الاحتفال بإطلاق Ubuntu 10.04 في جامعة القاهرة.

السلام عليكم و رحمة الله و بركاته

بمناسبة إصدار النسخة الجديدة من اوبنتو (١٠.٠٤)، هيكون ان شاء الله يوم السبت الجاي (٨\٥\٢٠١٠) احتفالية في كلية الهندسة و هيكون في فعاليات في كذا مجال، و حتى لو انت مش من الجامعة هتقدر تدخل ان شاء الله : )


و كمان في الاسكندرية هيكون في احتفالية ^_^


يعني سواء كنت في القاهرة أو الأسكندرية أو ما حولهما هتقدر تيجي ^_^



-------------------



ينظم فريق أبونتو المصري Ubuntu-eg إحتفالية بصدور الإصدار الجديد "Ubuntu 10.04 - Lucid Lynx" يوم السبت ٨\٥\٢٠١٠ بداية من الساعة العاشرة صباحا، و ذلك بكلية الهندسة - مبنى قسم عمارة - الدور الثالث.

و سيتم ذلك من خلال إعطاء مجموعة من المحاضرات بالإضافة لمساعدة المستخدمين الجدد لتنصيب أحدث إصدارات أبونتو. و المحاضرات ستكون كالتالي:

* التراخيص و الثقافة الحرة - محمد جمال.
* كيفية تنصيب أبونتو - محمد سعودي.
* التطوير لسطح المكتب بإستخدام Qt - احمد طولون.
* التطوير لسطح المكتب بإستخدام GTK - محمد حبيب.
* نظام إدارة المحتوى "دروبال" - عبدالرحمن غريب.
* نظام إدارة المحتوى "جملة" - جوناثان.
* البرامج البديلة - محمود محمد.
* التصميم باستخدام انكسكيب - أنس عماد.
* التصميم الثلاثي الأبعاد باستخدام بلندر - إسلام الوزيري.


الجلسات ستكون على التوازي و بالتالي سيتم إعادتها اكتر من مرة في اليوم، و تستطيع حضور أي جلسة ندون تفويت الأخرى ; )


لتأكيد الحضور زروا صفحة الفاعلية على الفيس بوك






ها، مين جاي ؟ ^_^

المزيد »

اليوم العالمي ضد DRM!

السلام عليكم و رحمة الله و بركاته

المفروض اني مكتبش حاجة الفترة دي، لكن خروجا عن ضغط المذاكرة اللي مش عاوزه تخلص دي، دخلت على النت شوية! و هكتب تدوينتين على السريع! (معلش مش هعرف ارد على التعليقات حاليا)


امبارح كان اليوم العالمي ضد DRM ادارة القيود\الحقوق الرقمية (الناس اللي بتدعمها بتسميها حقوق، و الناس اللي ضدها بتسميها قيود، و في الانجليزية الكلمتين بيبدأوا بحرف الآر! Rights - Restrictions)




الأخ أسامة خالد بذل مجهود رائع في ترجمة و كتابة مقالات عن مساوئ إدارة القيود الرقمية.

اليوم العالمي ضد DRM - وادي التقنية.

المقالين دول بيلخصوا مشكلة DRM بشكل ممتاز، لازم تقروهم ; )
١. ما هي DRM؟ - مؤسسة البرمجيات الحرة.
٢. حق القراءة - مشروع جنو.


و كتبت شوية كمقدمة لمقال حق القراءة على منتدى طلاب جامعة القاهرة.

اعتقد ان الاربع مواضيع دول بيغطو الموضوع بشكل كويس، اذا مكنتش تعرف ايه DRM و سلبياتها، لازم تعرف دلوقتي! الموضوع مهم فعلا، و أي موقف سلبي منك هرجع بالضرر عليك في النهاية!

المزيد »

آخر تدوينة قبل السبات!

السلام عليكم و رحمة الله و بركاته

اخر تدوينة قبل ما اشيل الكمبيوتر و اركز في المذاكرة : )

النتيجة ظهرت الاسبوع اللي فات، و للاسف كما توقعت، كانت سيئة جدا، يمكن اسوأ نتيجة من أول ما دخلت الكلية!

بعد ما خلصت الامتحانات كتبت:

اخيرا الامتحانات خلصت و عدى حوالي اسبوع من يوم ما خلصت ، كانت للاسف امتحانات مش كويسة ، مش عارف في ايه السنة دي ، الامتحانات كانت اصعب من كل سنة ! و مرضت تلات مرات في فترة الامتحانات !! مع اني غالبا بكون حريص بشكل اكبر في فترة الامتحانات اني اتجنب مسببات الامراض عشان الامتحانات ، لكن تلات مرات امرض في فترة الامتحانات دي غريبة فعلا !! ، الحمد لله على كل شيء طبعًا ، بس المشكلة ان الواحد بيزعل لما يكون مذاكر كويس لكن مجموعة من العوامل الخارجيه بتأثر في نتيجته

و فعلا كما توقعت! بصراحة انا متضايق جدا! لكن عموما الحمد لله، الحزن مش هيفيد بحاجة دلوقتي، هحاول أبذل افضل ما عندي التيرم ده، و ربنا ييسر : )

------

من فترة جربت محمل جديد معروف بـ BURG و المبني على GRUB2، برنامج بورج بيوفر الاختيار بين الانظمة بشكل رسومي جميل. البرنامج بيوفر مجموعة من السمات الجميلة، قمت بعمل لمسة عربية على سمة من السمات:


على اليمين، السمة قبل التعديل ، على الشمال السمة الجديدة اللي عملتها:



اضغط على الصورة للتكبير (و مش كل شوية هقول اضغط على الصورة! )


لتحميل السمة الجديدة و معلومات أكتر عنها: سمة عربية لمحمل الاقلاع BURG.
معلومات اكتر BURG : الاختيار بين انظمة التشغيل بشكل رسومي ، رائع !

------------------

من فترة استعملت البرنامج الرائع انكسكيب لتحبير رسومات كنت رسمتها بإيدي من فترة ^_^

في الرسمة دي مستعملتش الخط العادي، انما الخط السميك من المنتصف و رفيع من الاطراف.



بالمناسبة ده نفس البطريق اللي كنت رسمته بشكل كارتوني بالجيمب .

الرسمة التانية شخصية اخواتي الصغيرين بيحبوها، سلمى من موقع بنين و بنات (مع بعض التعديلات، لإنها مبقتش شبهها اساسا )




ده فيديو في اقل من دقيقة و نص بيوضح الطريقة اللي استعملها - الفيديو بصيغة ogg ، يعني ممكن تشغيله على فاير فوكس بشكل مباشر ; )

http://www.archive.org/download/inkscape_test/inkscape_test.ogv

بالمناسبة، الرسمة في الفيديو كانت لتوضيح فكرة معينة، رسمتها في دقيقتين على سطح غير مستوي (مخدة )


معلومات أكتر عن الانكسكيب الرائع


Inkscape
Inkscape للرسوميات المتجهة - وادي التقنية

--------

اخيرا، الحمد لله خلصنا البحث و سلمناه، عملنا فيه شغل كويس، و ربنا ييسر في النتيجة : )
حاليا دي صفحة العنوان و ملخص البحث، لاني مش عارف اذا مسموح نشر البحث قبل النتيجة ولا ﻷ!



---------



دعواتكم بقى، و ان شاء الله تكون امتحانات كويسة على الجميع : )

المزيد »

ملخص مهرجان البرمجيات الحرة في ساقية الصاوي.

السلام عليكم و رحمة الله و بركاته

مهرجان البرمجيات الحرة في ساقية الصاوي اللي كنت اشرت اليه اول امبارح، اليوم كان جميل جدا، استمعت بيه و اتعرفت فيه على ناس زي الفل ^_^

كان في حوالي تسع جلسات شغالين بالتوازي، الجلسات عبارة عن المحاضر و معاه مجموعة من الناس اللي حضرت، الجلسات كانت متنوعة بين تعريف بالبرمجيات الحرة و المفتوحة المصدر، ثقافة البرمجيات الحرة، طريقة تثبيت اوبنتو، لينوكس مقابل وندوز، البرمجة باستخدام مكتبات qt، البرمجة باستخدام لغة بايثون، تطبيق دروبال لادارة المحتوى، الأمن و الحماية، و بعض الجلسات التانية.

اليوم بدأ من ٩ الصبح، للساعة ٥ العصر، انا وصلت تقريبا الساعة ١٠,٣٠ ، يعني لحقت اليوم من أوله.

كنت متفق مع ناس اعرفهم من مجتمع لينوكس العربي اننا نتقابل، فعليا اغلبنا منعرفش بعض ولا شوفنا حتى صور لبعض، كل التعامل كان في العالم الافتراضي ، لكن قدرنا نتعرف على بعض و نتجمع بسهولة : )
الناس اللي من مجتمع لينوكس العربي مقابلتش غير واحد بس منهم على ارض الواقع، و هو عبد الرحمن غانم (مبرمج بلغة روبي و مكتبات كيوت)

و برده سلمت على بعض الناس و المحاضرين اللي كنت شوفتهم قبل كدا أو اعرفهم من على النت، و خصوصا ان منهم ناس كانوا جايين من اسكندرية، يعني سفر.

بعد ما شوفت مين جه و مين مجاش، قلت احضركام جلسة، مكنش عندي مشكلة اني اقوم بدور المبتدئ ، لان المهرجان اساسا موجه للمبتدئين و المستخدمين الجدد\المحتملين، فكنت بتفاعل و اسأل عن حاجات انا عارفها ، ده مش رخامة يعني، لانه من ناحية بحفز الناس انها تسأل و تتفاعل اكتر مع الشخص اللي بيشرح، و من ناحية تانية لو في اي نقطة حاسس انها هتكون مفيدة و المحاضر نسيها فيفتكرها، و بشكل عام بحب اشوف طريقة شرح و محاضرة الناس : )

حضرة جلسات ثقافة البرمجيات الحرة، البرمجة باستخدام بايثون، التصميم التجهي باستخدام انكسكيب.


في نهاية اليوم، عملوا فقرة عامة عن مفهوم البرمجيات الحرة و اهم الاسئلة اللي بتتسأل عنها، و كان في اتنين واحد منهم بيمثل البرمجيات المغلقة و غير الحرة و هو اللي بيسأل، و التاني بيمثل البرمجيات الحرة و المفتوحة المصدر و بيجاوب على الأسئلة، بعد ما خلصت الاسئلة الشائعة، سألوا الحضور اذا كان عندهم أي اسئلة، في ناس سألت و اتجاوب عليهم، و طبعا لازم تلاقي في النص كدا كام واحد دماغه ميكروسوفتيه صرفة، و برده اتجاوب عليه تمام
الفقرة كانت جميلة و فيها نوع من الفكاهة.


للاسف الناس معرفتش تعمل بث حي عشان الواي فاي كان خربان في المكان! فتعمل تسجيل بس تقريبا.





الواحد بيكون سعيد انه يشوف حاجة زي كدا و يشوف ناس بتبذل مجهود كبير عشان تنشر البرمجيات الحرة و المفتوحة المصدر، و بشكل عام اليوم كان كويس جدا و شخصيا استمتعت بيه : )


---------

طبعا في مناسبة زي دي لازم ناخد صورة جماعية، دي صورة جماعية للناس اللي حضرت من مجتمع لينوكس العربي:


ـ
اضغط على الصورة للتكبير

انا اللي بيشاور عليه السهم D:

المزيد »

مهرجان البرمجيات الحرة، ساقية الصاوي - بث مباشر.

السلام عليكم و رحمة الله و بركاته




كالعادة متأخر بس عرفت من شوية ان هيكون في بث مباشر لمهرجان البرمجيات الحرة في ساقية الصاوي (القاهرة)

رابط البث

http://www.bahaa.biz/live.html

الناس اللي مش هتعرف تيجي او اللي برا مصر ممكن تتابع من هنا، بس يا رب الموضوع يمش كويس و ميحصلش مشاكل في البث

المزيد »

تجربة خطّية سريعة D:

السلام عليكم و رحمة الله و بركاته

حاليا كنت بحضر بحث عشان في مسابقة بحوث على مستوى جامعة القاهرة، و قررت اشترك فيها، المسابقة جماعية، و بتالي عملنا مجموعة من تلات طلاب (انا واحد منهم) و مشرف أكاديمي (محاضر من الجامعة)، تقريبا خلصنا موضوع البحث، مش فاضل غير التنسيق، الطباعة و التغليف. موضوع البحث واحد من عشر مواضيع، احنا اختارنا الطاقة البديلة ^_^

كل ده ملهوش دعوة بالتدوينة دي، ادعولنا بس

-------

كنت بتسلى شوية و كتبت بعض الكلمات سريعا، يعني في اخطاء عارفها بس مش هصلحها أو اجرب اكتب تاني لان الموضوع على السريع، و كمان كنت بكتب على ورق خشن فحواف الحروف سيئة جدا، و أثر على الكتابة بشكل عام ! كنت حاسس اني بنحت في الصخر! التعديلات على الصور كان لازالة اثار الخلفية و فضلت عدم التعديل على الكلام نفسه او تنعيم الحواف، عموما زي ما قلت كل ده على السريع عشان كدا مش هعدل حاجة ولا أكتب حاجة تاني

القلم المستخدم، قلم خط عربي اللي بيتباع في المكتبات، بسن ٣ ملم.

------------

جربت تحويل صورتين لفيكتور عشان اظبط اطراف الكلمة، و النتيجة كانت كويسة جدا، حولتهم لرسم متجهي vector عن طريق الرائع "Inkscape" .

أحمد أبوزيد - انا يعني - ، على الشمال بعد التحويل لمتجهي.


اضغط على الصورة للتكبير.



مقولة مقتنع بيها جدا، برده، الصورة على الشمال بعد التحويل لمتجهي.



--------

بقية الكتابات :

|

محدش يعترض على العين، هي جت كدا بقى


----








و دي كنت كتبتها من فترة، بس الورق كان انعم شوية (و خفيف برده لدرجة ان الكلام الأسود ظاهر رصاصي هههههههه xD)






مجرد تجربة سريعة مفهاش اي نوع من الدقة، ان شاء الله المرة الجاية ابقى انزل حاجات تانية مكتوبة بتأني اكتر : )

المزيد »

دورة خط لمدة شهر في مدرسة تحسين الخطوط بالجيزة .

تدوينة بحالها اهه عشان بعد كدا محدش يقول مخدتش بالي ! (و عشان محركات البحث برده !)

في دورة مجانية (طلعت مش مجانية اوي يعني ! في ٦٠ جنيه رسوم ادارية) لمدة شهر شهر و نص في مدرسة تحسين الخطوط العربية بالجيزة ، هتبدأ من بكره ان شاء الله ، متأخر شوية بس افضل من مفيش .




مواعيد المدرسة ، مكانها ، اي معلومات تانية ، هتلاقوهم في الموضوع ده "تقرير سريع عن مدرسة تحسين الخطوط العربية بالجيزة"

: )


*** تحديث :
المطلوب ، صورة البطاقة ، صورة من آخر مؤهل ، صورتين (مقاس ٦×٨) + ٦٠ جنيه .

المزيد »