الدليل العملي في استخدام أوبنتو لينوكس

السلام عليكم و رحمة الله و بركاته

زي ما شايفين كدا المدونة متلخبطة عشان رافع الصور على خدمة google pages ، و كنت رفعت الكتاب على حسابي، و الباندوث خلص و للاسف مفيش وقعت عشان ارفع الصور على موقع تاني :@

خلاص الحمد لله الصور و الموقع اتظبط تاني : )

-----------------------

اخيراً الحمد لله انتهيت من كتاب "الدليل العملي في استخدام اوبنتو لينوكس" ، الكتاب منتهي من فترة ، و لكن كان فيه بعض الاخطاء و لكن للاسف الجهاز اتشال في البيت :@ ، و خلصت الكتاب عند احد الاصدقاء D:

اتمنى يكون الكتاب مفيد و بسيط للمستخدمين الجدد او من يريد استخدام لينوكس ، حاولت الاهتمام بالشكل العام للكتاب بدون الاخلال بالمحتوى ، و اهتميت بالشرح المصور و العتماد على الواجهة الرسومية للتسهيل على المستخدمين الجدد ، حاولت التدرج في الشرح ، بدأت ببعض المعلومات و المصطلحات الجديدة على المستخدمين الجدد للنظام ، ثم حرق ملف الـ iso و عمل الاسطوانة ، عمل قسم (partion) للتوزيعة ، تثبيت التوزيعة ، جولة مبدئية و بعض الاشياء التي يفضل عملها بعد تثبيت النسخة ، طرق تثبيت البرامج ( اضافة و ازالة تطبيقات ، مدير الحزم ، من سطر الاوامر عن طريق apt ، و تثبيت الحزم في شكل deb ) ، اهم بدائل البرامج على لينوكس ، و اخيراً بعض المشاكل الشائعة التي تواجه المستخدمين .

الكتاب يقع في حوالي 100 صفحة ، و الشرح على Ubuntu Intrepid Ibex 8.10

-----------------------------



الفهرس





تحميل الكتاب في شكل PDF : "الدليل العملي في استخدام اوبنتو لينوكس"


الكتاب يخضع لرخصة الابداع العامة "Attribution-Noncommercial-Share Alike 3.0 Unported"

-----------------------------

و احب اشكر كل اللي ساعدني لإتمام الكتاب ، اولهم الاخ emsplat لتصميمه الغلاف الجميل ، عمرو جلال و احمد امين لاستضافتهم ليا لانهاء الكتاب .

و في النهاية اتمنى دعوة صغيرة بظهر الغيب . و عيد سعيد ليكم جميعاً ، اشوفكم بعد الامتحانات ان شاء الله : )

-------------------

روابط إضافية:
http://programming-fr34ks.net/strikytutori...buntu_linux.pdf
http://downloads.sourceforge.net/omlx/Prac...pdf?use_mirror=
http://www.2shared.com/file/4433872/be7f2a...u_linuxpdf.html
http://www.4shared.com/file/75441974/98574...u_linuxpdf.html
http://www.mediafire.com/?dybxtz2jwo1
http://ifile.it/lftso5w

Md5sum:
ec253ed1cbf16dc5535fecf88461e2e1

المزيد »

اخيرا ، بس لسه شوية ! : )

السلام عليكم و رحمة الله و بركاته

بقالي فترة مكتبتش حاجة ، و غالباً دي هتكون التدوينة الاخيرة او ما قبل الاخيرة ، عشان هبتدي مذاكره بشكل مكثف شوية عشان الامتحانات قربت : )

المهم ،

في كذا حاجة كدا اتعمل بس لسه فاضلها شوية

مثلا الانتخابات في منتدى كل الطلبة انتهت و تم اعلان النتيجة و المفروض ان الفريق الجديد هيستلم الادوات الرقابية في اقرب وقت ، بس لسه شوية ، ده غير ان للاسف مفيش حد اترشح لقسم الكمبيوتر !
تجربتي في موضوع الرقابة ده كان مش لطيف خالص ! : ( ، من الاول و انا شايف ان الرقابة و الاشراف ده وجع دماغ على الاخر ! ، بس قولت بما ان مفيش حد ماسك قسم الكمبيوتر ، امسكه انا ، و كدا كدا انا لاجئ في القسم ، بس كنت قلقان من الناحية الادارية !

الناحية الادارية بقى ، بجد وجع دماغ ! ، بتلاقي بقى مش عارف مين كلم مين بطريقة مش كويسة ، و مين شتم مين ، و ده تطاول على ده ، و غالباً الاتنين غلطوا عشان كل واحد متعصب لرأيه !
على العموم هيكون في تدوينة مخصوص عن الموضوع ده ، بس مش وقته خالص عشان مفيش وقت : )

الحاجة التانية ، الحمد لله الكتاب بتاع اوبنتو تقريباً خلص ، يعني يا دوب بقفل فيه اهه : ) ، فيه شوية حجات بسيطة عاوز اخلصها بس للاسف الكمبيوتر دلوقتي يعتبر متشال ، يعني بالعافية بقعد عليه ساعتين او تلاته في اليوم ، ده غير ان مفيش ماوس اساسا ، الموس عطلان بقاله بتاع اسبوع ! ، و شغال الكيبورد ، و بحرك الماوس بالكيبورد ، ففي نسبة بطئ في التعامل مع الكمبيوتر ! ، على العموم ان شاء الله الموضوع هيخلص قريب اوي : )

و ما زال عندي تلال من المذاكرة و الامتحانات هتبدأ على يوم ٥ يناير ، و ربنا يستر علينا D:
ـ

المزيد »

من هنا و هناك

السلام عليكم و رحمة الله و بركاته

تدوينة على السريع كدا ، و شوية اخبار من هنا و هناك : )

حالياً بدأت في عمل موضوع عن استخدام اوبنتو ، بالرغم من ان في كذا شرح لاوبنتو ، بس مش بالطريقة اللي انا عاوزها ، يمكن اخر حاجة اتعملت بشكل قريب من اللي بفكر فيه كتاب "اوبنتو نظرة عن قرب الاصدار التاني" ، بس برده مش تماماً زي ما انا عاوز .
اللي بفكر فيه تحديداً حاجة عامله زي دليل الاستخدام السريع ، هشرح التسطيب النسخة و كيفية تسطيب البرامج و اهم المشاكل اللي بتواجه المستخدم الجديد .

كنت محضر الافكار الاساسية و مستني الاصدار 8.10 من اوبنتو ينزل عشان الشرح يكون جديد : )
على العموم ربنا يسهل ، انا مدي نفسي اسبوع اكون خلصت الموضوع ، عشان الكمبيوتر هيتشال قريب و ادخل في السبات الشتوي بتاع امتحانات نص السنة D:

و مازلت محتار في اسم الموضوع - او الكتاب الالكتروني - ، مثلا اخليه "دليل الاستعمال السريع في اوبنتو" ، او "الدليل السريع في استخدام اوبنتو" او "توزيعة اوبنتو المثالية || كل ما تحتاج اليه في لينوكس"
لسه مش مستقر على اسم ، و هشوف احد الاصدقاء من مستخدمي الجيمب عشان يصمملي غلاف كويس : )

و ان شاء الله اوافيكم بالاخبار أول بأول : )

-----------------------------------


من فترة كدا اكتشفت ان في ناس كتير متعرفش عن حقوق الملكية ، و ان استخدام البرامج التجارية بدون ترخيص عمل غير قانوني ، و من فترة كنت بحضر لموضوع بيتكلم عن الجزئية دي ، و عملته امبارح ، هشوف ايه رأي الناس و يا ترى هيهتموا بالموضوع ولا لأ

الموضوع عملته في كذا منتدى بس خلينا نركز على المنتديات الطلابية بشكل اساسي ، وعملت الموضوع بعنوان "يا ترى دفعت تمن الوندوز و البرامج اللي بتستخدمها ، ولا ؟"

يا ترى دفعت تمن الوندوز و البرامج اللي بتستخدمها ، ولا ؟ - منتدى طلاب جامعة القاهرة -
يا ترى دفعت تمن الوندوز و البرامج اللي بتستخدمها ، ولا ؟ - منتدى طلاب جامعة عين شمس -
يا ترى دفعت تمن الوندوز و البرامج اللي بتستخدمها ، ولا ؟ - منتدى طلابي عام -

لما نشوف ايه رأي الناس : )

-----------------------

الأسئلة الأكثر شيوعا عن جنو/لينكس
حوالي 33 سؤال من اكتر الاسئلة اللي بتتسال عن لينوكس ، بجد موضوع ممتاز .

أوبنتو 8.10 تنطلق رسميا - مدونة وادي التقنية .
امبارح نزلت التوزيعة ، بس استنوا عليها يومين عشان الضغط شديد جدا على السرفرات .

بيغل : جهاز حر … برامج حرة - مدونة الادوات العربية .
مقال ممتاز و جميل جدا ، اقروه هيعجبكم .


كفاية كدا : )

المزيد »

الإحصائية الاولى للمدونة : )

السلام عليكم و رحمة الله و بركاته

كدا تقريبا عدا على افتتاح المدونة ما يقرب من 3 شهور ، و ان شاء الله هحاول انزل كل 3 شهور احصائيات عن المدونة
متوسط الزيارات في كل يوم ، عدد الزيارت في الشهر ، المتصفحات اللي بيستخدمها الناس اللي بيدخلوا مدونتي ، نظام التشغيل ، من اي بلد ، و كدا يعني : )

انا بستخدم خدمة الاحصاء من موقع w3counter.com - شايفين الصورة دي اللي في اخر المدونة ؟ - ، خدمة بسيطة و غير معقدة : )


المهم ، نجي للارقام بقى D:
ـ

------------------------------------------

-- عدد التدوينات --
32 تدوينة يعني بمتوسط 10 تدوينات في الشهر ، و دي التدوينة رقم 33 .

-- الزيارات --

عدد الزيارات في الـ 3 شهور : 1,463 ، بمتوسط 488 زيارة لكل شهر .
عدد مشاهدة الصفحات في الـ 3 شهور : 2,564 ، بمتوسط 855 مشاهدة لكل شهر .
58% من الزوار بيشاهدوا الصفحة الرئيسية فقط من غير الضغط على اي روابط داخلية .

---------------------

-- زورار المدونة منين ؟ --
الدولة - عدد الزيارات - النسبة المئوية
مصر : 916 - 63%
السعودية : 233 - 16%
الجزائر : 59 - 4%
امريكا : 48 - 3%
المغرب : 28 - 2%

و بقية الدول حوالي 10 زيارات يعني 1% لكل دولة ، الامارات ، الاردن ، عمان ، المانيا ، ليبيا ، الكويت ، قطر ، البحرين ، فرنسا ، الخ الخ الخ D:

---------------------

-- المتصفحات --

فاير فوكس 3 : 52%
انترنت اكسبلورر 6 : 13% - انا مش عارف ليه الناس لسه بتستخدم المتصفح التعبان ده ! -
انترنت اكسبلورر 7 : 10%
موزيلا 1.9 : 10% - في متصفحات مشتقة من فاير فوكس بتتقري على اساس انها متصفح موزيلا ! ، يعني ده يتحسب مع فاير فوكس -
فاير فوكس 2 : 8%
اوبرا 9.6 و 9.5 : 4%

و عدد زيارات صغير من متصفحات تانية زي سفاري ، و متصفح كروم ، ايس ويزل - نسخة مشتقة من الفاير فوكس - ، متصفح نوكيا و حتى فاير فوكس 1.5 !

الفاير فوكس يفوز يعني D:

---------------------

-- نظام التشغيل --

وندوز اكس بي : 51%
لينوكس : 38%
فيستا : 7%فيستا : 7%

اصدقائي اللينوكساوية عاملين شغل D:
---------------------


درجة تباين الشاشة - Screen Resolution -

ـ
1024x768 : 41%
1280x800 : 20%
1280x1024 : 17%

------------------------------------------

بالنسبة ليا دي حاجة كويسة جدا بالنسبة لاني مش بنزل تدوينات كتير ، و بستعمل المدونة استعمال شخصي بشكل اساسي - يعني مش مدونة متخصصة مثلا -

نشوفكم تاني بعد 3 شهور ان شاء الله ^_^

المزيد »

اخيييراااا الواااااااااان D:

السلام عليكم و رحمة الله و بركاته

اخيرا الشاشة اتصلحت !
اخيرا الوان !

اخيرا زست p:

-------------

الكمبيوتر من غير الواااان بشع جدا
التلفزيون اللي كنت بستخدمه فيه مشكلة في الالوان و كنت عامله ابيض و اسود !
التلفزيون 21 بوصة ، يعني كبير بالنسبة للشاشة الـ 17
بس الرؤية لحد دلوقتي كويسة جدا

المشكلة في الالوان !
الحاجات بقت افتح بدرجة ملحوظة

يعني مثلا اللينك بقت ازرق فاتح ، الاحمر متوهج و الاخضر ناصع !
اعتقد ده بسبب الابيض و الاسود اللي كنت شغال عليه بقالي فترة
بالمناسبة ، الشاشة كويسة جدا ، انا لما عديت على واحد صاحبي من شوية كان عندي نفس الشعور


على العموم ان شاء الله الموضوع يكون مسالة وقت و كل حاجة ترجع لطبيعتها D:
انا كدا بقالي حوالي 10 ايام بستخدم شاشة التلفزيون

اهم حاجة في الموضوع اخيرا هشوف الوان الاوبن اوفيس دوت اورج 3 D: - كنت عامل موضوع الاعلان عن صدور النسخة الجديدة من غير اي الوان -

و كمان هشوف الشكل جديد لمدونة كريم ( Mutati0N ) ، ^_^
ـ

فعلا ، الالوان حاجة جميلة : )

المزيد »

ايه الناس دي !

السلام عليكم و رحمة الله و بركاته

في كذا حاجة عاوز اكتبها في المدونة ، بس شاشة الكمبيوتر لسه بتتصلح ، و الشاشة بتاعت التلفزيون دي رخمة جدا !

المهم

امبارح كنت عاوز اعمل سكان لورقة ، و الورقة مكتوب فيها و لازم يكون بأفضل وضوح
نزلت اشوف نت كافيه يكون عنده سكانر ، طبعا لفيت لفة محترمة على ما لقيت واحد !

مفيش محلات كتير بتجيب سكانر اساساً ، كلهم تلاقي عندهم طابعة ، لكن السكانر ده نادر !
في عندنا في المنطقة محلين اتنين عندهم سكانر ، واحد السكانر مش شغال و التاني جابلي شلل !

زي ما قولت من شوية انا عاوز الصورة بأفضل جودة ممكنة
الراجل عمل سكان للورقة ، و بيحفظها في صيغة jpg ، قولتله طيب انا عاوزها في صيغة png عشان درجة الوضح ، قعد يقولي استنى و مش عارف انا هعملهالك كويس ، استنى للاخر

قولنا نستنا !
برده حفظها في صيغة jpg اقوله انا عاوزه png عشان الجودة ، و ان صيغة png جودة الصور فيها اعلى بكتير من jpg - و خصوصا اذا كان في تفاصيل كتير في الورفة -

قعد يقولي خلاص كلها بقت مهندسين و مش عارف ايه !
يا عم انا قولت حاجة غريبة ؟ دي حاجة معروفة يعني !

راح يعمل ايه بقى ؟
بيحفظ الصورة على صيغة jpg و بيحولها بعد كدا لـ png !
اقوله كدا برده معملناش حاجة ، و كدا هتكون الجودة سيئة و حجم كبير على الفاضي !

و كل ده بتكلم بهدوء جدا و بدون اي عجرفة او احسسه انه مش فاهم حاجة !
في الاخر قالي خلاص مش هعملها ! - بنظام متوجعليش دماغي بقى ! -

قولته شكرا و روحت ماشي ، قولت اطلع اشوف واح برا المنطقة الفقرية دي !

و عملت الورقة بصيغة png و بجودة ممتازة جدا ، و انتهت المهمة بنجاح : )



ربنا يرحمنا من النوعية دي من الناس ، اللي شايفين نفسهم عارفين في كل حاجة و عمرهم ما بيغلطوا !

المزيد »

فاير فوكس للموبيل

السلام عليكم و رحمة الله و بركاته



اخيرا ، فاير فوكس للموبيل

لسه نسخة تجريبية في مرحلة الفا 1 ، يعني لسه شويتين تلاتة عليه ، بس شكله جامد

الموضوع اهه و بفيديو كمان

اطلاق النسخة التجريبية من متصفح فايرفوكس للمحمول - Fennec - منتدى الفريق العربي للبرمجة
اطلاق النسخة التجريبية من متصفح فايرفوكس للمحمول - Fennec - منتدى مجتمع لينوكس العربي

^_^

المزيد »

صدور اوبن اوفيس دوت اورج 3 ^_^

السلام عليكم و رحمة الله و بركاته

اخيرا تم اصدار اوبن اوفيس دوت اورج 3

الاصدار ده فيه تطويرات جميلة جدا ، و بقى عملي بشكل كبير و بينافس ميكروسوفت اوفيس بشكل ممتاز ^_^

من كام ساعة عملت موضوع مبني على الخبر من وادي التقنية : صدور أوبن أوفيس 3

اضفت للموضوع وصلات تحميل مباشرة لوندوز و لينوكس و ماك
و صور للنسخة الجديدة ، و روابط لمواقع مفيدة مع شوية تنسيق ، و بدأت انشر الموضوع عشان نزغلل عين مستخدمي الوندوز و ميكروسوفت اوفيس D:

الموضوع المعدل اهه ^_^

صدور اوبن اوفيس دوت اورج 3 , البديل الامثل لميكروسوفت اوفيس : ) - الفريق العربي للبرمجة

و لو حد عاوز ينقل الموضوع ، دي اكواد المنتديات ، يعني كل ما عليك تعمل نسخ و لصق D: - شوفتوا دلع اكتر من كدا ؟ D: -

عنوان الموضوع : صدور اوبن اوفيس دوت اورج 3
وصف الموضوع : البديل الامثل لميكروسوفت اوفيس : )
الموضوع : هــــنــــا



و كل اوبن اوفيس و انتو طيبين ، و لما نجرب البرنامج بشكل اكبر نشوف ايه اخباره ^_^

المزيد »

محدثكم من شاشة التلفزيون :@

السلام عليكم و رحمة الله و بركاته

اول امبارح اخويا جه يشغل الجهاز الجهاز فتح لحظة و قفل تاني ، بعد كدا لما صحيت قالي على الموضوع

الشاشة مش راضية تشتغل ، بتدي اشارة كأنها شغالة لما اشغل الجهاز ، و لما اطفي الجهاز بتكون في وضع الاستعداد عادي جدا ، بس مفيش اي حاجة على الشاشة !

حاليا انا شغال على شاشة التلفزيون :@ ، لحد ما اشوف ايه النظام مع شاشة الكمبيوتر ، المشكلة انها شاشة LCD يعني مفيش ناس كتير بيعرفوا يتعاملوا معاها ، لحد دلوقتي مش عارف هوديها لمين بالظبط !

توكيل سامسونج ولا الراجل اللي اشتريتها منه ؟ الضمان كدا كدا خلص - مش عارف انا كنت بفكر في ايه لما جبت الشاشة ضمان سنة واحدة ! مع ان اغلب الشاشات ضمان تلات سنين :@ -

انا قبلها حسيت بحاجتين ، و الواضح انهم اتحققوا !

اول حاجة حسيت بيها من فترة ان في حاجة في الجهاز هتخرب و هدفع فيها الفلوس اللي كنت هجيب بيها اللاب توب !

و تاني حاجة قبل ما انام و اسيب الجهاز بليل حسيت كدا ان الشاشة دي هيحصلها حاجة تاني يوم ! ، و بالرغم من كدا كسلت اقوم افصلها من الكهربا - يخرب بيت ابو الكسل :@ -

بس واضح اصلا ان المشكلة منتشرة !

Troubleshooting Samsung SyncMaster 740N 17" LCD Monitor, Support & Service

--------------------

على العموم ربنا يسهل و اعرف اصلحها و مدفعش تمن شاشة جديدة في التصليح :@


معلومات اكتر عن المشكلة

الشاشة مش راضية تشتغل ! حد عنده فكرة عن نظام التوكيل ؟ - كل الطلبة
الشاشة مش راضية تشتغل ! حد عنده فكرة عن نظام التوكيل ؟ - شمساوي

المزيد »

او يوم في السنة الجديدة :)

السلام عليكم و رحمة الله و بركاته

امبارح كان اول ليا يوم في السنة الدراسية الجديدة ، الدراسة اساساً بدأت يوم 20 من الشهر اللي فات ، بس كنا في اخر 10 ايام في رمضان ، بعديه العيد ، فميش مجال للنزول اصلاً

حضرت محاضرتين و شوفت ايه مواد التيرم الاول و ايه المواد الممتدة - المواد الممتدة دي اللي بتدرس في التيرم الاول و و التيرم التاني -

الحاجة الكويسة اللي حصلت السنة دي انهم عملوا مجموعة اضافية ، في الاصل سنة اولى تلات مجموعات ، و تانية و تالتة مجموعتين و رابعة مجموعة واحدة ، دلوقتي كل سنة زادت مجموعة يعني عدد الطلاب في المجموعة الواحدة بقى اقل

احنا السنة اللي فاتت في سنة تانية كنا محشورين في مدرج صغير اساساً

كليات الحقوق من الكليات ذات الكثافة الطلابية العالية اوي D: ، يعني من الصعب تلاقي مكان تقعد فيه في المحاضرة ، و اغلب الوقت بينتهي بيك الحال على السلالم او على الارض !

ربنا يسهل و تكون سنة دراسية كويسة ، و الناس اللي في الجامعة يبطلوا يلبسوا الالوان الفاقعة اوي دي - بالذات البنات كلهم بقوا اصفر و اخضر و بنفسجي فااااااقع - عيني وجعتني من كتر الالوان الفاقعة دي !

و ان شاء الله هحاول - ده لو لقيت حد يساعد معايا ! - اننا نعمل ندوات و نقاشات تعريفية بالمصادر الحرة/المفتوحة و لينوكس ، على الاقل نعرف الناس ان الكمبيوتر مش وندوز : )

المزيد »

يا ترى ليه الواحد ممكن يشتري اجهزة ابل ماكنتوش ؟

السلام عليكم و رحمة الله و بركاته
اولا ، كل سنة و انتوا طيبين و ان شاء الله يكون عيد سعيد للجميع : )

ثانيا : ندخل في الموضوع ^_^

دلوقتي ليه الواحد ممكن يشتري اجهزة ماك بالرغم من سعرها الغالي بغباء ؟، زي لابتوبات ماك ، او شاشات ماك ، او iPhone او iPod بانواعه

مش عاوز حد يقولي اصل اجهزتهم شكلها جامد و مش عارف ايه ! D: ، خلوا موضوع الشكل ده اخر حاجة : )

و لو على التقنية ، فشركات كتير بتقدم تقنية ممتازة و مصنعة بشكل ممتاز جدا

انا مش بقول ان ابل مش بتعمل حاجات كويسة انما الناس بتفضل ابل بالرغم من ان في شركات بتعمل حاجات احسن منها !

---------------------------

طيب انا عملت موضوع في منتديين طلابيين و نشوف ايه رأي الناس في الموضوع ده ^_^

يا ترى ليه الواحد ممكن يشتري اجهزة ابل ماكنتوش ؟, شوية دردشة كدا :) - منتدى كل الطلبة ، طلاب جامعة القاهرة -

يا ترى ليه الواحد ممكن يشتري اجهزة ابل ماكنتوش ؟, شوية دردشة كدا :) - منتدى شمساوي ، منتدى طلاب جامعة عين شمس -

تابعوا النقاشين ^_^

المزيد »

عيد سعيد :)

السلام عليكم و رحمة الله و بركاته

كل سنة و انتوا بخير ، و ان شاء الله يكون عيد سعيد على كل المسلمين

ادي اول يوم من العيد - في مصر - قرب يخلص :)

في كام حاجة كدا عاوز اكتب عنهم ، بس ربنا يسهل و الواحد يحظى بشوية استقرار و سلام داخلي :)

و كل سنة و انتوا طيبين :)

المزيد »

يوم الكــســاء

يوم الكساء ده بيكون يوم السنة و بيكون يوم 29 رمضان ، و بيتوزع فيه هدوم جديده او على اقل تقدير مستعمله استعمال نضيف

شوفو اللينك كدا ^_^

يوم الكســـــــــاء

و ممكن تعرفوا معلومات اكتر من اقرب فرع لجمعية رسالة

المزيد »

تشويش داخلي :(

السلام عليكم و رحمة الله و بركاته

كل سنة و انتوا طيبين رمضان فاضله كام يوم و يخلص ، وان شاء الله تكونوا استفدتم بيه على احسن وجه :)

و بالرغم اني مكنتش ناوي اكتب حاجة لحد ما العشرة الاواخر يخلصوا ، الا اني زهقان شوية و مرتبك نوعاً ما ! فقولت اكتب :)

*************

بغض النظر عن الخلافات مع والدي و اللي بقيت متعود عليها ! ، لانه كل شوية يتخانق معايا بسبب او من غير سبب فقط لاني بقعد على الكمبيوتر و مش بنزل الشارع زي اخويا ! - بالرغم من اني بقعد كتيرعلى الكمبيوتر لكن بقوم بكل الالتزامات اللي عليا ! و مش عارف هو مضايق ليه ! -

المهم
مش عارف ليه بقالي فترة كدا مشوش داخلياً ! - من بعد الفطار الجماعي الاخير ده -



مش عارف ليه حاسس باحاسيس غريبة كدا ، احاسيس مختلفة و متداخلة !

حزن ، غضب ، سعادة ، عدم مبالاة ، هيمان ! ، بفكر في كذا حاجة في نفس الوقت ، ارتباك ، الموت ، حاجات عاوز اعملها ، اصحابي القدامى ، حاجات تانية كتير كدا متتوصفش !

مش عارف ده ليه ولا من ايه ! - اعتقد ان لما واحد يحب واحده بيحصله كدا ! ، و انا ولا بحب ولا حاجة !

******************

و المشكلة ان الموضوع كدا طول ! يعني ساعات لما الواحد يجيله اكتئاب الموضوع مش بياخد اكتر من يوم او يومين و بعد كدا كل حاجة ترجع لطبيعتها

انما المره دي الموضوع داخل في اسبوعين ولا حاجة !



على العموم ربنا يسهل :) ، و يمكن لما انزل يوم الكساء اتحسن شوية - يوم الكساء بيكون 29 رمضان برعاية جمعية رسالة للاعمال الخيرية ، و ان شاء الله هنزل موضوع تعريفي باليوم ده بالرغم ان الوقت بقى متأخر :) -

و كل سنة و انتوا بخير :)

المزيد »

افطار جماعي لطلاب جامعة عين شمس .

السلام عليكم و رحمة الله و بركاته

من كام يوم كدا قولت اني هحضر الفطار الجماعي بتاع شمساوي ، و الحمد لله روحت و كان يوم جميل جدا ^_^

كان في واحد في جامعة عين شمس و ساكن قريب مني ، اتقابلنا و روحنا مع بعض ، بس قبلها كنا عدينا على محطة رمسيس عشان نقابل واحد صاحبه و هو كمان جاي معانا D:

الفطار كان في حديقة الطفل - احنا اطفال برده P: - ، و طبعاً على خلاف فطار طلاب جامعة القاهرة ، المكان مفتوح و الخضرة و الشجر ، بجد كان حاجة رائعة ^_^ - عن نفسي بحب الامكان المفتوحة اكتر ^_^ -

ده غير ان مجموعة تاهت جوا الحديقة - اصل الحديقة كبيرة شويتين D: - ، قعدنا و اتعرفنا على بعض و كل واحد بقى يقول اسمه على المنتدى

تلاقي كل واحد يقولك ، " اوه يا الهى هو انت كذا " ، ههههههههههههههههه و بالذات الناس اللي فاكره اني مختار اسم سكليتون عشان رفيع ولا حاجة D: - ، قعدنا شوية نتكلم و لعبنا كمان و شوية كدا و منسقين الفطار كانوا عاملين حاجة زي مسرحية فكاهية كدا D: ، بس كانت ظريفة اوي D:

كمان كان في شهادات تقدير للناس الفعالين في المنتدى ^_^

و الفطار بقى اللي كان تحفه ههههههههههه ، و في ناس مش عارفه الرز البسمتي من الشعرية ههههههههههه

طبعاً فرصة زي دي كان لازم اتكلم عن اللينوكس شوية D: ، بس لقيت الناس هى اللي بتسأل من غير ما اقول حاجة - حاجة مبشرة هه ؟ D: -



بجد استمتعت اوي باليوم ده و ان شاء الله يتكرر تاني كتير ^_^

المزيد »

Conduit برنامج لمزامنة الملفات في جنوم .

السلام عليكم و رحمة الله و بركاته

ده موضوع كنت عامله من يومين : )

###################

برنامج Conduit هو عبارة عن برنامج لمزامنة الملفات للواجهة جنوم ، ويسمح لك البرنامج بمزامنة الملفات ، الصور ، الملاحظات ، الرسائل الالكترونية او اي بيانات مع جهاز اخر او خدمة على الانترنت .

# ما هى المزامنة اصلا ؟
ببساطة المزامنة هى عبارة عن طريقة للتأكد من وجود ملف في مكانين او اكثر .

مثلاً يمكنك مزامنة الصور مع هاتفك المحمول ، فعندما تضع اي صورة في مجلد معين يتم نقلها تلقائيا الى الهاتف ، او مثلا مزامنة ملفات معينة مع جهاز كمبيوتر على الشبكة المحلية ، هناك العديد من المزايا لمزامنة الملفات ، و بشكل عام هذا يتوقف على استخدامك : )

و يمكن ان تكون المزامنة في اتجاه واحد ، فعندما تضع ملف في المجلد (أ) يتم نقل الملف الى المجلد (ب) ، و لكن اذا وضعت الملف في المجلد (ب) لن يتم نقله الى المجلد (أ) ،،، و قد تكون المزامنة في إتجاهين بحيث اذا وضعت الملف في اي من المجلدين سيتم نقل الملف للمجلد الاخر .

وايضاً البرنامج يدعم المزامنة مع خدمات الانترنت ، مثل مزامنة الصور مع Flickr ، Facebook ، Picasa ، SmugMug ، ShutterFly .

############################

كمل الموضوع في المنتدى :
== مجتمع لينوكس العربي ==
== الفريق العربي للبرمجة ==

المزيد »

السياسات العليا الجديدة P:

السلام عليكم و رحمة الله و بركاته

نظرا لاني مش هقعد كل شوية انسق المواضيع في المنتديات و بعد كدا انسقها و اضيفها في المدونة ، هعمل حل حلو اوي ، اي موضوع بعمله في المنتديات هجيب المقدمة بتاعته و بقيت الموضوع تكملوه في المنتدى بقى D:

و هضيف لينكات منتديين بحيث لو واحد حصله حاجة يبقى التاني موجود D:

و كل سنة و انتوا بخير ^_^

المزيد »

افطار جماعي لطلاب جامعة القاهرة .

امبارح كان في افطار جماعي لطلاب جامعة القاهرة برعاية موقع كل الطلبة ، الفطار اتعمل في نادي نقابة الصحفيين اللي على النيل ، و التجمع بدأ الساعة 3 العصر

*************

بجد كان يوم جميل جدا ما شاء الله ^_^ احسن حاجة ان الواحد يعرف الناس في الحقيقة و يتفاعل معاهم ، مش مجرد مستخدمين كل واحد فيهم مستخبي ورا شاشته ، محدش يعرف غير اسمه المستعار على النت ، و في الاخر و عند اي مشادة مع بعض تلاقيهم قفشوا !
لازم يكون في تفاعل على ارض الواقع عشان المجتمع الانترنتي مجتمع مترابط فعلا و يقدروا يساعدوا بعض و يعملوا مشاريع مع بعض - ممكن كل الحاجات دي تتعمل من غير ما واحد يشوف التاني بس برده درجة الترابط مش هتكون زي لما يتفاعلوا مع بعض في الحقيقة -
المهم يعني قعدت مع الناس ، و اتعرفنا ببعض ، ناس من كلي الكليات و من كل السنوات الجامعية ، ناس كنت متخيل شكلهم و شكلهم طلع قريب جدا من تخيلي ، و ناس طلعوا خارج نطاق التخيل خالص D: ،،، و في ناس مكنتش عندي اي تخيل ليهم ، يعني لما اجي اكلمهم على النت بتخيل شكل شخص ملوش ملامح ، مش عارف ده من ايه D: - الموضوع مش موضوع غموض في الشخصية او حاجة زي كدا بس برده مش عارف ايه ده D: -
الحفلة و قبلها بيومين الموقع كان واقع ، بس الحمد لله اشتغل تاني انهارده كان في برنامج لذيذ للحفل ، يعني اسئلة عامة و فيلم كوميدي صناعة طلابية اسمه حلمبوحة هههههههههههه - ان شاء الله ابقى اخد نسخ منه على الجهاز D: - ، و جه المنشد محمد عباس - المركز التالت في مسابقة منشد الشارقة - ، و المنشد مصطفى محمود .
و كان في قطط كمان هههههههههه ، كام قطه كدا انما ايه ، و بيتجولوا في المكان بس بهدووووء و من غير اي شغب ، زي العسل بصراحة D:

بوجه عام اليوم كان جميل جدا ما شاء الله ^_^ ، وان شاء الله المرات الجاية تكون احسن و احسن و نشوف الناس دي تاني ^_^

و بكرة ان شاء الله في فطار شمساوي - طلاب جامعة عين شمس - ، و طبعاً انا رايح برده D:

اصل انا ليه فروع في كل حته ههههههههههههه ، و ليا اصحاب كتير من عين شمس

المزيد »

عاوز اشتري لاب توب بقى :@

السلام عليكم و رحمة الله و بركاته

من حوالي اسبوع روحت مولات الكمبيوتر في شارع جامعة الدول العربية في المهندسين

اصل عقابل عندكم عاوز اشتري لاب توب D:

و نظرا لميزانيتي المحدودة جدا جدا كنت بدور على حاجات معينة و تحديدا لاب توبات الانترنت ، اللابتوبات دي بدأت تظهر و تنتشر الايام دي جدا ، و قولت اجيب واحد عشان اتحرر من القرف اللي فيه ده D:

ممكن واحد يطلع يقولي ايه هى للابتوبات الانترنت ؟ و انترنت زاي يعني D:
لاب توب عادي خالص و لكن بامكانيات قليلة نواعا ما و صغير الحجم ، و غالبا بيكون بمعالج انتل اللي اسمه اتوم ، معالج تعبان جدا جدا في الاداء - ادؤه نص اداء معالجات سيليرون ! - ، بس ليه ميزه انه موفر في استهلاك الطاقة و قليل في انتاج الحرارة .

يعني اللاب من دول ينفع في التصفح و الحاجات البسيطة و الاوفيس و كدا يعني
بس برده احسن من الوضع الحالي و حتى لو الموضوع رسى على جهاز مستعمل مفيش مشاكل ، بحيث يكون ليا جهاز مستقل اعمل اللي انا عاوزه بمزااااج - عندي اتنين اصغر مني مش بيعملوا حاجة على الجهاز غير انهم بيلعبوا لعبة متخلفة كدا من على النت من نوع MMORPG

*************

المهم ، كنت بفكر في جهازين ، الاول asus eee pc 900 - ده الافضل حاليا من وجهة نظري في اللابتوبات الرخيصة حتى المعالج بتاعه مش اتوم انما سيلرون يعين الاداء مش هيكون وحش اوي - ، و الجهاز التاني ، acer aspire one ،

روحت المول اتفرج على الجهزة و اشوف اذا كان اي من الجهازين نزلوا مصر ولا ايه النظام
سألت كذا واحد عن الجهازين دول ، محدش يعرف اصلا ان الموديلات دي نزلت ! ولا ايه هى !

قولت مفيش غير التوكيل بقى ، سألت واحد على التوكيل قالي على عنوانه بس كان بعيد عني و مش هينفع اروح الايام دي خالص

رجعت المنطقة و سألت في مول قريب من عندنا قالولي على شركة كدا ليها تعامل مباشرع مع الوكيل او شركه اسوس نفسها او حاجة زي كدا

المهم من يومين كدا ورحت اسأل على asus eee pc 900 ، و اي موديل بالظبط اللي نزل عندهم ، لقيت الجهاز اللي انا عاوزه بالظبط بالظبط - eee pc 900 في منه تلات نسخ على حسب نظام التشغيل و الهارد ديسك - لقيت النسخة اللي معاها لينوكس و هارد 20 جيجا

المهم لقيته بكام بقى ؟ بـ 2700 ! ، يعني تقريبا زيادة في التمن بمقدار الربع !

مش عارف بقى لسه نازل جديد ولا متعودين اي حاجة صغيرة تبقى تمنها غالي ولا ايه بالظبط !

ممكن يكون 2700 مش كتير بالنسبة لاجهزة اللابتوب و لكن بالنسبة للجهاز ده تحديدا و لسعره الاساسي يعتبر في زيادة ملحوظة في السعر

***********

على العموم ان شاء الله هنزل كارفور انهارده و اشوف ايه النظام ، واحد صاحبي بيقول شاف جهاز acer aspire one هناك

بس شكلي كدا هستنى شهرين كمان تكون الدراسة بدأت و الاسعار بتقل بشكل كويس :)

المزيد »

ماذا ستقدم أوبنتو 8.10 ؟

لم يتبقى سوى شهرين عن إطلاق النسخة القادمة من أوبنتو ، و قد قررت أن أرى ماذا يعد لنا مطور أوبنتو لنا ، حسنا ليس هناك تغيرات جذرية كبيرة ولكن بعض من الإضافات مثيرة و تستحق بعض الإشادة .

اهم المزايا :

# الضيوف .
# مجلد مشفر و خاص .
# المنظف .
# التثبيت من USB .
# هيئة جديدة للمثبت .
# التثبيت التلقائي للتعريفات .
# البحث السريع عن التطبيقات في Synaptic .

#################

لمعرفة المزيد من التفاصيل اكمل التدوينة على مدونة وادي التقنية || ماذا ستقدم أوبنتو 8.10 ؟

المزيد »

متصفح جنو آيس كات || GNU IceCat

السلام عليكم و رحمة الله و بركاته

من فترة كنت بجرب الفروع المشتقة من المتصفح الجميل فاير فوكس ، و في كذا فرع للفاير فوكس زي SwiftWeasel ، SwiftFox ، IceWeasel ، Flock و اخيراً IceCat

جربت المتصفح الجميل ايس كات او قطة الثلج من تطوير مؤسسة جنو ، و الهدف من الفرع ده عمل متصفح حر 100% يعني يكون خالي حتى من الاضافات غير الحرة زي مشغل ادوب فلاش .

بحثت شوية و عرفت معلومات عنه و في ويكي بيديا لقيت نبذه صغيره عنه ، عدلت على الصفحة و اضفت شوية معلومات زيادة :)

و بصراحة اي حاجة تيجي من مشروع جنو تبقى حلوة

##############


GNU IceCat

جنو آيسكات (بالإنجليزية : GNU IceCat) ، والذي كان يُعرف سابقاً بـجنو آيسويزل (بالإنجليزية: GNU IceWeasel) ، هو متصفح ويب يتم توزيعه من قبل مشروع جنو. آيسكات هو نسخة من الشيفرة المصدرية لموزيلا فايرفوكس مع العمل عليها كمشروع مستقل (يطلق على هذه العملية في هندسة البرمجيات اسم فرع Fork) وهو مُكَون كاملاً من البرمجيات الحرة .

يهدف مشروع جنو من آيسكات تقديم نسخة من موزيلا فايرفوكس يتم تطويرها بالتزامن مع فايرفوكس مع حذف الأعمال الرسومية الإحتكارية (Proprietary Artwork) والإضافات (Plugins) التي تستخدم في الإصدارات الرسمية لموزيلا فايرفوكس (مثل مشغلات الفلاش من أدوبي Abode Flash Player) ، والتي تصنف على أنها برمجيات غير حرة من قبل المدافعين عن البرمجيات الحرة .

الفرق بينه و بين الفايرفوكس
بالاضافة الى ان برنامج جنو آيسكات هو برنامج حر بشكل كامل ، حيث تم ازالة الصور و الشعارات ذات الملكية ، و برنامج توك باك (Talkback) و هو المسئول عن التبليغ عن الاخطاء التي تحدث في المتصفح ، الذي تم استبداله بالبرنامج المفتوحة/حر المصدر بريك باد (Breakpad) ، كمان ان البحث عن الاضافات لا يعرض الا الاضافات الحرة ، و يحتوي متصفح آيسكات على مميزات امنية اضافية .

معلومات اكتر : جنو آيسكات - ويكبيديا .

موقع المتصفح : GNU IceCat

لتحميل اخر اصدار : IceCat 3.0.1-g1

##############

== تجربتي مع المتصفح ==

البرنامج خفيف بدرجة ملحوظة عن النسخة النهائية من الفاير فوكس 3 - اعتقد ان سبب ثقل الفاير فوكس هو الملحقات الكتير (Plugins) - ، و على حسب التجربة ايس كات مش بيقبل اي اضافات غير المحدده عن طريق الملحق اللي اسمها Plugger - هتلاقي في صفحة الاضافة ابرامج اللي هتحتاجها عشان تشغل الملفات المدمجة في المتصفح - او النسخة المطورة منها اللي اسمها MozPlugger

# سيبنا من بلاجر عشان قديم نوعاً ما و خلينا في موزبلاجر ، الملحق ده مهمته تحديد البرنامج اللي هيشغل الملف المدمج في صفحة الويب - ملف صوتي مثلا - ، و بالتالي لازم تسطب برامج عشان تقدر تشغل الملفات تمام - زي توتيم و ام بلاير مثلا - .

# اذا حملت ملحق موزبلاجر عن طريق مدير الحزم او في شكل حزمة جاهزة - deb ، rpm - غالباً هتحتاج تنقل الملحق بشكل يدوي للمسار ده

/usr/local/lib/icecat-3.0.1-g1/plugins

# عن طريق الملحق ده قدرت اشغل كذا صيغة زي الملفات الصوتية و الفيديو المدمجة في صفحات الويب ، بس في عيب اساسي في الملحق ده - اعتقد ان المشكلة مش في الملحق انما في البرنامج اللي بيشغل الملف الصوتي - ، انه مش بيشغل الملفات الصوتية اذا كان في برنامج تاني بيستخدم كارت الصوت !

# قدرت اشغل كذا صيغة بشكل كويس بالإعتماد على توتيم - لغيت استعمال إم بلاير اساساً - و قدرت اشغل كام صيغة مش شغاله بشوية تعديلات في ملف اعدادات موزبلاجر من الملف ده

 /etc/mozpluggerrc

# بعد اي تعديل تأكد من حذف الملف ده عشان الاضافة تشتغل كويس - احذف الملف و المتصفح مغلق -

/home/user/.gnuzilla/icecat/xxxxx/pluginreg.dat

# اذا كنت عاوز تشوف الملحق اشتغل كويس ولا لأ و ايه الصيغ اللي تقدر تشغلها عن طريق المتصفح ، ادخل هنا : Plugger Testing Grounds .

# و من مميزات اضافة موزبلاجر امكانية تكامل قارئ ملفات الـ PDF مع المتصفح - يعني مش هتحتاج ادوب ريدر بعد كدا - ، و امكانية تكامل عدد من التطبيقات التانية زي اوبن اوفيس دوت اورج و غيره .

# اذا كنت بتاعني من بعض المشاكل مع مشغل الفلاش الحر جي ناش - Gnash - ممكن تستبدله بشكل يدوي بمشغل فلاش ادوب او مشغل الفلاش الحر SwfDec .
ـ
# اغلب الاضافات (Add-ons) اللي بتشتغل على الفاير فوكس بتستغل عادي مع ايس كات ، مجربتش اضافات كتير بس لحد دلوقتي كله تمام .

# حالياً مش متوفر غير نسخ للمعالجات ذات الـ 32 بت لنظام جنو/لينوكس بس .

# بشكل عام متصفح ممتاز جدا و مناسب جدا و اعتقد اني هعتمد عليه بشكل اساسي :) .

و كل سنة وانتوا طيبين و عذرا على الكتابة بالعامية بس مليش مزاج اكتب بالفصحى ! :)

المزيد »

كل سنة و انتوا طيبين :)

السلام عليكم و رحمة الله و بركاته

كل سنة و انتوا طيبين بمناسبة شهر رمضان المبارك :)

التدوينة جت متأخرة شوية D:

بس معلش بقى ,, انتوا عارفين اول اسبوع من رمضان بيكون عامل ازاي ،، عزومات و كدا بقى D:

بس عموماً تتعوض مرة تانية ان شاء الله :) ، و كل سنة و انتوا طيبين مرة تانية :)

المزيد »

انتهى اليوم :)

أنتهى يوم ويكيبيديا العربية الرابع (30 أغسطس)، بنسبة إنجاز تبلغ 68,5% ، أي ما يعادل :
685 مقالة في 24 ساعةمن غير حساب مقالات البوتات التي بلغت مقدار 3510 مقالةو بهذه النتيجة
، عبرت ويكيبيديا العربية حاجز الـ 75,000 مقالة قبل انتهاء يوم ويكيبيديا
مبروك للجميع

*****************

اليوم خلص و شاركت فيه الحمد لله ^_^ - بالرغم من اني صحيت متأخر و شاركت اقل من 8 ساعات بس سعيد جدا بالمشاركة -
65% مش وحش برده :) و ان شاء الله السنة الجاية - و على مدار السنة - المشاركة تبقى اكتر ^_^

المزيد »

انهارده يوم ويكيبيديا العربية الرابع !

السلام عليكم و رحمة الله و بركاته

ازيكم يا شباب ان شاء الله تكونوا بخير ,,

انهارده 30 اغسطس 2008 , يوم ويكيبيديا الرابع ,, هو المفروض كنت اعمل الموضوع قبلها بكام يوم بس هى حلاوتها في حموتها كدا lol - بالرغم ان اليوم قرب يخلص اصلا بس انا لسه صاحي من شوية D: -

ببساطة , انهارده الناس بتجتمع على ارض الواقع في الاسكندرية , و بيوضحوا شوية حاجات عن فكة الويكي و ازاي تقدر تساعد و بيشوفوا المواضيع اللي فيها قصور و يركزوا عليها - بجد في قصور جامد في المحتوى العربي ! -

طبعا مش كل الناس هيقدروا يروحوا اسكندرية , بس نقدر نساعد و نشارك و احنا في بيوتنا بكل سهولة

**********

يعني لو اللغة الانجليزية بتاعتك كويسة ,, او عندك معلومات في مجال معين ممكن تترجم موضوع من ويكيبيديا الانجليزية - اللي هى اكتر من النسخة العربية بكتيييير ! - ,, او تكتب المعلومات من دماغك , في اي فرع من فروع العلوم اكتب زي ما تحب بس راعي الحياد و الموضوعية : )

و كمان ممكن تشارك من غير ما تسجل اصلا ,, بس يستحسن تسجل عشان تعرف تتابع بعد كدا ^_^

*******

دلوقتي انت عاوز تشارك تمام ؟ هتدخل هنا

== يوم ويكيبيديا العربية الرابع ==

هتلاقي شوية معلومات عن يوم ويكيبيديا العربية , و هتلاقي قوائم المقالات , و هى عبارة عن تلات قوائم , شوف كل قائمة منهم و اختار الموضوع اللي تعرف تكتب فيه او تقدر تترجمه من النسخة الانجليزية

و بس كدا ^_^

و من بداية اليوم كان في 71,163 مقال , و لحد اللحظة دي بقوا 72,675 مقال ^_^

***********

انتوا لسه هنا ؟ يلا انطلقوا ^_^




طيب دي شوية معلومات عن ويكيبيديا الموسوعة الحرة , ابقوا خدوا فكرة عنها برده D:





ويكيبيديا – Wikipedia

ويكيبيديا هى مشروع موسوعة متعددة اللغات، مبنية على الويب ، ذات محتوى حر، تشغلها مؤسسة ويكيميديا ، التي هى منظمة غير ربحية , ويكيبيديا هى موسوعة يمكن لأى مستخدم تعديل و تحرير و إنشاء مقالات جديدة فيها .في 14 أغسطس 2007 ، أصبح لدى ويكيبيديا 7,9 مليون مقالة تقريباً ، مكتوبة بـ253 لغة. في 9 سبتمبر 2007 تخطي عدد مقالات ويكيبيديا الإنجليزية 2.000.000 مقالة , تكتب المقالات تعاونياً بواسطة متطوعين من حول العالم و الغالبية العظمى من محتويات الموسوعة يمكن تعديلها بواسطة أى شخص يمتلك اتصالاً بالانترنت , شهرة ويكيبيديا تنمو بثبات منذ بداية عملها و حالياً ، موقع ويكيبيديا هو من أكثر عشرة زيارة على الإنترنت , ويكيبيديا من الإنجليزية Wikipedia هى اختصار لكلمتين هما : ويكي بالإنجليزية Wiki ( نوع من مواقع الويب التي يتم تحريرها جماعياً ) ، و الكلمة الثانية هى بيديا من الإنجليزية encyclopedia و التي تعني بالعربية موسوعة , و خوادم ويكيبيديا الرئيسية تنتشر في تامبا ، فلوريدا ، وخوادم أخرى موجودة في أمستردام و سيول .


نتيجة لطبيعة ويكيبيديا التي تسمح لأى مستخدم بتعديل مقالاتها ، شكك النقاد و المحللون بها و تساءلوا عن مدى مصداقيتها و دقتها , حيث أنه بإمكان أى مستخدم أن يجري تعديلات على محتويات الموسوعة ، تزيد احتمالية أن يضيف مجهولون أو مستخدمو الموسوعة المسجلون معلومات خاطئة أو غير مؤكدة ، أو يقوم المخربون بحذف أقسام من مقالات أو إضافة تعليقات شخصية أو أراء متحيزة ، خاصةً في المواضيع السياسية و الدينية , أيضاً تثار الشكوك حول حيادية المقالات في ويكيبيديا، و مدى دقة المعلومات الواردة بهذه المقالات , حدد القائمون على موسوعة ويكيبيديا مجموعة من السياسات و التعليمات التي يجب على مستخدمي الموسوعة الالتزام بها عند تحرير و تعديل محتويات الموسوعة ، هذه السياسات تهدف إلى التصدي لمحاولات التخريب ، وتحاول ضمان مصداقية المعلومات التي تحتويها مقالات الموسوعة

المزيد »

ماذا تعرف عن دوكبوك DocBook ؟

موضوع رائع و جه في وقته ,, عن صيغه دوك بوك

*************

لربما سمعت أو قرأت أثناء تجولك في عالم المصادر الحرة عن مستند بصيغة docbook و أنه هو المعتمد في توثيق المشاريع و الكتب، ولربما تسألت ما هي دوكبوك ولما لا يستخدمون صيغة معروفة أخرى مثل HTML أو TXT مثلا .
تعتبر صيغة دوكبوك لغة ترميز دلالية متخصصة للمستندات التقنية، وبالأساس قصد منها كتابة المستندات التقنية التي لها علاقة بعتاد الحاسوب و برمجياته، ولكن يمكن استخدامها لأي نوع آخر من الوثائق.

وكأي لغة دلالية ، تمكن لغة دوكبوك مستخدميها من إنشاء محتوى الوثيقة في هيئة عرض محايدة تستطيع السيطرة على البنية المنطقية للمحتوى، وبعد ذلك يمكن لهذا المحتوى أن ينشر بتشكيلة واسعة من الهيئات تشمل HTML و PDF و صفحات man ( التي تستخدم في عرض المساعدة للأنظمة المبني على اليونكس واللينكس ) و HTML Help ( لإنشاء مستندات chm) من دون الحاجة إلى تغيير أي شيء في المصدر الأصلي.

اكمل بقية المقال على مدونة وادي التقنية

ماذا تعرف عن دوكبوك DocBook ؟

المزيد »

طريقة عمل اطراف دائرية للصور عن طريق برنامج جيمب

السلام عليكم و رحمة الله و بركاته

الموضوع ده عن طريقة عمل اطراف - حواف - دائرية للصور عشان الشكل الجمالي :)

من يومين قررت اني افتح المدونة اللي كنت حاجز اسمها على بلوجر من سنتين او تلاته ,, و كنت محتاج اظبط شوية صور عشان المدونة , طبعاً انا مليش في برامج الجرافيكس خالص D:

بس بعد بحث سريع كدا في النت و البرنامج لقيت الطريقة , ممكن تكون سهلة و بسيطة لكتير من الناس ,, بس قولت انزل الموضوع لعل و عسى حد يستفيد منه بعد كدا : ) -

معرفش اذا كانت الخاصية دي موجودة في كل نسخ الجيمب ولا لأ ,, بس النسخة اللي استعملتها هى 2.4.5

نيجي للمهم

########################



نشغل الجيمب و نفتح اي صورة




و من قائمة Select نختار منها Rounded Rectangle ....

*****



بعد كدا هيظهرلك النافذة اللي بتحدد فيها مدى انحناء الزوايا

كل ما الرقم زاد بيزيد انحناء الزاوية ,, و كل ما الرقم قل بيقل انحناء الزاوية - علاقة طردية يعني D: -
ـ
25 او 20 هيكون مناسب او على حسب ما تفضل .

*****


كدا تم تحديد الاطراف ,, هنضغط Ctrl + I عشان نعكس التحديد - كنترول و حرف آي -

و بعد كدا نضغط على زرار Delete

*****



و بكدا الاطراف بقت منحنية مش عمودية و شكلها احسن من الاول : )

*****



و ادي الصورة في شكلها النهائي : )

########################

ملحوظة :
1. لاحظ ان الخلفية بقت على شكل مربعات مش ابيض ,, لو كانت ابيض اطراف الصورة مش هتظهر زي ما احنا عاوزين

2. الصيغ اللي بتدعم الشفافية PNG و GIF


######################

بالنسبة للناس اللي متعرفش برنامج جيمب ,, خدوا النبذة دي ^_^


GIMP
جيمب هو في الاصل تطوير مؤسسة جنو - اسمه اختصاراً لـ " GNU Image Manipulation Program " - , برنامج للاستخدام الاحترافي يعد بديل جيد جداً للفوتوشوب , و لكنه قد يكون مختلف نوعاً ما و يوجد منه نسخة معدلة تسمى " Gimp Shop " و قد قام مطور هذه النسخة بعمل تعديلات في شكل و قوائم النسخة لتشبه قوائم برنامج الفوتوشوب " Photo Shop " , برنامج مفتوح و حر المصدر يعمل على الوندوز و لينوكس و ماكنتوش .
.: موقع البرنامج :.

***********

و دي دروس فيديو بالجيمب - بواسطة احمد عبد الرحمن

>> خطوة بخطوة معاً حتى نحترف الجمب <<

في النهاية اتمنى يكون الموضوع بسيط و مفيد : )

المزيد »

ارسم وشك D:

من شوية كنت بتصفح مدونة الاخ محمد , من المغرب , و شوفت موضوع اسمه "وجهي بالمانگا" - حرف الـ گـ بيتنطق زي الجيم المصرية , غير معطشة - , - و ان شاء الله هبقى اعمل كام موضوع بتكلم عن المنجا او ما يعرف بالـ أنمي -

* بالمناسبة : شروط استخدام الخدمة مكتوبة بالايطالية ! , انا استخدمت ترجمة جوجل و ترجمتها للعربي و للانجليزي ,, و على حسب ما فهمت كدا انك باستخدامك للخدمة دي هيتم اضافت ايميلك عندهم و هيبعتوا ليك رسائل دعائية و الكلام ده !
فيستحسن تسجل بإيميل قديم او مش بتستعمله - انا عامل ايميل مخصوص للخدمات غير الموثوق فيها ! -
انا مش متأكد تماماً اذا كنت فهمت شروط الاستخدام و الخصوصية صح ولا لأ , بس حبيت انوه عن الموضوع ده محدش يتفاجئ بعد كدا برسائل دعائية رخمة :)

المهم يعني , قولت اجرب اعمل واحد , بس جيت اجربه و انا على اللينوكس و بعد اختيار الشكل و المواصفات و في الخطوة الاخيرة بتاعت ارسال الصورة على الايميل , طلعتلي رسالة بتقول انت بتستخدم نظام لينوكس او يونكس و في خطأ حصل !

قولت خلاص مش مشكلة ابقى ادخل على الجهاز الافتراضي - برنامج VirtualBox - و اشغل الوندوز و اعمله و امري لله

في النهاية عملت الصورة و حفظتها , و عملت عليها شوية تعديلات ببرنامج جيمب , عشان درجات الالوان مش مظبوطة - يعني مثلاً انا لون بشرتي برونزية - قمحي - و مفيش الدرجة اللي انا عاوزها , يعني يا اما غامق شوية - اسمراني - يا اما فاتح عن كدا !

و برده ظبط اطراف الصورة عشان تلائم الخلفية و ادي النتيجة - دي و انا حالق دقني D: - , مش لاقي الشعر المنعكش ,, على طول بنعكش شعري D: - ,, و اختارت اقرب شكل



مع اني حاولت اعمل اقرب حاجة لشكلي الا ان الصورة مش مظبوطة اوي , بس بشكل عام نسبة الشبهه كويسة

************

الموقع اللي بيقدم الخدمة اهه : .Face Your Manga.com

المزيد »

شعار جديد في المدونة

السلام عليكم و رحمة الله و بركاته

واخدين بالكم من الشعار اللي فوق ده ؟ D:
من فترة عديت على مدونة الاخ ابو بكر - اسمه bob-work في مجتمع لينوكس العربي -

كان عامل شعار جميل للمدونة بتاعته ,, و احسن حاجة انه هو اللي عاملها و ببرنامج جيمب وامبارح طلبت منه يعملي شعار ,, و قولته على تصوري ,, للشكل ,, و بالرغم من اني طلعت عينه عشان انا اصلا مليش في التصميم D: ,, بس هو ما شاء الله عملي شعار جميل اوي - اللي فوق ده -
و الشعار ده مش هستعمله هنا بس في المدونة ,, ده كمان كتوقيع في المنتديات ^_^

بجد تسلم ايده يعني ^_^

المزيد »

عيد ميلاد سعيد يا دبيان || 15 سنة من الحرية :)

السلام عليكم و رحمة الله و بركاته

بالامس اكملت توزيعة دبيان سنتها الخامسة عشر , خمسة عشر سنة من الحرية و العمل التطوعي :)

في يوم 16 من شهر 8 سنة 1993 قام إيان موردوك بالإعلان عن بداية توزيعة دبيان , و دبيان مؤسسة غير ربحية تهدف لعمل نظام تشغيل حر بشكل كامل , و يوجد وعد قطعته على نفسها ببقاء التوزيعة حرة 100% و هو ما يعرف بالعقد الاجتماعي الموجود في موقع التوزيعة , و اسم دبيان مشتق من اسمه بالاضافة لإسم زوجته ديبرا .

و شارك متطوعي دبيان بشكل اساسي في صياغة تعريف المصدر المفتوح , و الذي تم بناؤه على اساس الخطوط العامة للبرمجيات الحرة لديبيان (Debian Free Software Guidelines) .

و دبيان تعتبر احد اقطاب لينوكس الثلاثة الاساسية بالاضافة الى سلاك وير و ريد هات , و قد تم بناء العديد من التوزيعات علي دبيان , اهما النسخة الاكثر شعبية الان اوبنتو , و غيرها من التوزيعات الرائعة مثل دامن سمول لينوكس , نوبكس و دريم لينوكس .

و يوجد اصدارات من دبيان غير جنو/لينوكس , فمثلاً يوجد نسخة من دبيان تحتوي النواة هيرد مع جنو - جنو/هيرد - , و ايضا جنو مع نواة فري بي اس دي - جنو/كيه فري بي اس دي -

توزيعة دبيان صاحبة نظام الحزم الشهير "DEB" و الذي يقابله "RPM" في ريد هات و "TGZ" الخاص بسلاك وير , و كذلك هى صاحبة مدير الحزم الرائع Apt-Get الذي جعل عملية تنصيب البرامج اسهل ما يكون في جنو/لينوكس .

*****

و من المعروف ايضاً ان دبيان من اكثر التوزيعات استقراراً لانها تمر بعدة مراحل اختبارية قبل صدور النسخة النهائية , فإصدارة دبيان تمر اولاً بمرحلة عدم الاستقرار (unstable) , ويتم فيها بناء الحزم و التي لم تختبر من قبل , ثم مرحلة التجريب (testing) , و يتم فيها تجربة الحزم و تخضع للاختبار , و تعتبر هذه المرحلة اطول مرحلة , ثم بعد ذلك مرحلة الاستقرار (stable) , و التي تصدر بعد حوالي 18 شهر و تكون امنه و ثابتة جدا , ثم في النهاية تكون الاصدارة (oldstable) و التي تصدر بعد عام عن الاصدارة التي قبلها و يكون فيها تحديثات امنية و اصلاح لاخطاء طفيفة , و لكن هذا التأخر يؤدي الى ان تصبح التوزيعة قديمة نوعاً ما ولا تجاري رغبات العديد من المستخدمين الذين يريدون اخر و احدث البرمجيات .

*****

و اصدارات دبيان من الاقدم الى الاحدث كالتالى :

• 1.1 – (buzz) باز, 17 يونيو 1996 .
• 1.2 – (rex) ريكس, 12 ديسمبر 1996 .
• 1.3 – (bo) ديبيان بو, 2 يونيو 1997 .
• 2.0 – (hamm) ديبيان هام, 24 يوليو 1998 .
• 2.1 – (slink) سلينك, 9 مارس 1999 .
• 2.2 – (potato) بوتيتو, 15 أغسطس 2000 .
• 3.0 – (woody) ووديوودي, 19 يوليو 2002 .
• 3.1 – (sarge) سارج, 6 يونيو 2005 .
• 4.0 – (etch) إتش , 8 ابريل 2007 .
• 5.0 – (lenny) ليني , و التي لم تصدر بعد , و يفترض صدورها في شهر سبتمبر القادم .

و لمزيد من المعلومات حول معاني الاسماء الرمزية لإصدارات دبيان
Where do these codenames come from?

*****

موقع دبيان الرسمي : Debian.org
صفحة دبيان في ويكيبيديا : العربية - الانجليزية

#############

الموضوع من كتابتي , و استعنت بشكل اساسي بموقع ويكيبيديا بالاضافة لموقع دبيان و بعض المساعدة من جوجل :)

في النهاية اتمنى ان الموضوع يكون عجبكم , و لو في اي اقتراحات او اخطاء يا ريت تنبهوني عليها :)

المزيد »

المدونة تحت التظبيط :)

السلام عليكم و رحمة الله و بركاته

زي ما انتوا شايفين المدونة لسه بتتظبط , و بظبط في الصور و الاضافات و الايموشنز و كدا يعني ,, و اصلا انا مليش في موضوع التصميم ولا الجرافكس ولا الحاجات الوحشة دي D: ,, بس لحد دلوقتي كله تمام ^_^

و المفروض انه هيكون في قسم ثابت , زي قائمة المواقع , و عن Skeleton Eel اتحدث , و كام حاجة تانية هضيفهم كدا

و ان شاء الله هبقى انزل تدوينة و موضوع في المنتديات بالقالب - template - اللي بستخدمه بعد ما عربته و ظبطه على درجة وضوح 768×1024 بعد ما كان 600×800 و عسكت اتجاهه و شوية تعديلات عشان لو حد عاوز يستخدمه

و بحاول اظبط الصور اللي في المدونة عشان ميكنش تقيل ,, و برده تكون الصور بجوده كويسة

و لو حد عنده اي مشاكل مع عرض المدونة او اي اقتراحات يا ريت تننبهوني عليها :)




يعني متتخضوش لو لقيتوا حاجات غريبة كدا في المدونة

المزيد »

قائمة المواقع

السلام عليكم ورحمة الله و بركاته

نظراً لاني بحب انظم الحاجة بشكل معين , و نظرا لان قائمة المواقع اللي بتعجبني و اللي بعدي عليها كبيرة و طويلة و مش عاوز ارخم على الناس اللي بتزور المدونة , عشان كدا مش هحطها في الصفحة الرئيسية للمدونة , و هيكون الموضوع ده خاص بالمواقع و المدونات اللي بعدي عليها من وقت للتاني , و هكتب اخر وقت لتحديث للقائمة عشان تبقوا واخدين بالكم من اي تحديثات جديدة :)

و اهم كام المواقع اللي بزورها بشكل متواصل في الصفحة الرئيسية

اخر تحديث : 29/8/2008

############################


>> مواقع تقنية <<

SourceForge.net
اكبر موقع لاستضافة البرامج المفتوحة/الحرة المصدر - انجليزي -

SoftPedia.com
موقع لتحميل البرامج و المراجعات لبرامج لينوكس و وندوز و ماك و حتى الالعاب - انجليزي -


********

>> مواقع لينوكساوية <<

Linux.com
موقع بيجيب اخر الاخبار , المعلومات , المراجعات و الاختبارات عن لينوكس

HowToForge.com
موقع جميل جدا فيه شرح لبرامج و توزيعات و حاجات تبع لينوكس - انجليزي -

LinuxLeak.com
الموقع ده عبارة عن تجميع لمواقع تانية , يعني بيجيبلك لينكات اهم و اخر الاخبار من اشهر المواقع و المدونات

UbuntuGeek.com
و ده كمان موقع بيقدم شرح و معلومات عن توزيعة اوبنتو لينوكس - انجليزي -

ArabEyes.org
عيون العرب هو عبارة عن مشروع لدعم العربي في اللينوكس و امثاله , و ليهم مشاريع رائعة جدا , اتمنى اني اقدر اساعد معاهم في اقرب فرصة :)

DistroWatch.com
موقع ممتاز جدا عن بيعرض معلومات عن اخر اصدارات توزيعات اللينوكس , سواء نسخ تحت الاختبار - Alpha , Beta , RC - او النسخ النهائية


*******************

>> مواقع عامة <<

ويكيبيديا
طبعاً موقع معروف , الموسوعة الحرة , تقدر تشارك معلوماتك مع الناس , و لو عاوز اي معلومات جرب تدور عليها هناك , و ان كان المحتوى العربي ضعيف مقارنة بالنسخة الانجليزية

كنانة اونلاين
موقع فيه معلومات كتير مفيدة في كل المجالات صحة , زراعة , تكنولوجيا , ثقافة عامة و حاجات تانية كتير , بجد لازم تزوروا الموقع ده :)

*******************

>> مواقع دينية <<

طريق الاسلام
اعتقد كل الناس عارفاه يعني D:

صيد الفوائد
من المواقع الحلوة و فيها مراجع كتير

منهج
موقع جميل تحت اشراف الشيخ هاني حلمي

الغزالي
موقع الشيخ محمد الغزالي رحمه الله

*******************

>> مواقع علمية <<

إيدي ميديا
موقع جميل فيه عروض تقديمة علمية بسيطة لكذا مرحلة تعليمية , و بيهتم الموقع بالعلوم و الرياضيات . - الموقع اصلا اجنبي بس في نسخه منه بالعربي -


*******************

>> منتديات <<

*******************

ملحوظة : الترتيب لا يعني اي شيء ! :)

>> مدونات <<

مدونة kaf-laarous

مدونة احمد عبد الرحمن

B!n@ry-z0ne - مدونة باينري

Mutati0N - المبرمج كريم

Br4v3-H34r7

مدونة رشيد

مدونة عمرو فكري

عيلة و عايزة تفهم

مدونة عبدالله المهيري - سردال سابقاً -

عبقرية الإرادة - Amr_not_Amr -

المزيد »

عن Skeleton Eel اتحدث .

قريبا ان شاء الله :)

المزيد »

الافتتاحية

السلام عليكم و رحمة الله و بركاته

من فتره كبيره - يجي اكتر من سنتين او تلاته - و انا حاجز اسم skeleton-eel على بلوج سبوت , قلت عشان ملاقيش في يوم من الايام واحد اسمه skeleton eel تاني على النت - هو ده اللي ناقص :D - , و قولت اكيد في يوم من الايام هفكر افتح المدونة :)

و على رأي محمد معاشر اخصائي الـ PHP في منتدى الفريق العربي للبرمجة ,, فلنجرب التدوين :) ,, بالرغم من انها جت متأخر اوي :)

في الحقيقة مش عارف هكتب ايه بالظبط في المدونة ,, بس غالبا هتكون حاجات اجتماعية او حاجات بفكر فيها و حاجات بقابلها بالاضافة لبعض الحاجات في الكمبيوتر , يعني المدونة هتكون تجميع لمواضيعي و شروحاتي - اللى بنزلها اصلا في كذا منتدى - و بعض المواضيع الاجتماعية , بحث هتكون حلقة الوصل بين المنتديات الاجتماعية و المنتديات التقنية - لان طبعا مينفعش انزل موضوع اجتماعي في منتدى تقني - :)

بس بصفتي شخص قليل الكلام نوعاً في العالم الحقيقي هحاول اتكلم هنا بشكل اكبر ,, بس المشكلة اني زهقت من الكلام !
كل الناس بتتكلم ,, كل من هب و دب بيتكلم ,, الكل بيقدر يتكلم بس مش شايف ناس كتير بتعمل افعال زي ما بتتكلم !
حتى الحكومة سايبانا نتكلم زي ما عاوزين بس تيجي تنفذ مش هتعرف

مهاترات و جدال عقيم مش بنطلع منه غير بوجع الدماغ ,, و في الاخر مش بنشوف اي افعال !
ديما بنتشدق بالكلام و التعبيرات و اللي يقولك كلام الناس لا بيبجيب ولا يودي و في الاخر اوي حاجة بيخاف منها كلام الناس !
اللي يقولك نشجب و نعترض و ندين و كله كلام !

كله بنقد و ينتقد بس قليل اللي بيعمل حاجة عشان يغير الوضع

على العموم احب ابدأ المدونة بكام بيت الشعر دول ,, معبريين بجد :)


####################


ضحـكت فقالوا ألا تحتشم .:..:. بكيت فقالوا ألا تـبتســـــم

بـسمـت فقالوا يرائي بهــا .:..:. عبست فقالوا بدا ما كـتــم

صمت فقالوا كليل اللسان .:..:. نطقت فقالوا كثير الكــــلم

حلمت فقالوا صنيع الجبان .:..:. ولو كان مقتدرا لانتقــــــم

بسلـت فقـالوا لطيش بـــــه .:..:. وما كان مجترئا لو حــكم

يـقـولون شـذ ان قلــت لا .:..:. وإمـعـة حـين وافقتهــــــــم

فأيقنت أني مهمـــــــا أرد .:..:. رضا الناس لابد من أن أذم


يعني من الاخر تباً لهم !


و اعرف دايماً انك مش هتعرف ترضي الناس , و اعمل اللي شايف انه كويس و خلاص :)

####################

دي كانت الافتتاحية و ربنا يسهل و يكون في مواضيع تاني تفيد و تنفع الناس

هبدأ دلوقتي اظبط في في المدونة و ربنا يسهل :)

و على الاقل ابقوا زوروني كدا كل سنة مرة :)

المزيد »