ملخص ١٣\٢\٢٠١٤

هممممم مكتبتش بقالي فترة، انهاردة رايق وأعتقد إنه فرصة كويسة للكتابة :-)


- لقاء لينكساوي جداً (17 ديسمبر 2013)
يوم كان مميز جداً، روحت فيه قفير لابز (وقبل ما حد يسألني هو إيه قفير لابز ده شوف الفيديو في الموقع بتاعهم)، قابلت عدد من الأصدقاء وقابلت ضياء رضوان لأول مرة، واللي كان واحد من الناس اللي عرفهم عن طريق الإنترنت فعلاً حابب إني أقابلهم على أرض الواقع.

التجمع كان لنقاش تقني عام ولإطلاق النسخة الجديدة Fedora 20 خصوصاً (ومش عارف مين اللي مفهم الناس إن توزيعات لينوكس ضد بعد D:)
وكان لابد من تذكار مميز ليوم مميز زي ده :-)

صورة جماعية للمشاركين، بالإضافة لفلاشة ريد هات ودبوس وستيكر فيدورا :-)

- إيفنت Mozilla Power '13 ـ (20 ديسمبر 2013)
يوم 20 و 21 ديسمبر 2013 كانوا يومين مميزين جداً، قامت فيه مجموعة Mozilla Egypt بعمل احتفالية عن موزيلا الرائعة من نشاطات وبرمجيات مميزة في الجامعة البريطانية في مدينة الرحاب/القاهرة.

اليوم الأول كان لكل الناس، اليوم التاني كان للمطورين بشكل خاص وفيه كلام عن تقنيات الويب ونظام Firefox OS الرائع.

كنت من ضمن المتحدثين في اليوم الأول، كان في فقرات عامة بيحضرها كل الناس في قاعة كبيرة، وبعد كدا مجموعات (ما بين 5 لـ 8) بتشتغل على التوازي، أنا كان ليا مجموعة بتتكلم عن البرمحيات الحرة وموزيلا كنموذج لها.

باقي الصور على فيس بوك.

كان يوم مميز جداً بالنسبة ليا، استمتعت وقابلت عدد كبير من الناس لأول مرة، بالرغم من إننا نعرف بعض على الإنترنت من فترة طويلة بعضهم تمتد لسنين! مثلاً زي البرنس الكبير مصعب اللي قعدنا نخطط 20 مرة إننا نتقابل وكل مرة منعرفش نظبط يوم مشترك D: وطبعاً الثلاثي البرنس زي ما بحب أسميهم D: ـ عمرو صبحي، عبد الله ضياء، ومحمد الشرنوبي.

خلصنا اليوم ورجعنا لوسط البلد وطبعاً ميتين من الجوع، قولنا نجرب مطعم جديد، ووقع الاختيار على "Pastaweesy" في المهندسين، المكان صغير وحميمي، وبيعمل مكرونات مميزة جداً ... أنا مش هتكلم كتير بس فعلاً لازم يتجرب!


- أكل ماليزي وشهادة عضوية أوبنتو .. رائع! (24 ديسمبر 2013)
كان يوم مزدوج، قررنا أنا وصديق العزيز محمود طاهر إننا نجرب مطعم ماليزي -وكان أول مرة نجرب أكل ماليزي في الحقيقة- كان في محل قريب مننا في الحي السابع في مدينة نصر اسمه Mutiara، موتيارا هو زيه زي كتير من محلات الأكل الشرق آسوية في المنطقة دي، غالباً بيكون نتيجة طلاب جايين يدرسوا في جامعة الأزهر وبيفتحو محل لمساعدتهم في المصاريف.

موتيارا أقرب لمطعم شعبي منه للمطاعم في المنطقة ده، لكن في الحقيقة أكله جميل وطعمه رائع! أكلنا شوربة تام يام وجمجوم وشوية حاجات تانية أنا مش فاكر اسمها لكن كانت لذيذة D:

في آخر اليوم لقيت حد بيتصل بيا من البيت وبيقولي إن في مغلف جاي ليا من انجلترا! قعدت أفتكر كدا شوية، وافتكرت إن في يوم 6\9\2013 طلبت شهادة عضوية أوبنتو اللي كنت أخدتها يوم 4\1\2013 (واللي اكتشفت دلوقتي إني نسيت أكتب عنها في المدونة!)

Ubuntu Official Ubuntu Membership means recognition of significant and sustained contribution to Ubuntu and the Ubuntu community.

عضوية أوبنتو الرسمية (Official Ubuntu Membership) هي عضوية بتمنح للأشخاص اللي ليهم نشاط أو مساهمات مميزة لأوبنتو وخصوصاً مجتمعياً وبيتم منحها بعد مقابلة على الإنترنت مع بعض أعضاء مجلس أوبنتو. وقدمت ليها السنة اللي فاتت وأخدتها :-)

ودي صور الطرد والشهادة ^_^

- تابلت 7 بوصة! (31 ديسمبر 2013)
في آخر ساعات في سنة 2013 قررت أنزل أشتري تابلت بعد عدة محاولات لشراء Nexus 7 2013 واللي كنت قررت شراؤه من أمريكا لإن سعره في مصر مبالغ فيه بشكل كبير! لكن كالعادة تأتي الرياح بما لا تشتهي السفن ... بعد ما كان من الممكن من كام شهر ألاقي 5 من أصدقائي برا البلد وراجعين قريب، اللي رايح أمريكا واللي رايح أوروبا واللي رايح الصين، مش لاقي ولا واحد جاي قريب D:

في النهاية بعد عدة مقارنات قررت شراء Lenovo IdeaTab A3000 واللي كان بيحقق أفضل إمكانيات في مقابل السعر.

الجهاز كدا بقاله أكتر من شهر معايا، جهاز كويس جداً في الأداء، عيبه الوحيد الإكسسوارات الخاصة بيه مش متوفرة في السوق!! طبعاً الحل استعمال إكسسوارات منتجات أخرى (أقرب جهاز ليه هو Samsung Galaxy Tab 2 7.0 P3100) بس هيبقى في مشاكل زي الكاميرا هتبقى متغطية وأشياء من هذا القبيل ... لدرجة إني كنت بفكر أطلب حاجاته من أمازون أنا وعدد من الأصدقاء!
عموماً، كنت عملت جزء عن بعض أفضل البرامج اللي جربتها على الأندرويد ... الشيطان بيعلب في عقلي دلوقتي إن على غرار كتاب "دليل البرمجيات الحرة مفتوحة المصدر لويندوز" أعمل كتاب تاني اسمه "دليل البرمجيات الحرة مفتوحة المصدر لأندرويد" D:


- ريجكس وسوشي! (8 يناير 2014)
يوم مزدوج آخر، عملت سيشن سريعة في الشغل عن Regex (كنت كتبت قبل كدا مقال بعناون "استخدام Regular Expression في تهيئة النصوص." مفيد جداً لأي حد حابب يبدأ يتعلم الريجكس.)، بعدها بليل قبلت بعض الأصدقاء اللينوكساويين في مطعم ياباني، وجربنا قدر مهول من السوشي D:

المطعم اسمه Tsunami Sushi في الزمالك بالقرب من مكتبة ديوان، يعتبر أول مرة أجرب سوشي بشكل فعلي وبالتنوع ده، وطبعاً كما أغلب مطاعم السوشي كمية الأكل قليلة والسعر كبير، بس كانت تجربة ممتازة والأكل كان ظريف جداً.


- البرنس ومقابلة صديق قديم جديد (14 يناير 2014)
لإن رضا البطن أهم من رضا الناس .. ولإنك لما بتطلع من عنده بتحس بسعادة غامرة بغض النظر عن تضاعف حجم معدتك مرتين أو تلاتة .. ولإن برنس ليه احترامه D:

كانت تجربة مطعم "البرنس" (اسمه كدا للي ميعرفهوش) المشهور في امبابة مع عصابة الشر السابقة من اللينكساويين D:
أعتقد إن أي واحد يعرف مطعم البرنس هيكون عارف إنه مش محتاج كلام كتير يعني D:

لكن المميز في اليوم ده بالإضافة لمقابلة الأصدقاء اللينكساويين والأكل في البرنس، إن قابلت إبراهيم محمود بدون أي تخطيط، وهو واحد من اللي عرفتهم لسنين على الإنترنت ونظراً لإنه ساكن في مدينة الأقصر فمكانية لقائنا كانت محدودة جداً، لكن كان مؤخراً كان في القاهرة وجه اللقاء اللينكساوي البرنسي ده D: وده كان شيء ممتاز جداً في الحقيقة، وعقبال المرة الجاية لما أقابله في الأقصر :-)


- في المنصورة (21 يناير 2014)
للتوثيق يعني، كنت في المنصورة اليوم ده بغض النظر كنت بعمل إيه :-)


- ٣ شهور على كتاب دليل البرمجيات الحرة مفتوحة المصدر (23 يناير 2014)
يوم 23 يكون عدى 3 شهور على الإصدار التالت من كتاب "دليل البرمجيات الحرة مفتوحة المصدر" واللي كان واحد من الحاجات اللي أنا سعيد إني عملتها :)

أكتر من 8000 تحميل مباشر، أكتر من 2000 شير الشبكات الاجتماعية المتنوعة زي فيس بوك، تويتر، جوجل بلس، يعني بواقع حوالي 22 شير في اليوم، وتقييم 4.44 من أصل 5 نقط على جودريدز ... والأهم إشادة من قطاعات واسعة من الناس سواء مختصين أو قرّاء عاديين :‑)

بجانب الأهداف الرئيسية للكتاب، في هدف مهم في كل الكتب اللي بعملها، إن البرمجيات الحرة مفتوحة المصدر قادرة تنافس في كل المجالات، العبرة ديماً بالشخص اللي بيستعملها أكتر من البرامج نفسها، برمجيات مميزة قادرة تطلع مواد مميزة :)


- لقاء على موقع أضف (12 فبراير 2014)
امبارح اتنشر حديث ليا على موقع أضف، نقدر سميه لقاء صوحفي صغير كدا D:

كل يوم، يختار المزيد والمزيد من الأشخاص الانتقال لاستخدام البرمجيّات الحرّة مفتوحة المصدر بدلًا من تقيدهم ببرمجيات مغلقة باهظة الثمن وخاضعة لشروط الشركات الكبرى التي تنتجها. وهناك من يذهبون أبعد من ذلك بأن يقوموا أنفسهم بنشر هذه البرمجيات الحرّة عبر الكتابة عنها وزيادة المحتوى المعرفي العربي حولها لتقديمها للجمهور العربي؛ حيث تتيح لهم حرية الاستخدام وحرية النسخ والتوزيع والاشتقاق والتعديل عليها بما يتناسب واحتياجاتهم أيًا كانت درجة التعقيد التي يحتاجونها من نفس البرامج والتطبيقات.

وضمن اهتمامنا في أضِف - مؤسسة التعبير الرقمي العربي بالبرمجيات الحرّة مفتوحة المصدر ومساهمتنا في نشرها وتطويرها، أجرينا هذا الحديث مع أحد الأشخاص المهتمين مثلنا بهذه القضية وهو أحمد محمد أبوزيد ليخبرنا عن تجربته في استخدام البرمجيات الحرّة ونشر المعرفة عنها من خلال المقالات والكتب التي صدرت له حولها.

باقي التفاصيل على اللينك: عن تجربة مستخدم وكاتب تقني واختياره للبرمجيات الحُرّة.


- المركز التالت في مسابقة التدوين التانية (13 فبراير 2014)
انهاردة تم الإعلان عن نتيجة مسابقة التدوين التانية اللي عملها الأخ عبد الله المهيري، والإنفوجرافيك اللي كنت مشارك بيه "تعرف على المشاع الإبداعي في 3 دقائق." فاز بالمركز التالت ^_^

شيء ممتاز، واﻷفضل إن جالي عدد من الرسايل وكلمني كذا شخص قالي إنه بعد ما شاف الإنفوجرافيك فهم فكرة كرييتف كومونز بشكل أحسن وعرف إيه الفرق بين الرخص المختلفة بشكل أفضل ... وده الغرض الرئيسي من الإنفوجرافيك، تبسيط وتوضيح بعض الأمور اللي ممكن تكون غامضة بعض الشيء :-)


كفاية كدا لحد هنا :-)