتقال لأنظمة أخرى مثل جنو/لينوكس بسهولة .









# رخصة المحتوى :
CC : BY-SA 3.0
لك مطلق الحرية في : نشر ، نقل و بناء نسخة مشتقة من الموضوع ، بشرط الإشارة إلى الكاتب الأصلي ، و نشره تحت نفس الرخصة .



# التحميل :

[ دليل البرامج الحرة و المفتوحة ]

- - - - - - - - - - -

أتمنى من كل شخص يجد هذه الوثيقة مفيدة أن يقوم بنشرها على الإنترنت و بين أصدقائه و معارفه لتنتشر البرمجيات الحرة و المفتوحة اكثر .

و ده شعار بحجم صغير و متوسط مناسب للمدونات و المواقع او حتى المنتديات : )













أخيراً إذا كان لديك أي تعليق أو اقتراح لا تتردد أبداً في مراسلتي : )

المزيد »

المجلة التقنية - مدونة تهتم بآخر الاخبار التقنية .

السلام عليكم و رحمة الله و بركاته



من فترة قريبة افتتح الاخ djug مدونة بتهتم بآخرالاخبار التقنية و كمان البرمجيات الحرة و المفتوحة ليها نصيب من الاخبار و المتابعة ^_^

كمحتوى ، المحتوى جميل جداً ، ملاحظتي الوحيدة حالياً اسم المدونة "المجلة العلمية" شائع جداً و اعتقد انه مش واضح تماماً ، ان شاء الله هلكم الاخ djug على النقطة دي : )
و ان شاء الله تستمر على نفس المستوى الجميل ده ، و نشوف تقدم اكتر كمان : )

www.IT-Scoop.com

المزيد »

إنها التقلبات الجوية ليس إلا : )

في يوم من الأيام تستيقظ من النوم ، تجد نفسك في حالة غريبة و لا تدري ما السبب ، شعور غريب إحساس مختلف ، خليط من الأحاسيس و المشاعر ، كأنك واقع في الحب !
في الحقيقية قد لا أكون جربت فعلاً الحب بالمعنى المتعارف عليه حالياً ، و لكنه إحساس لا يشبه أي إحساس قد تكون شعرت به من قبل ، هو شعور غريب حقاً و لا تعرف ما هو !

تميل نحو شخص ما ، قد يكون شخص افتراضي و لم تراه على ارض الواقع قط و غالباً لن تراه ، و لكن تحب أن ترى ردوده و تتبع مشاركاته ، لكن ... يا ترى هل هو مهتم أيضاً ؟ هل استطيع التلميح له ؟ هل سيتقبلني ؟ و هل سيبادلني نفس المشاعر ؟

بل هل هو حب فعلاً ؟ أم أنه فقط اشتياق لهذا النوع من الحب ؟ قد اكون جربت أنواع أخرى من الحب ، حب الأهل ، حب الصديق ، حب العمل و الاخلاص فيه و حب الوطن ، لكن الشعور الحالي غريب فعلاً و قد يكون مجرد اشتياق لتجربة نوع جديد من الحب .

لكن ،،، على الشخص توظيف مشاعره في الاطار المناسب ، قد يكون الوضع الحالي صعب على كثير من الاشخاص ، نظرة المجتمع الشرقي لعلاقات الرجل ، دائماً ما نجد شكوى أن المجتمعات الشرقية تنظر للعلاقات العاطفية للشاب نظرة أقل شدة من علاقات الفتاة قبل الزواج ، لكن هل يجعل هذا الموضوع أسهل على الشباب الذين يريدون الابتعاد عن مثل هذه العلاقات و إعمال مشاعرهم في الإطار السليم ؟ ، للأسف نحن في النهاية بشر لدينا عواطف و مشاعر ، نتأثر بما حولنا و بما نراه و نسمعه ! تذهب للكلية تجد ثنائيات في كل مكان ، ترجع لمنطقتك تجد اصدقائك و معارفك يتكلمون عن علاقاتهم ، تجلس امام الكمبيوتر ترى نفس الوضع !


مشاعر مختلطة و أسئلة كثيرة ، لكن في النهاية يجب أن تكون النفس نقية لتحظى بالنقي ، و يظل الطيبيون للطيبات ، فترة و ستمضي لحالها كغيرها ، و في يوم من الايام ستصل للاستقرار عندما تجد السكن و المودة و الرحمة ، و يبدوا أنها التقلبات الجوية ليس إلا : )



-------------------

تدوينة بقالها اكتر من أسبوعين محفوظة كمسودة ،،،، أنا مش ناثر ولا ليا في الكتابة ولا حتى اعتقد اني رومانسي (معرفش بجد هل بتتكتب بالألف ولا بدونها !) و بصنف نفس على إني شخص عملي لدرجة الغباء ! ، لكنها كانت مجرد خاطرة و كنت محتاج للكتابة فعلاً : )
و ليه بعتقد ان الحاجات الغريبة دي سببها التغييرات الجوية ؟ ، عشان في نفس التوقيت ده تقريبا من السنة اللي فاتت ، كنت كتبت تدوينة زي كدا ، و كان فيها مشاعر مختلطة كتير ، بالاضافة لاني من يومين قريت تدوينة جميلة بتتكلم عن نفس الموضوع : اكتئاب الغيوم ( بس الواضح اني مش بكتئب D: ، انما بيكون تغيير من نوع مختلف)

المزيد »

يخرب بيت الكورة :@

يخرب بيت القرف بتاع الكورة ده !

كمية كراهية و قرف و تعصب منتشرة اليومين دول تخلي الواحد يتشل !

انا مش عارف ليه كل ده اساسا !! كل ده على ماتش ! ولا حتى كل ده عشان الكورة !!

اساسا معروف ان كتير من متابعي و مشجعي و حتى مسئولي الكورة متعصبين مش بس في مصر ولا في الجزائر دا في العالم كله !

انا فعلا بشكر والدي من كل قلبي انه مكنش بيتابع القرف ده اللي اسمه متابعة و تشجيع الماتشات

مش فاهم يعني ، لو شوية مصريين كدا انضربوا في دماغهم و طلعوا على الفضائيات مش الجرايد المحلية حتى ، و قعدوا يشتموا في اي دولة ، هل هنلاقي الدولة دي تاني يوم باعته قوات عسكرية عشان تضرب مصر ؟ و تبقى مصر دي العدو الاول ليهم ؟
نفس الوضع ، مش معقول عشان مجموعة من الجزائريين عاملين مواضيع عن مصر و مهما كان سوء الحاجات اللي عملوها دي خلاص بقى يبقى نكره الجزائر و الجزائريين !! (و اللي عمله بعض الجزائريين مش كويس يعني ، دا منيل بستين نيله) بس اللي عمل كدا كام شخص يعني ؟ ميه ؟ الف ؟ مليون ؟ اتنين او حتى تلاته مليون ؟ الجزائر حوالي 35 مليون !! مش معقول هكره كل الشعب عشان مجموعة مجانين ! المحترم محترم و المتعصب متعصب !!



حاجة تقرف بجد !
عشان نشوف الوكسة الحقيقية يا ريت تقروا الموضوع ده من على مدونة موسوعة المعرفة
الحرب المصرية الجزائرية

مشجعين و صحافة تعبانين !!



اخيراً ، بقول لكل جزائري محترم ، انا فعلاً بقدرك بغض النظر اي حاجة تانية (و بغض النظر اذا كنت هتعرف تقرا لهجتي العامية الركيكة دي ولا ﻷ D:)

:: أُخَيَّ في الجزائر تحيتي إليك ، و هلت البشائر بنور مقلتيك ::

المزيد »

قناة وثائقية ممتازة .

السلام عليكم و رحمة الله و بركاته



لما كنت في المصيف المرة الاخيرة ، كنت بحول بين القنوات و لاحظت قناة اسمها "ناشونال جيوجرافيك أبوظبي" ، قعدت اتفرج عليها شوية ، و بعد اول 10 دقايق تقريباً ، قولت "هي دي" D:

قولت اخيراً لقيت القناة اللي تسد مع الجزيرة الوثائقية ، و لاني كنت عارف شوية عن مؤسسة "ناشونال جيوجرافيك" فتوقعت قناة ذات محتوى ممتاز و كان فعلاً ، قناة ناشونال جيوجرافيك أبو ظبي هى قناة بتقدم محتوى وثائقي معرب بدعم من المؤسسة الاساسية و هى National Geographic .

القناة بتقدم افلام وثائقية ممتازة جداً و مثيرة للاهتمام ، و بالنسبة ليا بقت من اكتر تلات قنوات بتفرج عليهم على التلفزيون ، القناة بتقدم محتوى متنوع ، و لكن بيتركز بشكل اساسي في العلوم و التكنولوجيا ، بشكل عام كل الافلام ممتازة بس اكتر تلاتة عجبوني جداً "ميكانيكو الكوكب" ، "أيام عصيبة على كوكب الأرض" و "لم أكن أعلم" .

ميكانيكو الكوكب : برنامج بيتكلم عن اتنين مهندسين بيحاولوا يحلوا مشكلة التلوث ، فبيروحوا مناطق معينة و يغيروا في الاجهزة اللي بتعمل تلوث ، برنامج ممتاز جداً بصراحة ، و اكتر واحد عاجبني .
أيام عصيبة على كوكب الأرض : زي ما هو باين من اسمه البرنامج بيتكلم عن البيئة و عن المشاكل اللي بيعملها الانسان و بيأثر بيها على الكوكب من تلوث و تأثير على مخزون المياة و الموارد الطبيعية و حاجات تانية كتير .
لم أكن أعلم : برنامج بيوضح بعض المعلومات عن حاجات متنوعة في الحياة اليومية ، برنامج ظريف جداً برده .


زي ما قولت - دي المرة الكام اقول فيها كدا ؟ D: - البرامج كويسه جداً ، بس زي اغلب القنوات العربية اللي بتقدم محتوى اجنبي ، المواد اللي بتتعرض بتكون قليلة شوية و قديمة نوعاً ما يعني تقريبا من ٢٠٠٥ ، بس برده ما زالت ممتعة و حاجات كتير مش هيفرق فيها الموضوع ده لانها غير مرتبطة بوقت معين .

الملاحظة التانية ، ان في بعض البرامج مدبلجة باللهجة اللبنانية ! يمكن بالنسبة ليا معنديش مشكلة في التعامل مع اللهجات و حتى بعض اللهجات اللي ناس بتحس انها صعبة زي بعض اللهجات الجزائرية و المغربية ، انما بصراح مش عارف ايه الفايدة من الدوبلاج اللبناني ؟ لا هي قناة لبنانية ولا هى قناة اعلانية يبقى ايه الفكرة في اللبناني ؟ مش عارف !
بس على الاقل هتحس ببعض اللي بيشعر بيه الاخوة في الجزائر و المغرب و ما حولهم لما بيسمعوا اللهجات الشرقية ! (المصرية ، الخليجية ، الشامية ...) و كأنه فرض عليهم يتعلموا اللهجات دي !
و إذا كنت متضايق زيي من الموضوع ده متنساش تبعت رسالة للموقع توضح فيها انك مش عاجبك النظام ده : )


اذا حبيت تتفرج على القناة ، هتلاقيها على التردد ده :

نيل سات N102
التردد : 12.226
الاستقطاب : أفقي
الترميز : 27500
التصويب : 3/4

عرب سات بدر 6
التردد : 11804
الاستقطاب : أفقي
الترميز : 27500
التصويب : 3/4

موقع القناة : www.natgeotv.ae
و إذا كنت بتتفرج على القناة من فترة ، ساهم في تحسين القناة من هنا
http://www.natgeotv.ae/Survey/Default.aspx


و طبعاً لو حد عاوز الصورة في اول الموضوع ، مفيش مانع انه ياخدها و يحطها في موقعه او في المنتديات : )

المزيد »

دورة تنمية مهارات الخط العربي في جامعة القاهرة .

السلام عليكم و رحمة الله و بركاته

انهارده حضرت أول محاضرة من 10 محاضرات لتنمية مهارات الخط العربي ، المحاضرات تبع جامعة القاهرة و بتقدم بشكل مجاني ، و كانت محاضرة لطيفة جداً .

الدورة دي جت في معادها تمام ، لان موضوع الخطوط و الكتابة من الحاجات اللي مهتم بتنميتها الفترة اللي جاية .
كنت من وقت للتاني بشوف برنامج بيجي على قناة الهدى و هى قناة اسلامية لغير الناطقين بالعربية و برامجها بتتقدم باللغة الانجليزية ، البرنامج ده كان عن تعليم الخط و اغلب الناس اللي بتتعلم لغتهم الام مش العربية ، كان شعور جميل جداً ان الواحد يشوف مدى شغفهم بتعلم الخط العربي ، و دي كانت حاجة محفزة جداً ليا ، ازاي اكون عربي و مش بكتب بشكل يليق بلغة زي العربية !
بالمناسبة خطي مش وحش ، لكن احب يكون افضل : )



المحاضرة كانت لذيذة جداً و الاستاذ اللي كان بشرح لطيف جداً و شرحه حلو ما شاء الله .
ربنا يسهل في بقية المحاضرات و تكون بداية لتعلمي فن الخط العربي : )

و احب اقول تاني ، المحاضرات مجانية ، و لو حبيت تحضر تعالا و سجل اسمك بداية من المحاضرة الجاية ، الدورة معمولة في راعية الشباب (جنب الملاعب) كل يوم حد و اربع من الساعة اتنين للساعة اربعة .

: )

المزيد »

لو سمحت توقف عن دعم ميكروسوفت !

السلام عليكم و رحمة الله و بركاته



من يومين كتبت موضوع صغير بعنوان "لو سمحت توقف عن دعم ميكروسوفت !" ، و قبل ما الاقي حد يدخل يقدس في ميكروسوفت و يقولي مش عارف ايه ، بغض النظر عن العنوان ، الموضوع بيتكلم عن اجهزة المحمول اللي بتيجي معاها نسخة وندوز متسطبة ! ، و نسخة الوندوز دي بيكون اسمها نسخة oem ، و دي عبارة عن نسخ وندوز بتروح للشركات المصنعة للاجهزة زي dell ، hp ، toshiba ،،، الخ الخ الخ ، و الشركات دي بتسطب النسخ دي على الاجهزة اللي بتعملها و تبيعها ، المشكلة في ايه بقى ؟ المشكلة ان اغلب الاجهزة في السوق عليها وندوز و ساعات كمان ميكروسوفت اوفيس ، و الحاجات دي مش ببلاش ! و اللي بيشتري الجهاز بيدفع تمن الحاجات دي و ضرايب كمان ، بالرغم من انه ممكن يكون بيستعمل انظمة تشغيل تانية زي جنو/لينوكس !
يعني بيدفع تمن شيء هو مش عاوزه و مش بيستخدمه ، لان الشركات المصنعة للاجهزة لا تتيح اختيار نظام التشغيل غير في اجهزة محدودة جدا من انتاجها (و بالتالي محدش يجي يقولي ما في شركات بتتيح اجهزة بأنظمة تانية زي لينوكس ! عشان مش كل الاجهزة فيها الاختيار ده ، يعني لو عاوز جهاز بإمكانيات معينة و لقيت عليه وندوز فهدفع تمنه غصب عني !) .
حاجة كمان ، ممكن ببساطة تكون اشتريت نسخة وندوز و مستعملتهاش و بدل ما تدفع تمن النسخة اللي بتيجي على الجهاز ممكن تستعمل النسخة اللي معاك ، و برده في نسخة بتتسطب على اكتر من جهاز و بالتالي مش محتاج تدفع في حاجة انت مش هتستعملها !!
الموضوع ده بيسموه "ضريبة ميكروسوفت" - "microsoft tax" ، عشان بتضطر تدفع تمن الوندوز لميكروسوفت بشكل غير مباشر .



تعرف بقى انك تقدر تسترجع الفلوس اللي دفعتها في نسخة الوندوز اللى جاية مع اللاب توب ؟
يعني انا مثلا شخص بستعمل نظام جنو/لينوكس بقالي سنتين ، و مش محتاج وندوز خالص على اللاب توب بتاعي ليه بقى ادفع تمن الوندوز مع اني مش هستخدمه فضلا اني مش عاوز ادعمه اساسا !!


الموضوع ده بقى بتكلم عن طريقة استرجاع تمن الوندوز ، و فالموضوع روابط لناس رجعلها 30 ، 70 ، 110 دولار (الاخير اللي رجعله 110 دولار ده اتبرع بيهم لدعم توزيعة لينوكس اسمها mint ، بجد عجبتني الحركة دي اوي) .



المشكلة بقى اني كنت نزلت الموضوع في منتدى "الفريق العربي للبرمجة" ، و ما شاء الله يعني في ناس ردت في الموضوع و قلبوها حرب !
مع اني مش بتكلم اساسا عن ميكروسوفت نفسها ولا اتكلمت على وندوز و لينوكس كنظام تشغيل ، الا ان في ناس شكلها مقرتش غير عنوان الموضوع و قعدت ترد و خلاص !
و مع اني في اخر الموضوع كتبت اذا كنت مهتم بالموضوع شارك و اذا مكنتش مهتم متشاركش ، و برده مفيش فايدة ، بحس ان في ناس حافظة مش فاهمة :\

المشكلة اساسا ان ده حق للمشتري مش عارف الناس معترضه على ايه ! ، و لان المستخدم في موقف ضعيف بالنسبة للشركات المصنعة للاجهزة ، هيئات حماية المستهلك في امريكا و اوربا بتجبر الشركات المصنعة على انها ترجع تمن نسخة الوندوز و البرامج التانية اذا اراد المستخدم !

معلومات اكتر من ويكي - الرابط فيه معلومات مفيدة جدا عن الموضوع ده -
Windows refund

-------

الموضوع اهه ، على مجتمع لينوكس العربي و الفريق العربي للبرمجة .

لو سمحت توقف عن دعم ميكروسوفت ! - هل فكرت في استرجاع نقودك من قبل ؟ - مجتمع لينوكس العربي .
لو سمحت توقف عن دعم ميكروسوفت ! - هل فكرت في استرجاع نقودك من قبل ؟ - الفريق العربي للبرمجة


اخيرا ، اذا كنت بتستعمل نظام حر او مش عاوز النسخة اللي بتيجي مع الجهاز المحمول لاي سبب كان ، هتلاقي في الموضوع روابط لمعلومات مهمة عن طريقة استرجاع فلوسك ، و اذا الشركة استهبلت ، ببساطة اتصل بهيئة حماية المستهلك في بلدك و متقولش كدا كدا مش هيعملوا حاجة ! اذا زادت الشكوى ضد حاجة معينة بتكون امكانية تغيرها اكبر !

: )

المزيد »

عشرون سنة لي و سنة لها : )

السلام عليكم و رحمة الله و بركاته

المفروض ده كان موضوع عن اتمامي العشرين ، لكن في الحقيقية انا تميت العشرين من خمس شهور ! - كان قبل تلات ايام من اول امتحان في الفصل الدراسي التاني لسنة تالتة - ، تميتها في 21 مايو 2009 : )
لكن كان لازم كتابة الموضوع ده : )
و بالمرة اتكلم عن اتمام المدونة سنتها الاولى - تمتها من شهرين و شوية ! -

-------------

العشرين ، يعني بداية عِقد جديد من عمري ، يعني فاضل سنة واحدة و اكون بالغ رشيد قانوناً و اكون شخصية قانونية مستقلة تماماً عن والدي ، يعني اخر سنة في الدراسة ، يعني اقرب للجيش و للحياة الاخرى ما بعد الجيش ، يعني اكثر وعياً و نضجاً ، و يعني و يعني و يعني : )

مع مرور كل سنة المفروض ان الواحد يعمل لنفسه تقييم شامل للسنة اللي عدت ، بالنسبة ليا انا سعيد جدا بالسنة اللي فاتت ، قدرت اتخلص من عدد من العيوب ، و اضيف عدد من المميزات بالاضافة الى اكتسابي المزيد من الخبرات ، و الاهم زادت ثقتي بنفسي : )

بداية السنة دي كانت غريب جدا ، هو مش نوع من التشاؤم او التطير ، انما حاجة لاحظتها فقط : )
في اول تلات ايام فيها اتكهربت ، اتصبت في ايدي بحرق بحجم عملة معدنية - من بتاعت ايام زمان مش العملات بتاعت اليومين دول D: - ، اتدلق عليا شوربة مولعة !

الغريب في الموضوع ان الحاجات دي محلصتش معايا من فترة كبيرة جداً ، من ايام ابتدائي و اعدادي بالرغم من اني مش الشخص الحذر اوي ! (تقريبا عجزت و ردت فعلي بقت بطيئة ههههههههههههه) ، بس بصراحة كان نفسي بتهفني على الكهربا ، الواحد بقاله متكهربش (اليوم اللي قبله كنت بقول في دماغي انا بقالي كتير متكهربتش ، تاني يوم راح حصل هههههههههه)

-------

لكن بما اني كملت العشرين ، محتاج اقرا اكتر في مجالات معينة : )
زي ؟ معلومات عامة عن الامراض الوراثية و الوبائية ، معلومات عن التربية - بصراحة مش ناوي عيالي تتربى حسب الظروف ! - ، محتاج اقرا في اصول الدين و العقيدة اكتر ، عاوز اراجع على قواعد اللغة العربية ، و ناوي ان شاء الله ارجع احفظ قرآن ، و بإذن الله اراجع جزء عم قبل نهاية السنة دي .

جربت قبل كدا تحفظ القرآن بالكتابة ؟ ، اعتقد ان ناس كتير بتحاول تحفظ القرآن بالقراءة ، اعتقد موضوع القراءة ده مش مناسب لناس كتير خصوصاً في عصرنا ده لان حاجات كتير بتخلي الواحد مشتت و ذهنه مش حاضر ديماً ، لكن الكتابة اكتر قدرة على تثبيت النص ، على الاقل ده بالنسبة ليا ، عشان كدا مش بعرف اذاكر غير بالكتابة ، جرب الطريقة دي ممكن تكون مناسبة ليك : )


و لسه في احاجات كتير عاوز اعملها بإذن الله : )

---------------------

بالرغم من مرور اكتر من سنة على المدونة ، مازلت صفحة "عن skeleton eel اتحدث" ، لسه فاضية ، اعتقد اني هرجع اعدلها في الكام يوم دول .


كنت عاوز اكتب كام حاجة كمان ، بس نسيت ! فكفاية كدا دلوقتي : )

المزيد »

البوم حسنات لأحمد أبو خاطر بصيغة ogg الحرة .

السلام عليكم و رحمة الله و بركاته

من فترة و عاوز اعمل موضوع عن الصيغ المملوكة (proprietary format) ، و ان شاء الله قريب هعمله ، الموضوع عن الصيغ المملوكة (غير الحرة) و ان استخدامنا للصيغ دي و نشرها بنكون بندعمها بشكل غير مباشر ، ليه ندعم صيغ مملوكة و بيتحكم فيها فرد او شركة معينة ؟ ، طيب اذا كان في صيغ حرة تكافئ الصيغ المملوكة ليه نستخدم و ندعم المملوك ؟

امثلة على الصيغ المملوكة ؟ خد عندك ، rm صيغة الريال بلاير ، mp3 صيغة الصوتيات المشهورة ، amr كتير من موبايلات نوكيا بتستعملها ! ، doc صيغة ميكروسوفت اوفيس للنصوص ، rar صيغ ضغط الملفات ، و غيرهم كتير !

المفروض الصيغ دي تكون معيارية و يكون في مؤسسة عامة هى اللي بتحدد شكلها و قواعدها مش شركة معينة ! ، حاليا الصيغ المملوكة يا اما مش معروف طريقة عملها لان الشركة اللي بتملكها لم تنشر وثائق عنها ، او طريقتها اتعرفت بس محدش يقدر يعمل فيها حاجة لانها بتكون متغطية بحقوق ملكية او براءات اختراع !

صيغة mp3 كمثال ، الصيغة دي مملوكة لمجموعة من الافراد/الشركات - ست افراد تقريبا او حاجة زي كدا مش فاكر بالظبط - ، اصحاب الصيغة دي بياخدوا (او المفروض ياخدوا) من كل برنامج بيدعم mp3 ـ 25 دولار ! ، و كمان بياخدوا 1٪ من قيمة اي ملف mp3 بتم بيعه ! ، ده غير انهم ممكن يمنعوا اي شخص من استخدام الصيغة دي !! - يا تدفعلنا اللي احنا عاوزينه يا تخبط دماغ في الحيط ! - على حسب ما افتكر ان الموضوع ده حصل مع شكرة كبيرة تقريبا ميكروسوفت او نوكيا ، و لان الصيغة دي منتشرة جدا فكان لازم يدفعوا !

نيجي بقى لصيغة ogg ، غالبا هتقول دي صيغة غريبة او اول مرة اشوفها ! ، يا ترى ايه البرامج اللي بتشغلها ؟ الظريف في الموضوع ان في كذا برنامج بيشغل الصيغة دي و برامج مشهورة كمان و غالبا هتشتغل معاك عادي خالص ، بس الافضل تستعمل البرنامج الرائع (فخر البرمجيات الحرة في دعم الوسائط المتعددة زي ما بحب اسميه) VLC .
و على إيه برنامج وسائط اساسا ؟ اذا كنت بتستعمل فاير فوكس 3.5 او اعلى تقدر تشغل الصيغة دي من الفاير فوكس نفسه و بدون اي اضافات ! فقط اضغط على لينك الملف اللي بصبغة ogg ، و هيشتغل في المتصفح عادي خاص ، في احسن من كدا ؟
طيب تعرف كمان ان الاجهزة الصيني المنتشرة في السوق تحت اسم مشغل mp3 بتقدر تشغل صيغة ogg بدون اي مشاكل ! هنا بعض الاجهزة المنتشرة في السوق المصري ، و هنا القائمة رسمية للاجهزة اللي بتدعم الصيغة دي .

اخيراً ده موضوع جميل جدا عن صيغة ogg الحرة و المفتوحة => صيغة ogg المفتوحة - وادي التقنية







معلش دا بقى موضوع تقني خالص D:

المهم ، ده البوم حسنات - اخر البوم - للمنشد الجميل أحمد أبو خاطر .
الالبوم بقاله فترة مش قليلة - سنتين او تلاته تقريباً - ، و موجود على مواقع ابو خاطر من فترة كبيرة برده ، لكن الغرض من الموضوع نشر الالبوم بصيغة ogg - الالبوم متوفر على موقع ابو خاطر للتحميل المجاني و لكن بصيغة mp3 .



حسنات | يا بني⁢⁢⁢⁢
⁢أيها الحادي | الحجاب (انجليزي)
أطفالنا | لا تدعني اذهب (انجليزي)
صناع الحياة | لا زلت اسأل (انجليزي)
خير الخلق | الله القادر (انجليزي)


نشيد حسنات رائع جدا جدا بصراحة ، اسمعوه ، ركزوا فيه ، رددوا وراه ، قوي جداً فعلا :s
و برده يا بني جميل ، و أطفالنا لطيف أوي : )

المزيد »

القدرة على اتخاذ القرار مع تعدد الآراء .

السلام عليكم و رحمة الله و بركاته

في مقولة او مثل بيقول ، "اذا كان لديك ساعة فانت تعرف الوقت ، أما اذا كان لديك ساعتين فانت لا تعرف الوقت تماماً"


الموضوع متعلق بالقدرة على اتخاذ القرار في وجود عدد من الاراء الاخرى .

يمكن انا جربت الموضوع ده بشكل فعلي بسبب طرحي لبعض الحاجات اللي عاوز اعملها للمناقشة العامة في المنتديات ، يعني مثلا في (نقاش - استشارة بخصوص قالب كتاب) ، و ده (نقاش - اريد تحديث كتاب "الدليل العملي في استخدام اوبنتو") و (طلب - تصميم غلاف لكتاب "المدخل نحو البرمجيات الحرة و المفتوحة") .

الفكرة بتدور حول الاستفادة من قوة المجتمع و ان تفكير اكتر من عقل اكيد افضل بكتير من تفكير عقل واحد ، لكن في مشكلة ان الشخص اللي عاوز يستفيد من الافكار الكتيرة لازم يكون عنده القدرة على اتخاذ القرار في حالة تعدد الاراء و تعدد مصادرها ، يعني اذا كان في شخص بيفكر في حاجة معينة ، و طرح بعض الافكار ، هيكون من السهل نوعاً ما انه يقرر اي واحد هيختار لان غالبا بيكون في فكرة مرجحة اكتر بالنسبة ليه ، لكن على العكس اذا كان في افكار و اراء اكتر و من مصادر مختلفة الشخص بيكون قصاد مشكلة حقيقية في اتخاذ القرار !

شخصياً معنديش مشكلة في اتخاذ القرارات ، لكن بدي كل شيء حقة من التفكير و التخطيط ، و اذا قررت التنفيذ بنفذ على طول - في مثل صيني بيقول "اذا فكرت طويلا في الخطوة القادمة ستسير لبقية الطريق على ساق واحدة" - ، لكن برده في قرارات لازم تتخذ بسرعة و تتنفذ اسرع ، عشان كدا اعتقد اني محتاج تنمية جزئية سرعة اتخاذ القرار عندي : )


الموضوع الاول بتاع الاستشارة بخصوص القالب ، كان كافي بالنسبة ليا اني مفكرش افتح موضوع مماثل تاني ! ، مش بسبب تعدد الاراء ، انما بسبب بعض المناقشات الرخمة في الموضوع ، و وجود شخص بيقترح الاقتراح و شايف انه الافضل و لازم يتطبق ! - في الموقف اللي زي كدا مش عارف بالظبط مين المفروض يتعصب لرأيه ؟ انا ولا هو ؟ D: - ، لكن في الحقيقة في نهاية الموضوع استفد كتير من التعليقات اللي اتكتبت في الموضوع و ده خلاني افتح اكتر من موضوع تاني عشان اشوف اراء بقية الناس لان بالتأكيد في حاجات هتكون غايبة عني .
ببساطة في المواضيع دي كنت ممكن اعملها من غير ما اخر رأي حد - و أي شخص يعمل كدا مفيش لوم عليه فعلاً - ، لكن فضلت اطرح الموضوع عشان يطلع العمل في افضل صورة .

لكن من ناحية تاني ، زي ما في الموضوع الاخير بتاع غلاف الكتاب الواحد بيقع في نوع من الحيرة او التردد في الاختيار ! ، التصميمات جميلة ما شاء الله و المفروض اختيار واحد في النهاية .

بشكل عام موضوع الغلاف ده مش ذي اهمية اوي ، و كان ممكن استعمل الغلاف القديم فهو جميل برده ، لكن كنت عاوز اعمل اطلاق جديد للكتاب / الوثيقة ، و لإني عمل تغيير في اسم الكتاب حتى و اول نسخة منه كانت من سنتين تقريباً ، و في السنتين دول اتعلمت حاجات كتير ، بالاضافة الى ان المدخل للبرمجيات المفتوحة كان اول وثيقة اكتبها باستعمال اوبن اوفيس و كانت اول تجربة للتعامل مع برامج الاوفيس بشكل موسع اساسا !

ده مثال بين صفحة من النسخة اللي بعمل فيها دلوقتي و بين النسخة القديمة - بستعمل اوبن اوفيس في كتابة الكتاب - .


اضغط على الصورة للتكبير
فرق كبير بينهم ، سنتين مش وقت قليل برده D:
** الجزء ده من الاجزاء القليلة المتشابهة مع النسخة القديمة .
بالمناسبة الكتاب ده كنت عملته في الفترة اللي كنت بنتقل فيها من وندوز لـ جنو/لينوكس ، يعني كان اخر حاجة اعملها على وندوز ، و يا للسخرية ، دلوقتي بكتب على جنو/لينوكس موضوع عن برامج وندوز : )

----------------

نرجع تاني موضوع الغلاف ، لحد دلوقتي مش مستقر على واحد معين ، بس ما زال التصميم اللي عملته عاجبني ، لكن مشكلته انه عليه نسخة معدلة من شعار جتك+ - gtk+ هى مكتبة حرة مفتوحة المصدر و هى اللي مستخدمة في الواجهة جنوم - ، هو الموضوع مفهوش مشكلة لان الكتاب مش هيتنشر رسميا ، انما موضوع الشعارات و الاسماء التجارية ساعات كتير بتعمل مشاكل !
الشعار الرسمي هنا اهه GTK+ logo



بحب جدا الاغلفة البسييييييطة ، بيكون ليها رونق خاص كدا : )
** بالمناسبة ، انا مليش في التصميم بس كانت محاولة و عجبني التصميم D:

------------

عموماً موضوع الغلاف ده بيكون اخر حاجة قبل نشر الكتاب الالكتروني على النت : )
مجرد تدوينة لكسر الروتين : )

المزيد »

البصل - ** محدث .

** تحديث : نسيت الموضوع الاساسي اللي كنت كاتب التدوينة عشانه (دراسة جدوى لمشروع تجفيف البصل) :s

--------

السلام عليكم و رحمة الله و بركاته



مصدر الصورة


البصل من النباتات المفيدة جداً و ليه شعبية كبيرة في طهي ، اغلب الأكلات بتحتوي على البصل و ساعات الثوم كـ أساس للأكلة .
المركز الأول لانتاج البصل بيتنافس عليه الصين و الهند ، و بالنسبة لمصر في بعض الإحصائيات ، مصر في المركز التاسع لأكبر منتجي البصل في العالم - تقريباً مؤخراً بقينا خارج اكبر 10 منتجين للبصل - .

البصل في ويكي بيديا :
- بصل - عربي .
- onion - انجليزي .

- موضوع كويس فيه معلومات عن البصل .

و إذا كان عندك اهتمامات زراعية زيي ، موضوع كويس عن زراعة البصل .
مايجب عمله لإنتاج شتلات بصل خالية من الأمراض


اخيراً ، دي دراسة جدوى عن مشروع تجفيف البصل بشكل تجاري للتصدير ، "دراسة جدوى لمشروع تجفيف البصل و الثوم" ، من موقع "خير اونلاين" ،

و ممكن تحميل دراسة الجدوى في شكل PDF من هـــنـــا

الدراسة اساساً مكتوبة على الورق و متصورة ، عشان كدا في بعض الصفحات مش ظاهرة بشكل كويس بس بشكل عام اغلب المعلومات واضحة .


حد جرب يجفف بصل في البيت قبل كدا ؟ D: ، الموضوع سهل مش صعب ، و مسحوق البصل بيكون ممتاز جداً في تتبيل اللحوم .
تجفيف بعض أنواع الخضر ، ده موضوع من موقع "أراضينا" ، بيتكلم عن تجفيف بعض انواع الخضروات من ضمنها البصل ، التوم و الطماطم ، لو حد عاوز يجرب تجفيف البصل ، نفس الخطوات اللي في الموضوع ، لكن الافضل يكون التجفيف على اشعة الشمس مش في الفرن و برده مش بالملح - دي طريقة تاني لتسريع التجفيف ، لكن على حد علمي بيكون في فقد في القيمة الغذائية بالطريقة دي ! -


-------------

مش عارف ليه بحب البصل الأحمر بالذات ، يمكن عشان ليه نكهة قوية ، أو عشان طعمة مش حاد أوي ، أو يمكن عشان حلقاته القرمزية اللي بتظهر لما يتقطع عرضياً ، مش عارف لكن حقاً انا احبه D: - بالمناسبة البصل الاحمر او اي بصل ملون مينفعش للتجفيف ! -

المزيد »

سنة رابعة ، و عام دراسي جديد .

السلام عليكم و رحمة الله و بركاته

بقالي فترة مكتبتش حاجة مع ان في نيتي كذا حاجة اتكلم عليها بس مليش نفس اكتب !

المهم ،

رسمياً ابتدت الدراسة في مصر من يومين ، جداول المحاضرات نزلت ، و انظمة جديدة اتحطت عشان موضوع انفلونزا الخنازير سواء في المدارس او الجامعات .

حالياً عندنا في كلية الحقوق (جامعة القاهرة) منعوا حضور طلاب الانتساب ، و قصروا امكانية الحضور على طلاب الانتظام ، و قسموا كل مجموعة ل قسمين كل قسم بيحضر اسبوع ، يعني دلوقتي عندنا ست مجموعات تبع سنة رابعة ، تلاتة بينزلوا اسبوع و تلاتة بينزلوا الاسبوع اللي بعده .

بالرغم من اني انتظام و الحمد لله ، بس سنة رابعة هى السنة الاخيرة في كلية الحقوق ، و في مواد محتاجه حضور المحاضرات عشان تتفهم بشكل كويس او بذل مجهود مضاعف في مذاكرة المواد !
بيقولوا انهم هيوفروا المناهج عن طريق التلفزيون على قناتين تعليمتين ، بس برده في ناس مش متعودة على النظام ده و عاوزين يحضروا .

المشكلة اساسا ان في ناس كتير مش بتنزل الجامعة عشان تحضر ، انما بتنزل عشان تتفسح !! و الارخم ان الواحد بيلاقي ناس داخلة المحاضرات تلعب ولا تسمع اغاني او حتى تتكلم مع بعض و مش في دماغهم المحاضرات اساسا ! طب ليه الرخامة و التشويش على الناس اللي عاوزة تفهم ! - معلش برده احنا عددنا كبير اوي في كلية الحقوق و صعب السيطرة على مجرد فيه ألف او ألفين طالب ! -

------

المشكة كمان ان سنة رابعة دي المواد بتاعتها كبيييرة اوي ، خمس مواد كل فصل دراسي و كل مادة كتابين او تلاتة - و ساعات اربعة ! - و كل كتاب فيهم حوالي 300:500 صفحة ، يعني عاوزين مجهود خرافي عشان يخلصوا !

انا اساسا شوفت الجدول اتخضيت من كمية المحاضرات اللي فيه و مدتها - يمكن كمان احد الاسباب ان المواد مضاعفة بسبب اننا اتقسمنا لست مجموعات بدل تلاتة ! -



عموماً ربنا يعدي السنة دي على خير ، و تكون زي السنة اللي فاتت ، لاني فعلاً استمتعت جدا بالسنة اللي فاتت : )
و كمان ربنا يستر على التقدير ، و ميحصلش كارثة ، عشان تقديري الحالي جيد يقترب من الجيد جدا ، و بحاول اوصل للجيد جداً ، و لو حتى على أول درجة في الجيد جداً ، و بالتالي لازم ابذل مجهود كويس السنة دي : )

و بسبب كدا هحاول اخلص كام حاجة على الكمبيوتر كدا قبل ما ابدأ السبات الامتحاني و اذاكر بشكل مكثف .
عشان كدا بدأت في عمل نسخة جديدة من وثيقة/كتاب كنت عملته من سنتين تقريبا و هو "المدخل نحو المصادر المفتوحة" - هنا موضوع عن غلاف النسخة الجديدة لو حد عنده فكرة كويسة تكون بسيطة و معبرة يا ريت يشاركنا بيها - ، و بعد كدا لما تنزل نسخة اوبنتو 9.10 هحدث كتاب "الدليل العملي في استخدام اوبنتو" ، و بعد كدا اشيل الكمبيوتر خالص عشان الامتحانات D:



بس فعلا شعور غريب ، "سنة رابعة" ، اخر سنة ! ، يااااه ، تلات سنين عدوا هوا ، و لسه في جيش و حياة تانية منتظرة الواحد : )

يا رب تكون سنة دراسية كويسة على كل الناس : )

المزيد »

عيد سعيد : )

السلام عليكم و رحمة الله و بركاته


الصورة من : سوالف .

بغض النظر عن اننا بقينا في تالت يوم العيد ، لكن برده يمنعش اكتب تهنئة بالعيد : )



من كام ساعة لسه راجع من فرح احمد المعروف على النت بإسم "مبتدئ" ، المفتري كان عامل الفرح في راس البر O_o - عشان تقريبا زوجته من هناك -
بس هما كانوا مجهزين ميني باص للناس بتوع القاهرة ، بصراحة كان فرح ممتاز جدا ما شاء الله ^_^
مين قال ان الافراح الاسلامية رخمة او كئيبة ؟ : )



الفرح ده عاوز موضوع لوحده ، انا دلوقتي محتاج اناااام : )

و كل سنة و انتوا طيبين ، و ان شاء الله يكون عيد سعيد عليكم جميعاً : )

المزيد »

آه يا قلبي المسكين : (

كل عام و في نفسي الوقت ، يأتي رمضان و تأتي التراويح ، اجد من حولي يخشعون في الصلاة ، تنزل دموعهم و يبكون ، و لكني عيني لا تدمع حتى ، تتلى آيات قد يشيب لها الشعر ، يبكون من حولي ، و الامام لا يستطيع اكمال الآية من تأثره ، احاول التمعن في الاية ، و لكن لا فائدة ! ، و كأن عيني صحراء لم ترى الماء منذ عقود ، و كيف سأبكي و انا لا استطيع الخشوع ، الامام ليس بالبكّاء ، و بالتأكيد كل هؤلاء لا يتصنعون ، بل قد اسمع آيات كنت من قبل ابكي لها ، و لكن الان ؟ لاشيء ، و لا عَبرة واحدة حتى : (


{ ثُمَّ قَسَتْ قُلُوبُكُم مِّن بَعْدِ ذَلِكَ فَهِيَ كَالْحِجَارَةِ أَوْ أَشَدُّ قَسْوَةً }
ماذا جرى ؟ كنت من قبل استطيع الخشوع ، كنت استطيع البكاء ، ماذا حصل لقلبي في السنوات الماضية ؟ ، هل اصبح قلبي كالحجارة ؟ و ربما اقسى حتى : (

آه يا قلبي المسكين ، يا ترى الى متى ؟ : (





اللهم اني اعوذ بك من عين لا تدمع و قلب لا يخشع

يارب

المزيد »

Uget + مقابلة شخصية + حملة .

السلام عليكم و رحمة الله و بركاته





تدوينة ثلاثية على السريع D:

ـ
-----------

# Uget Download Manager .

اول الاسبوع اللي فات انضميت لمشروع Uget - صفحة المشروع على سورس فورج - ، برنامج يو جت مدير تحميل جميل جدا ، بسيط و خفيف و فيه مميزات جميلة جدا و كمان حر و مفتوح المصدر ، و الاجمل انه مكتوب بـ GTK+ ، يعني بيستخدم نفس المكتبات المستخدمة في جنوم - الواجهة الرسمية لعدد من نوزيعات جنو/لينوكس المشهورة زي اوبنتو ، فيدورا ، دبيان ، ريد هات و غيرهم -

طبعا انا مش مبرمج و مليش في البرمجة - بغض النظر عن شوية باش سكربتنج على شوية بايثون - ، لكن مين قال عشان تساهم في البرمجيات الحرة لازم تكون مبرمج ؟ : )
ممكن تساعد باي شكل من الاشكال ، اي طريقة متاحة ليك ساعد بيها ، اكيد مجهودك ده هيستفاد منه ناس كتير : )

مطور البرنامج "Raymond Huang" و معروف على الانترنت باسم plushuang ، الوضع الحالي هو هيهتم بالبرنامج نفسه من ناحية البرمجة ، و انا ههتم بالحاجات التانية المتعلقة بالبرنامج ، او حاجة عملتها ، عمل شعار جديد للبرنامج لان الشعار القديم مكنش ليه دلالة تقريبا ! ، و برده مش انا اللي عملت الشعار ، انا بس نظمت موضوع لجمع الافكار لشعار البرنامج ، و شاركت ببعض الافكار من ضمنها الفكرة الحالية للتصميم ، انما التصميم كان الاخ الفاضل صفوان المعروف باسم saf1 - ما شاء الله عليه عنده حس فني جميل جدا -

و ده الشعار اللي توصلنا اليه

ونفس التصميم مع بعض التعديلات

البرنامج اسمه Uget ، مغنطيس على شكل U ، بيدل على قوة الجذب (التحميل) ، على الاقل فيه فكرة D:

حاليا انا شغال على الموقع البرنامج ، لان تقريبا مكنش ليه موقع فعلي - الموقع القديم مكنش يسر عدو ولا حبيب D: - ، استخدمت تطبيق ورد برس (wordpress) كنظام ادارة للمحتوى ، تقريبا الموقع يعتبر خلص ، مش فاضل غير كام حاجة بسيطة كدا و هيبدأ تشغيل الموقع مع صدور النسخة 1.5 من يو جت ، و ده اللي وصلتله حاليا .

اضغط على الصورة للتكبير

----------------------------

# مقابلة شخصية لوظيفة .
من يومين ، روحت عشان المقابلة الشخصية (interview) عشان شغل دعم فني في شركة كمبيوتر بتاعت استضافة و حاجات زي كدا ، كانت تجربة مفيدة جدا بالنسبة ليا ، بالرغم ان المقابلة مكانتش زي ما انا عاوز ، انما نظراً لان دي تقريبا اول مقابلة شخصية لوظيفة ، استفدت من حاجات كتيرة ، و اخدت بالي من كذا نقطة مهمة .

اتصال الشركة كان بناء على ترشيح احد المعارف اللي شغالين في الشركة ليا ، لشغل الوظيفة - طبعا كنت بعت الـ cv بتاعي قبل ما اروح -
و لاني معرفش مكان الشركة تحديدا ، اول حاجة عملتها بعد اتصال الشركة بيا ، اني روحت لويكي مابيا و بحثت على اسم الشارع اللي فيه الشركة و بعض المعالم المحيطة بيها ، و قدرت اوصل لمقر الشركة بالظبط و ده ساعدني اني اقدر اوصل بسهولة من غير ما اتوه في الطريق ، موقع ويكي مابيا WikiMapia هو موقع خرائط تشاركي ، بنفس نظام الويكي ، اي شخص ممكن يشارك فيه و يضيف اسم مكان هو يعرفه او اسم شارع او اي مَعْلم تاني ، فعلا استفدت من الموقع ده كتير ، و من وقت للتاني بشارك فيه بإضافة اسماء الاماكن و الشوارع اللي اعرفها .

وصلت للشركة بسلام و الحمد لله ، و لقيت واحد صاحبي كنت متوقع الاقيه لاننا تقريبا نفس المستوى في المعرفة ، و لاننا برده نعرف نفس الشخص اللي رشحنا للشغل ده D:
الرخم في الموضوع ان اليوم ده شعري مكنش ليه مزاج يتسرح !! D: ، جيبته في جميع الاتجاهات و مش عاوز يتسرح كويس برده !! ، في الحالات اللي زي دي كنت بلبس عليه كاب و خلاص - سكلتون و الكاب الاحمر علامة مسجلة D: - ، بس اكيد مش هروح مقابلة شخصية و انا لابس كاب يعني ! ، في الاخر سرحته اي حاجة و نزلت D:


المهم ، قعدنا حوالي 10 دقايق ، بعدين هو دخل الاول لانه كان موجود الاول ، بعد ما خرج دخلت انا : )

من قبل ما اروح اساسا و انا عارف ان امكانية اني اشتغل في مكان بدوام كامل قليلة جدا ، و ده بسبب ظروف الدراسة - ده بغض النظر عن موضوع الجيش يعني - ، لاني باخد اجازة من كل حاجة و حتى الكمبيوتر في البيت ، لمدة شهرين او شهرين و نص كل تيرم !! ، يعني على اقصى تقدير لو اشتغلت من اول الاجازة اكتر مدة متوصالة هقدر اشتغلها هى خمس شهور بس !!
لكن مع ذلك كنت واخد الموضوع بكل جدية ، لاني اكيد هطلع بحاجة مفيدة من التجربة دي حتى لو مشتغلتش ، و حتى حاجات مفيدة على المستوى الاجتماعي ، زي تقبل فكرة الرفض ، و انهم مش هيرفضوك عشان شخصك انما هيرفضوك عشان انت مش مناسب للوظيفة دي تحديدا - ان شاء الله قريب ناوي اكتب موضوع عن "الخوف من الرفض" : ) -

المقابلة نفسها كان لطيفة جدا ، و مفهاش اي توتر ، و في الاول سأل اسئلة عادية زي ساكن فين ، بتدرس ايه ، مجموعك ، بتحضر محاضرات الجامعة ولا ﻷ - طبعا السؤال ده ليه علاقة بالشغل بشكل عام - ، و شوية حاجات تانية كدا .
قبل ما اروح محضرتش اي كلام عشان اقوله ، و كنت متوقع انه هيسأل على حاجات معينة ، لكن اللي حصل انه مسألش على حاجة بعينها ، و قالي اتكلم عن الحاجات اللي تعرفها ! ، و ده خلاني مش مرتبك انما مكنش في حاجة معينة في دماغي ، فكنت بحاول افتكر كذا حاجة اعرفها و كذا حاجة اتعاملت فيها ، بس برده مقدرتش اقول كل حاجة - منها حاجات مهمة و ليها صلة بالشغل ! -

اللي فهمته من جزء ده انك ببساطة المفروض تكون رايح المقابلة عشان تتفاخر ، مش التفاخر في معناه السيء ، انما مفيش مجال للتواضع او تهميش اي شيء انت عملته ، قول كل حاجة كبيرة و صغيرة انت عملتها او جربتها سواء كانت مرتبطة بالوظيفة بشكل مباشر او غير مباشر .

طبعا مش محتاج اتكلم عن الثقة بالنفس ، ممكن تكون متوتر نوعاً ما و ده شيء طبيعي خصوصاً اذا كانت المقابلات الاولى او وظيفة مهمة بالنسبة ليك ، لكن اكيد من اهم الاشياء انك تكون واثق من نفسك بشكل كويس : )

كان من ضمن الاسئلة ، سؤال عن مدة الاجازة اللي ممكن تاخدها خلال السنة ، قلته بكل وضوح و بدون اي تلاعب ، ان الامتحانات لوحدها بتاخد حوالي شهر كل تيرم ، و انا بحتاج شهر او شهر و شوية قبل كل امتحانات عشان اعرف اذاكر بشكل كويس ، يعني المجموع اربع شهور !! ، تقريباً هو تفاجئ بحاجة زي كدا و لسان حاله بيقول ازاي هتشتغل كدا D: ، ف زي ما قولت في الاول ، انا متوقع ان نسبتي قليلة جدا الحصول على الشغل ده - على الاقل بدوام كامل - بسبب موضوع الدراسة ، و خصوصاً ان السنة اللي جاية دي الرابعة و الاخيرة و لازم اركز فيها كويس جدا ، و بعد كدا لما اخلص ابقى اعمل اللي انا عاوزه : )

في حاجات تانية كنت اعوز اكتبها بس نسيتها !! ، لو افتكرتها هبقى ارجع اعدل التدوينة : )

----------------------------

# حملة "أوقف العادة السرية" .
بغض النظر عن اني فعلا مش بحب كلمة "حملة" ! ، لان كل شوية تلاقي كام واحد عاملك "حملة" عن مش عارف ايه كدا !

المهم ، محمود و المعروف بإسم "محب سينين" ، عامل موضوع جميل عن العادة السرية ، و اضراها و ادلة تحريمها و معلومات عنها .

يمكن الموضوع بالنسبة ليا مش جديد تمامأً ، لاني قبل كدا عملت بحث مكثف عن كل ما يتعلق بالعادة السرية على سبيل العلم بالشيء .
تعليقي على الموضوع ، هتلاقي مواضيع و ابحاث علمية بتقول ان الموضوع مش مضر و مفيد كمان ! (كل او اغلب الابحاث العلمية بتتكلم عن القيام بيها بدون افراط ) و حتى اراء فقهية بتقول ان العادة السرية هى فقط مكروهه ، او مباحة عند الضرورة فقط ,او حتى مستحبة ! ( مفيش رأي فقهي بيقول باستحبابها ، هى مباحة عن الضرورة فقط ، عذرا غلطة مني ) .

الموضوع فيه كلام كتير و ز ما قولت في كذا رأي فقهي في الموضوع زي مثلاً انها مباحة عند الخوف من الوقوع في الزنا - الخوف من الوقوع في الزنا لازم طبعا يكون مبني على اسباب جدية و حقيقية ، مش مجرد ان واحد يشوف واحده غير محتشمه في الشارع يقول انا خايف اقع في الزنا ! - ، و كمان في اشياء ليها فوائد و لكن فوائدها لا تقارن بأضرارها !!

لكن اللي انا متأكد منه انه مش من المعقول نحط النار جنب البنزين و نقول يمكن متحصلش حريقة !!

العادة السرية زي الادمان بالظبط ، مش هينفع اقول الهروين لو اتاخد على جرعات تقليلة بشكل متباعد مش هيعمل حاجة بل مفيد كمان !! ، لما بتاخد جرعة في التانية في التالتة مش هتقدر تمنع نفسك ، و اي واحد بحث عن الموضوع ده اكيد هيكون عارف ان في ناس بتفضل تمارسها حتى بعد الجواز !!!! ، يعني غالبا الوضوع بيتحول لادمان في الاخر !

المهم يعني ، اقروا الموضوع ، و برده ابحثوا عن الاراء التانية اللي بتتكلم عن نفس الموضوع عشان تكونوا عندكم فكرة كاملة : )
و زي ما بيقول في بداية الموضوع

من الواقع المر الذى نعيشه والذى لا ينبغى السكوت عنه بسبب الحياء وبسبب المشكلات التى تسببها تلك الممارسة الممقوتة كان يجب الكتابة عنها وبيان مخاطرها وأضرارها فليس من المفترض أن يمنع الحياء الخير

مش عارف ليه الكلام عن الموضوع ده بالذات بيفكرني بموضوع "حزام العفة" (chastity belt) ، و ادوات منع الاستمناء" عند الرجال (male anti masturbation device) !! ، ادوات كانت بتستخدم من القرن الـ 15 الى اواخر القرن 18 في اوربا - مفيش روابط ، لان كل الروابط اللي بتتكلم عنها ملغومة ! -

المزيد »

من هنا و هناك .

السلام عليكم و رحمة الله و بركاته

# لو سمحت اغلق الـ Ad Blocker !
موضوع كتبته عن استعمال اضافات منع الاعلانات ، و خصوصاً اضافة adblock plus بتاعت الفاير فوكس ، الاضافة فايدتها منع اي اعلانات في المواقع اثناء التصفح ، سواء اعلانات نصية ، صور ، سكربتات ، الاضافة ممتازة و قوية جدا و بتمنع كل حاجة تقريبا .
لكن من ناحية تانية المفروض نستعمل اضافة زي دي بانصاف و منكونش انانيين ! ، كتير من المواقع و المنتديات - سواء عربية او اجنبية - مش بيكون ليها مصدر دخل ثابت ، و بتعتمد على العائد من الاعلانات - مع انه مش كبير اوي ! - و ناس كتير بتستخدم الاضافة و مش بتراعي المواقع اللي زي دي ! كملوا الموضوع على الرابط و هتلاقوا توضيحات اكتر : )

# 400 سنة على توجيه اول تيليسكوب للسماء .
انهارده بيحتفلوا بمرور 400 سنة على توجيه جاليليو جاليلي اول تلسكوب للسماء ، و زي ما هو معروف ان جاليلو من اوائل الناس اللي استعملت التليسكوب - فعليا مخترع التليسكوب هو هانز ليبرشي Hans Lippershey - ، و على حسب ما افتكر ان جاليلو هو اول من نظر للشمس عبر التليسوب بأن جاب قطعة زجاج و عرضها للنار و اصبحت سودا اللي خلاه يقدر يبص للشمس بشكل مباشر عن طريق التليسكوب .
و في مجال الفلك ، و من توابع استعماله للمنظار ، كان جاليلو واحد من مؤيدي نظرية ان الارض هى اللي بتدور حول الشمس مش العكس ، و اللي بسبب رأيه ده اتهمته الكنسية بالهرطقة ، لان افكاره مخالفه للافكار الموجودة في الكتاب المقدس ، و اجبروه على الاقرار بأن الارض مركز الكون ، و اتسجن و اتنفى لاخر عمره بسبب الموضوع ده .
جاليلو اتولد في بداية عصر النهضة في اوربا ، و كان ليه اسهامات كتير مش بس في الفلك انما كمان في الهندسة ، زي تجربته المشهورة لما طلع على برج بيزا المائل و رما حجرين مختلفين في الحجم واحد اكبر من واحد ، عشان يثبت ان تأثير عجلة الجاذبية على الجسمين واحد ، و ان الاتنين هيوصلوا مع بعض في نفس الوقت مش زي ما كان سائد ان الجسم الاتقل هيوصل الارض قبل الجسم الاخف .

بعض المعلومات المخزنة في ذاكرتي من كتاب عن العلماء قريته و انا صغير D:
و دي معلومات اكتر عن جاليلو من ويكي بيديا :
جاليليو جاليلي - ويكيبيديا .
Galileo Galilei - wikipedia



# تقرير سريع عن كتاب: No Logo .
الاخ عبدالله المهيري كتب في مدونته حاجة زي تقرير سريع بعد ما قرأ الكتاب ، تدوينة جميلة جدا و فيها معلومات ممتازة ، بجد لازم تشوفوها .
من زمان جدا و انا بكره فكرة العلامات التجارية - من المرحلة الاعدادية و قبل ما استخدم الكمبيوتر بشكل فعلي اساسا ! - ، مش بكره العلامة التجارية في حد ذاتها ، انما بكره فكرة ان الناس بتشتري الشيء لعلامته التجارية ، بغض النظر عن اي حاجة تانية !! ف مش غريب اني مش بحب اسلوب دعاية شركة ابل ! و الناس اللي كل شوية بتتفاخر فقط لانهم بيستعملوا كمبيوتر عليه علامة التفاحة ! ، ابل عندها منتجات كتير كويسة و ممتازة ، لكن عندها برده طرق كتير عشان تتحكم في المستخدمين اولها استغلال نزعة التميز ، و تانيها حاجة زي ادارة الحقوق الرقمية Digital rights management (DRM) ، و حاجات تانية !

اقروا التدوينة ، بجد ممتازة جدا ، و ان شاء الله في اقرب فرصة ناوي اعمل موضوع عن ادارة الحقوق الرقمية و تأثيرها على حرية المستخدمين : )



# مراكش الحمراء، مدينة المرابطين والموحدين .
من فترة كبيرة و انا بتابع مدونة محمد من المغرب ، بشكل اساسي هى مدونة شخصية ، بيكتب فيها اي حاجة يحبها ، في تدوينات كتير جميلة و استمتعت بيها جدا ، و دي واحدة من التدوينات الرائعة و فيها معلومات كتير حلوة عن مراكش في المغرب ، و بما اني بحب جدا الجزائر و المغرب ، من عادات و تقاليد و طبيعة و معالم و حتى الاكلات الشعبية D: ، و الاهم من ده ، اهلها نفسهم ، اعرف كذا شخص على النت جزائري و مغربي ، بجد ناس محترمة جدا و من اكتر الناس اللي بعزهم على الانترنت - عموما خلينا فاكرين ان اي بلد فيها الحلو و فيها الوحش ، و لو اتعاملت مع واحد مش كويس من البلد دي مش المفروض تاخد انطباع سيء عن البلد دي -
المهم ، اقروا الموضوع : )



# IE6 No More !
حملة للتخلص من انترنت اكسبلورر 6 !! ، كفاية بقى الزفت بلورر ده ! ، متصفح من العصر الحجري و متخلف عقليا ، مليان مشاكل ، مش ماشي على اي معايير قياسية ، مطلع عين مطورين المواقع ، كل ده و لسه في ناس بتستعمله !! و نظرا لان انترنت اكسبلورر 7 كان تقيل و غبي برده ف ناس كتير لسه بتستعمله ، و مع انترنت اكسبلورر 8 اتغير الحال شوية بس اساسا عيلة اكسبلورر كلها عيلة متخلفة عقليا !! حتى انترنت اكسبلورر 8 اللي لسه صادر من قريب غبي و بليد في موضوع المعايير القياسية ! جايب 20 من 100 في اختبار acid3 بتاع المعايير القياسية ، في حين ان كذا متصفح جايب 100٪ ، و اقل متصفح جايب 93٪ !! ، يعني فرق شاسع !!! ، و عن نفسي انا عاوز اتخلص من كل الانترنت اكسبلورر ، حتى لو عملوا انترنت اكسبلورر 21 ، هيكون غبي برده :@

الحملة اساسا موجهه للتخلص من انترنت اكسبلورر 6 ، الجميل في الموضوع ان في مواقع كبيرة و مشهورة كتير بتساند الحملة دي ، و كمان شركة جوجل كانت عامله اعلان في موقع يوتيوب بنفس المضمون ، شوفوا المواقع اللي بتساند الحملة في الصفحة الرئيسية .
عندك موقع و عاوز تشارك ؟ ، هتلاقي اكود جهازه في موقع الحملة ، كل ما عليك انك تنسخها و تضيفها في موقعك ، و هيظهر بانر في موقعك بينبه الشخص ان عليه تحديث المتفح بتاعه عشان قديم .
انا عن نفسي عملت شوية تعديلات بسيطة في السكربت ، و هكتفي بتلات متصفحات ، فاير فوكس ، كروم ، اوبرا ، و هخلي التنبيه يظهر لكل مستخدمي انترنت اكسبلورر !! ، ان شاء الله يومين و هعمل موضوع عن السكربت ده .



# مؤسسة البرمجيات الحرة تبدأ "GNU Generation" .
مؤسسة البرمجيات الحرة بدأت مشروع / مجموعة اسمها نشء/جيل جنو ، و دي مجموعة بتستهدف الشباب الصغيرين من سن 13 لـ 18 سنة ، لتعريفهم بفكر البرمجيات الحرة ، و تشجيعهم على انشاء و تطوير برامج حرة ، و مش بس بتستهدف الشباب اللي مهتم بالبرمجة ، انما كمان بتوضح طرق المساهمة في البرمجيات الحرة زي التصميم ، التوثيق ، و حتى طرق نشر و تأييد فكر البرمجيات الحرة .

يا رب اكون حي لما يعملوا FSFarabic.org : )

------------------

كفاية كدا دلوقتي D:

المزيد »

كل سنة و انتوا طيبين : )

السلام عليكم و رحمة الله و بركاته

مصدر الصورة

------------------

كل سنة و انتو طيبين و ان شاء كل الناس تكون بصحة و سلامة : )

ان شاء الله اول يوم رمضان بكرة ، و الجميل في الموضوع ان تقريبا كل الدول العربية - بغض النظر عن ليبيا ! - ، و كمان معظم الدول الاسلامية هتبدأ الصيام بكرة ^_^

الواحد بقاله كتير محسش الاحساس ده : )

و ان شاء الله يكون رمضان كويس ، و نقدر نستفاد بكل دقيقة فيه ، ولا اصدق من قول الرسول صلى الله عليه و سلم ، (( عن أبي هريرة - رضي الله عنه - أن رسول الله - صلى الله عليه وسلم - قال: "من قام رمضان إيمانًا واحتسابا غُفر له ما تقدم من ذنبه" ، متفق عليه . ))

---------

و حاولوا تبعدوا عن المسلسلات الشريرة و المغرية اللي بتتعرض في حرب مسلسلات رمضان D:
و كمان براحة على جهازكم الهضمي D:


كل سنة و انتم بخير ، و شكرا لكل اللي سأل عليا و اتصل بيا : )

المزيد »

عدنا ، و رحلة سعيدة ^_^

السلام عليكم و رحمة الله و بركاته


الاسبوع اللي فات كان اسبوع جميل جدا ، كنت مسافر مع العائلة للتصييف و الاستجمام D:

على المستوى العائلي ، تقريبا بقالنا اكتر من اربع سنين مروحناش مصيف مع بعض ! ، لاسباب كتيرة سواء عائلية اجتماعية او حتى ميكانيكة ، لانننا مش متعودين على المواصلات في السفر و كان اعتمادنا بشكل كامل على العربية ، و العربية كانت - و ما زالت - بعافية شوية D: ، بصراحة عن نفسي بفضل الجو العائلي عن الرحلات الشبابية ، بس برده من وقت للتاني بيكون شيء كويس ان الواحد يروح مع اصحابه في رحلة - و لكل واحد فيهم مميزاته و عيوبه : ) -

دي فعليا المرة الاولى اللي اروح فيها الاسكندرية ، بغض النظر عن اني روحت السنة اللي فاتت يومين مع واحد صاحبي ، انا شخصياً كنت مخنوق من المذاكرة ، عمال اذاكر بقالي كتير و كتب مش عاوزة تخلص !! ، انا و واحد صاحبي ضربت في دماغنا نروح اسكندرية ننزل البحر ! ، و فعلا تقريبا معملناش اي حاجة غير اننا نزلنا البحر ، و مروحناش في مكان يذكر !

اللطيف في الموضوع بقى ان الاسبوع ده كان متظبط بطريقة ممتازة ، كان بالنسبة ليا مثالي اكتر من اللازم ! - و فعلا الاسبوع مكتملش بشكله المثالي ! -

يعني ، هروح البحر اصييف و استمتع مع العائلة ، و كمان في نفس الوقت كذا واحد من اصحابي كانوا في الاسكندرية ، و قضيت معاهم يوم ، و كمان كلمت ناس اعرفهم من منتدى مجتمع لينوكس العربي ، بيستخدموا نظام جنو/لينوكس ، و قابلتهم و كانت قعدة لذيذة فعلا ، مع اني اتفقت معاهم في مكان ممنوع الوقوف فيه اساسا هههههههههه - ان واحد منهم يعترض على المكان ولا يقول ايه حاجة ، مفيش D: - ، لكن كذا واحد عرف يوصل ، ده بغض النظر عن الناس اللي اعتذرت بعد ما تأكيد حضورهم - الشعب المصري هو الشعب المصري ، في حكاية المواعيد دي ميتواصش هههههه - ، شويه كدا و هروح اشردلهم على المنتدى D: - و كان في رحلة للبحر نظمتها جمعية الروان الخيرية ، و حضرت معاهم من اول اليوم لاخره ^_^ ، و كمان كنت هقابل ناس كانوا جيرانا من زماااااان جدا - اكتر من 20 سنة ، انا فعليا عشت معاهم فترة من طفولتي : ) - ، ولكن للاسف زي ما قولت الوضع كان مثالي اكتر من اللازم ، و يوم ما جيت اعدي عليهم ، لقيتهم مسافرين مطروح لمدة اسبوع ! و معرفتش اشوفهم حتى - بتوع اسكندرية دول بيدلعوا على فكره ! ، يوم ما يصيفوا بيروحوا سيناء ، او مطروح D: -

لكن في المجمل كان اسبوع جميييل جدا ، و استمتعت على الاخر ^_^

--------------

نزلنا - انا و العائلة - في شاطئ النخيل (منطقة العجمي) ، العجمي منطقة غرب الاسكندرية ، عند الكيلو 21 تقريبا ، عشان كدا الاحياء و الشاطئ اهدى بكتير من الاسكندرية نفسها ، و كنا قريبين من البحر بنشوف البحر من البلكونة - اساسا عرض المنطقة مش كبير اوي - ، اول يومين مية البحر كانت ممتازة جدا و صافية ، بس للاسف بعد كدا المية بقت مليانة شوائب كتير - نباتات بحرية - ، و رجعت بقت كويسة على اخر الاسبوع ، و لحسن الحظ اننا مروحناش الكام يوم دول ، انا بس عديت على المية و بعد ما نزلت شوية ، لقيت الموضوع مش نافع خالص .

بس انا مكنتش عاتق البحر يعني ، تقريبا نزلت المية خمس ايام و نص من اصل سبعة D: ، النتيجة طبعا اسمرار شديد ، و جلدي اتقشر على نطاق واسع D: ، بس بجد بقالي كتير محستش بالاحساس ده - بما اني من ذوي البشرات البرونزية موضوع التعرض للشمس و تقشر الجلد ده مش مؤلم اوي -

بس الرخم في الشواطئ اللي فيها ناس بشكل دائم ، ان مفهاش كائنات بحرية كتير ! ، يعني في المكان اللي كنت فيه مكنش في غير سمك صغير بيسموه شراغيش (المفرد شرغوش) ، يعني كان نفسي الاقي اي كائنات تانية ، مثلا كابوريا / سلطعونات ، نجوم بحر ، قناديل ، او حتى اي كائن تاني غير السمك !! ، السنة اللي فاتت روحت رحلة للبحر في راس سدر ، و مسكت كابوريا ، و نجمتين بحر ، و كان في بلح بحر و حلزونات بحرية كمان ، بس رجعتهم تاني للمية : )

المهم بعد بحث سريع على الانترنت ، عرفت بالظبط ايه هى الشراغيش دي ، انا لقيت اسمين بس تقريبا هما الاتنين نفس المعنى الفرق في اللغة او المنطقة او حاجة زي كدا
Diplodus sargus cadenati - Moroccan white seabream

و ده موضوع في منتدى ، واحد عامله - اسمه الرمزي في المنتدى على نفس اسم السمك ده D: - ، و بيتكم على عن انواع السمك في الاسكندرية ، و منهم الشراغيش - الموضوع جميل جدا و فيه معلومات حلوة -
@@ طرق صيد الاسماك في الاسكندرية @@ ، الجزء الخاص بالشراغيش .

و دي صورة للسمكة - بس اللي شوفتهم اصغر من كدا -
الصورة من FishBase.org
اضغط على الصورة للتكبير

------------

- مقابلة لينوكساوية :
في اليوم الرابع ، على المغرب تقريبا ، قابلت بعض الناس اللي كلمتهم ، كانت قعدة ممتعة جدا ، بعد ما اتعرفنا على بعض ، قعدنا على سور الكورنيش و عيشنا ، قعدنا نتكلم في حاجات كتير جدا ، اغلبها عن الكمبيوتر ، جنو/لينوكس ، البرمجيات الحرة و المفتوحة المصدر ، و حاجات تانية كتير ^_^ ، من اللطيف ان الواحد يتعرف على ناس على ارض الواقع ، و خصوصاً الناس المشتركين معاه في نفس الاهتمامات : )

-----------

- يوم مع الايتام :
جمعية الروان الخيرية ، نظمت يوم على شاطئ الاسكندرية للاطفال الايتام ، و طبعا كانوا محتاجين عدد من المتطوعين للاشراف و التنظيم في اليوم ده ، انا كدا كدا كنت ناوي اشارك معاهم و اطلع معاهم من القاهرة ، لكن بما ان اليوم ده كنت في الاسكندرية ف روحت على مقر الجمعية على طول ، و الشكر لمواقع الخرائط زي WikiMapia.org ، اللي عن طريقه عرفت اوصل لمقر الجمعية في الاسكندرية بكل سهولة مع اني عمري ما روحته قبل كدا .

اليوم ده برده كان جميل جدا ، الاطفال لعبت و استمتعت بالبحر ، و انا شاركت في التنظيم و استمتعت ، اتعرفت على ناس جديدة ، و شوفت ناس بقالي كتير مشفتهمش ، يعني استفادة و استمتاع من كل النواحي : )
و الحمد لله مفيش حد تاه ولا حصله حاجة D:

------------

- مقابلة لم تتم :
الشيء المحبط في الاسبوع ، كنت مخطط لمقابلة ناس جيرانا من زمااااان جدا ، بس للاسف ، مكلمتهمش اول ما وصلت الاسكندرية ، و لما اتصلت بيهم ، لقيتهم مسافريين يصيفيوا ، اسبوع في مرسى مطروح - ما البحر جنبهم و خلاص D: - ، في الحقيقة الغلط مني ، المفروض اني كنت اكلمهم اول ما اوصل ، بس مجاش في بالي اي تأخير ممكن يوصل لمدة اسبوع !

شعور غريب انك تقابل حد مشفتهوش من 15 سنة - انا اساسا عمري كله 20 سنه ! ، يعني اتربيت معاهم فترة و اوعى ليهم - ، يا ترى بقوا عاملين ازاي ؟ ، و احوالهم ايه ؟ ايه التغير و ايه اللي فضل ثابت ؟ ، حاجات كتير بتيجي في دماغ الواحد : )

---------------------------------

بعد الاسبوع ما خلص رجعت يوم السبت بلييييل خالص على 12 او 1 ، بس فعلا زي ما بيقولوا
no place like a home

: )


----------

# ملحوظة على جنب : الرسمة اللي في اول الموضوع ، كانت واحده من محاولاتي لرسم شخصية لطيفة و التعديل على ملامحها ، الشخصية هى "سلمى" من بنين و بنات ، على موقع اسلام ويب .



موقع بنين و بنات بيقدم معلومات و ارشادات اسلامية للاطفال بطريقة جميلة جدا و تفاعلية باستخدام الفلاش و المؤثرات الصوتية ، اخواتي الصغييرين بيحبوا الموقع و الشخصيات اللي فيه جدا ^_^

بالنسبة للرسمة ، كنت بحاول اعمل شوية تغييرات في ملامح الشخصية ، بجرب كذا اسلوب عشان كدا الصورة مش متقنة اوي - زاوية الايد المرفوعة مش مظبوطة خالص - و مش شبه الشخصية الاصلية اوي - بس بالنسبة ليا ما زالت لطيفة - ، و دي الصورة الوحيدة المتاحة على الكمبيوتر حاليا : )

المزيد »