الخميس، 25 فبراير 2010

السما بتمطر تلج !

السما من شوية كانت بتمطر قطع تلج في القاهرة\الجيزة !

كور التلج صلبة بقطر 15.0 : 20.0 مليمتر تقريبا !

بالاضافة الى برق و رعد قوي جدا ، و مطر - لسه شغالين -


رائع ، الواحد بقاله كتير مشفش برق ولا سمع رعد ، و بقاله اكتر مشفش تلج زي كدا !







الدعاء اثناء المطر مستحب ، يا رب يا كريم ايموشن

الجمعة، 19 فبراير 2010

أسبوع من العسكرية .

السلام عليكم و رحمة الله و بركاته

كنت قولت في التدوينة اللي فاتت اني عندي ما يعرف بالتربية العسكرية ، و اللي غالبا بتكون مدتها اسبوعين .

ادي اول اسبوع خلص ، بصراحة انا استمتعت جدا بالاسبوع ده بالرغم من صرامة التعامل (طبيعي جدا تكون القوات المسلحة ليها طبيعة صارمة اكتر من اي حاجة تانية) ، في ناس تقعد تقول اسبوعين نقضيهم بالطول او البعرض ، المهم يخلصوا ، و بيطلعوا زي ما دخوا !! التجربة دي فعلا مفيدة جدا ، و اتعلمت فيها حاجات كتير مفيدة .
ده غير الناس اللي بتدفع رشوة او يكون عندهم واسطة عشان يتهربوا منها !!


كنت عاوز اكتب ملخص سريع عن الحاجات اللي اتعلمناها و بعض الحاجات التانية ، بس للاسف مشغول بغباء الفترة دي ، اليوم بيبدأ من الساعة ٦ الصبح ، و برجع البيت على حوالي الساعة ٢.٣٠ ! ، طبعا برجع تعبان جدا ، يا اما اعمل كام حاجة بسرعة ، يا ما ادخل اناااام .

يعني ربنا يسهل على الاسبوع الجاي ان شاء الله ، هكتب شوية حاجات : )

الأربعاء، 10 فبراير 2010

أسبوع من الأجازة : )


السلام عليكم و رحمة الله و بركاته

رجعنا تاني و الحمد لله : )

اولا بس عاوز الفت نظر الناس الى اني قريب جدا ان شاء الله هنتقل للعنوان الجديد "مدونة أحمد أبوزيد !" ، يا ريت اللي مهتم يضيف اللينك الجديد عنده لاني دي هتكون التدوينة قبل الاخيرة ان شاء الله : )
انتقلت فعلا و دي مدونتي الجديدة .

--------

اخيرا الامتحانات خلصت و عدى حوالي اسبوع من يوم ما خلصت ، كانت للاسف امتحانات مش كويسة ، مش عارف في ايه السنة دي ، الامتحانات كانت اصعب من كل سنة ! و مرضت تلات مرات في فترة الامتحانات !! مع اني غالبا بكون حريص بشكل اكبر في فترة الامتحانات اني اتجنب مسببات الامراض عشان الامتحانات ، لكن تلات مرات امرض في فترة الامتحانات دي غريبة فعلا !! ، الحمد لله على كل شيء طبعًا ، بس المشكلة ان الواحد بيزعل لما يكون مذاكر كويس لكن مجموعة من العوامل الخارجيه بتأثر في نتيجته ، بس كنت اتمنى اني احسن تقديري شوية و اجيب جيد جدا بدل ما انا متعلق في اواخر الجيد ، الحمد لله : )



خلينا في دلوقتي : )
اسبوع تقريبا عدى ، استريحت شوية ، و حضرت كتب كتاب اخت واحد من اعز و اقدم اصدقائي (تقريبا احنا مع بعض في كل حاجة من اولى ابتدائي) ، عقباله كدا ان شاء الله ^_^

و مع بداية الاسبوع الجاي ان شاء الله ، عليا ما يسمى بالعسكرية ، و هي ببساطة حوالي اسبوع الى اسبوعين بيتم فيها تعريف الطلاب بالنظام العسكري ، و دي الحاجات اللي المفروض هيكلمونا عنها (التعليم الأولي – التقاليد العسكرية – التدريب الطبيعي – التدريب الكيماوي – فن القتال – القيم السلوكية – تاريخ مصر العسكري الوطني – الأمن الحربي – الشئون الإدارية – فن القيادة – إدارة عسكرية) ده طبعا بعد طابور الجمع الصباحي و شوية حاجات كدا ، و اللي يحب يعرف اكتر عن النظام ده ممكن يشوف صفحة تعريفية من على موقع جامعة القاهرة (التربية العسكرية)

----

تقريبا خصلت تظبيط المدونة الجديدة و حسابي على جوجل ، و حولت كتير من حساباتي على الانترنت لـ "أحمد أبوزيد" ، مش فاضل غير اضافة سكربت يظهر لمستخدمي انترنت اكسبلور 6 و 7 ينبههم لتحديث متصفحهم (و كنت بفكراضيف 8 كمان بس قولت بلاش )

حاولت اختار تصميم بسيط و نضيف ، عملت التعديلات اللازمة عشان يناسب العربي و يناسبني : )

----

بدأت برده في تحضير موضوع عن "مدرسة تحسين الخطوط العربية بالجيزة" اللي كنت قولت عليه قبل الامتحانات ، الخط العربي من الاشياء العبقرية فعلا ! و للاسف يعتبر فن منسي ! ، ايوه مش مطلوب من كل شخص يكون خطاط ، انما لازم يكون عنده الحد الادنى من المعرفة بتراث امته ! مجرد المعرفة دي بتعزز الانتماء عند الشخص و تقوي ارتباطه بأصله ، لان بطبيعة الحال اذا كان المجتمع مش لاقي هويته هيدور على هوية تانية من ثقافات مختلفة سواء صينية او يابانية او اي ثقافة تانية قوية ، مش هتكلم عن الثقافات الغربية لانها بطبيعة الحال تأثيرها نابع من اسباب واقعية و من اتصال حقيقي ، ما علينا يعني ! (بالمناسبة انا من اكتر الناس اللي بتحترم و بتقدر الثقافة و التراث الياباني لانه فعلا رائع ، لكن ده مش معناه مثلا اني هحط الكاتانا الياباني عندي في البيت ولا هلبس كيمونو ! ، الافضل ليا البحث عن تراثي الحقيقي و اللي لا يقل روعة عن غيره لكنه محتاج نفض التراب عنه مش اكتر !)

بالرغم من الفترة الجاية هتكون ملخبطة شوية عشان اخر سنة ليا في الكلية ، و بعد كدا هشوف مواضيع الجيش و الحاجات دي ، لكن هحاول اتعلم نوع من انواع الخط ، و ان شاء الله هحاول اتابع مع مجموعة عرب آيز عشان على حد علمي بيحضروا لعمل خط الكتروني جديد مناسب للعرض على الشاشات : )

----

ناوي باذن الله تحديث كتاب "الدليل العملي في استخدام أوبنتو" ، عشان يكون متناسب مع الاصدار الجديد من ubuntu 10.04 و اللي هي نسخة طويلة الدعم (النسخة للاجهزة المنزلية مدعومة لمدة تلات سنين و نسخة الخوادم لمدة خمس سنين) ، و هحاول احضر للكتاب بشكل كويس ، عشان ميحصلش زي النسخة الاولى ، لان للاسف معملتش غير حوالي ٩٠٪ من الحاجات اللي كنت مخططلها ، و اضطريت الغي بعض التفاصيل (بالنسبة ليا ، التفاصيل الصغيرة دي هي اللي بتعمل فرق فعلا !) ، و بفكر اوفر نسخة مخصصة للطباعة على موقع lulu (موقع لولو بيوفر خدمة الطباعة عند الطلب و معروف برده بالنشر الحر) عشان لو حد مهتم انه يحط نسخه من الكتاب في مكتبة عامة مثلا او يهديه لواحد من اصحابه .

عموما ربنا يسهل ، هبدأ التخطيط للاصدار ده بشكل كويس بحيث الكتاب يكون جاهز مع صدور اوبنتو 10.04 (في اخر شهر اربعة يعني)

-----

امممممممم ، ايه تاني ، اخيرا من فترة تم الاعلان على مدونة موقع Creative Commons انه حاليا بيتم التحضير لترجمة و نقل الرخص للقانون المصري ، للاسف مفيش ولا دولة عربية تم نقل الرخص لقانونها غير الاردن و دلوقتي مصر لحقتها ، و الاتنين ما زالوا في مرحلة النقل يعني مش مكتملين !

كتبت عن الموضوع على مدونة وادي التقنية ، تلاقوا الموضوع هنا التحضير لنقل رخص Creative Commons للقانون المصري .
اعتقد اني هحاول اتابع معاهم ممكن اقدم اي مساعدة ، و اي شخص عاوز يساعد ممكن يشارك ، سواء الناس المهتمة بالقانون او اللغويين او حتى الاشخاص العاديين ، هتلاقوا معلومات اكتر عن الموضوع في الرابط اللي فات : )

-----

ما زلت مشوش شوية و محبط نوعًا ما بسبب الامتحانات ، ، لكن عادي يعني ، الموضوع موضوع وقت و كل حاجة هتكون تمام : )

السبت، 2 يناير 2010

أول تدوينة في السنة الجديدة : )


السلام عليكم و رحمة الله و بركاته

بما ان معايا لابتوب واحد صاحبي ، قولت اكتب تدوينة على السريع كدا : )

----

أستقبلت أول يوم في السنة الجديدة بمغص معوي شديد ، من حوالي الساعة خمسة فجر أول يوم لحد يا دوب لسه حاسس بتحسن من كام ساعة بس .
مع اني مش فاكر اني كلت اي حاجة غريبة ، بس الواضح انه كان في ميكروب في حاجة كلتها أو اني اخدت برد ! (مش وقته خالص اساسا !) طبعا في الحالات اللي زي دي مفيش احسن من الينسون ، الشمر ، كراوية و النعناع : )


من ناحية تانية ، فاضل حوالي اسبوعين على الامتحانات ، المواد التيرم ده حلوة بس مش قادر اركز بشكل كويس : (
حاسس اني مش مجمع كويس !! هحاول اركز مجهودي في الاسبوع ده عشان اراجع على الحاجات اللي لسه مخلصتهاش : )
دعواتكم بقى : )


من كام ساعة اكتشفت ان في شبكة وايرلس قوية واصلة في الغرفة اللي بذاكر فيها ، و بيستخدم تشفير wpa ، اعتقد ان دلوقتي فك الشتفير ده بقى سهل ، بالكتير ربع ساعة و يكون خلصان ، اخلص بس الامتحانات و العب شوية مع الشبكة دي (هجرب بس كسر التشفير مش هعمل حاجة )



اخيرا ، اعتقد اني سأكون "أحمد أبوزيد"على الانترنت و مش هيكون في "Skeleton_Eel" تاني ، هكون على الانترنت بهويتي الحقيقية بدل الاسم المستعار اللي كنت عايش بيه لمدة اربع سنين تقريبا على الانترنت .
انا خلاص تقريبا اتخذت قراري ، و ده لعدد من الاسباب ممكن ابقى اعمل موضوع عنها لما اخلص الامتحانات ان شاء الله ، و بدأت خطوات الانتقال ، اسم الايميل هيتغير و كمان رابط المدونة (و طبعا واجهت اول مشكلة من المشاكل اللي عشانها كنت اختارت استعمال اسم مستعار جديد و فريد ، و هي مشكلة ان الاسم ممكن يكون حد مستخدمه في المنتديات و المواقع زي بريد gmail) .

بالاضافة اني قررت عمل بعض التغييرات في كذا حاجة تانية مهمة .


عموما ، الموضوع هيخلص ان شاء الله بعد الامتحانات : )



--------


دعواتكم بقى عشان الامتحانات دي شكلها مش مبشر خالص :s
و يا رب تكون السنة الجديدة دي سنة جميلة علي كل الناس و يتحقق فيها كل اللي بيحلموا بيه : )

الاثنين، 14 ديسمبر 2009

التحضير للمذاكرة .


السلام عليكم و رحمة الله و بركاته

اخيرا جدول الامتحانات نزل بتأخير كبير عن ميعاد نزوله في كل سنة ، و بداية الامتحانات هتكون ان شاء الله يوم 16\1\2010 ! (في الحقيقية ناس كتير كانت متوقعة التاريخ ده عشان احنا بنبدأ مع كلية التجارة ، و امتحانات تجارة هتبدأ يوم 15 تقريبا)
طبعا انا بدأت المذاكرة من فترة لكن دي تدوينة في السريع كدا : )


كل فترة قبل الامتحانات لازم يكون في تحضيرات لتكثيف المذاكرة
من اهم التحضيرات الاساسية للامتحانات تلات حاجات :

١. الكمبيوتر يتشال عشان اقدر اذاكر و اركز بشكل افضل .
٢. احلق شعري ! ده برده متعلق بالتركيز .
٣. اعمل جولة تسوق عند العطار ههههههه .


الكمبيوتر لازم يتشال عشان احظى بشوية صفاء ذهني و تركيز اكبر في المذاكرة ، الكمبيوتر كدا متشال بقاله اسبوعين و شوية ، لكن التدوينة دي من على جهازي في البيت لاني بظبط شوية حاجات في النت ، التلفون كان مقطوع اكتر من تلات اسابيع و بالرغم من التبيلغ عن المشكلة اكتر من مرة ، السنترال مبعتش فني غير لما كتبت شكوى لمدير السنترال !! (مع ان العطل كان عبيط جدا و مش محتاج كل التأخير ده ، مجرد الفني يجي يظبط الخط من الكابينة الرئيسية مش اكتر !)

لازم احلق شعري عشان اعرف اذاكر ، مش عارف ليه لازم احلق لكن بحس براحة نفسية ، يبقى ليه ﻷ
و بما اني في الفترة دي بستهلك كمية كبيرة من المشروبات و لاني مش من مدمني الشاي و عشان مخلصش التوابل اللي في البيت كلها فلازم اعدي على العطاراشتري حاجات زي قرفة ، قرنفل ، ينسون ، شمر ، كركديه ، نعناع ، الخ الخ الخ

بحاول استغل الفترة دي في عمل حاجات تانية لاني بالتأكيد مش هقعد اذاكر ٢٤ ساعة في اليوم ! - ده فضلا عن اني لو قعد اذاكر بس هتخنق من المذاكرة ! -

بحاول احفظ قرآن ، او في الحقيقة براجع على الحاجات اللي كنت حافظها ، للاسف بقالي فترة كبيرة جدا مش بحاول احفظ حاجة !

و من ناحية تانية ، بحاول اعمل بنصيحة الاستاذ طه الوكيل مدرس الخط اللي قدم دورة تنمية مهارات الخط العربي في جامعة القاهرة ، و نصيحة الاستاذ طه هي عمل تدريب على الخط لمدة خمس دقايق يوم بعد يوم (تلات مرات في الاسبوع يعني) ، و فعلا نصيحة ممتازة جدا جزاه الله خير عنها ، لان خير الاعمال ادومها و ان قل ، مجرد خمس او عشر دقايق كل يومين اكتب تدريب خط ، هتلاقي نفسك مع الوقت بتتقن الخط و بتكون اسرع في الكتابة : )

بجد الدورة دي استفدت منها كتير جدا و عرفتني على مجال الخط العربي الرائع ، انا الحمد لله خطي كويس لكن لما عرفت قواعد كتابة الحروف خطي انتقل لمستوى تاني خالص ، و كمان عرفت بعض الاخطاء زي خطأ شائع جدا (و انا شخصيا كان مضحوك عليا لمدة ١٥ سنة ) كانوا ديما في المدرسة بيقولولنا ان الكاف اللي في الاخر عليها همزة ! الواقع ان اللى على الكاف المفردة او في نهاية الكلمة => "ك" ده مش همزة ! شارة الكاف دي مش همزة فعلا ! افتح اي مصحف و قارن بين شارة الكاف و الهمزة ، دي شيء و دي شيء تاني خالص !
و برده حاجة كمان ، في التنوين بالفتح ، الفتحتين مش بتكون على حرف الالف الزائد انما بتكون على الحرف الاخير الحقيقي زيه زي التنوين بالضم و التنوين بالكسر ! برده افتح المصحف و شوف

و من يومين عديت على مدرسة تحسين الخطوط العربية بالجيزة و مقرها مدرسة السعيدية الثانوية اخدت من هناك شوية معلومات و بيانات عن المدرسة و الدارسة فيها و المعارض اللي بتتعمل كل آخر سنة دراسية و الاساتذة هناك ناس محترمة جدا ما شاء الله ، و ربنا يسهل بعد الامتحانات كدا هيكون جاهز تقرير مدعم بالصور و الفيديوهات عن مدرسة تحسين الخطوط لاني اعتقد ان خسارة جدا مدرسة عريقة زي دي مش واخدها حقها بالمستوى الكافي اعلاميا و خصوصا على الانترنت !


--------

يا رب سنة رابعة تخلص على خير ، و ربنا ييسر للجميع في الامتحانات ، دعواتكم : )

الخميس، 3 ديسمبر 2009

حملة خطايا وندوز 7 .



السلام عليكم و رحمة الله و بركاته



من فترة قريبة تم ترجمة موقع خطايا وندوز سبعة للعربية ، او زي ما بحب اسمي الحملة خطايا وندوز سبعة السبعة
الحملة برعاية مؤسسة البرمجيات الحرة (Free Software Foundation)
ـ
Windows7Sins.org

الخطايا السبعة زي ما في موقع الحملة :

١. تسميم التعليم .
٢. خرق الخصوصية .
٣. التصرف باحتكارية .
٤. الحبس .
٥. استغلال المعايير .
٦. فرض إدارة القيود الرقمية (DRM) .
٧. تهديد أمن المستخدم .

لو عاوز تعرف اكتر عن كل نقطة ادخل موقع الحملة هتلاقي تفصيل عن كل نقطة ، و في الموقع من فوق هتلاقي حاجة زي تلميحات كدا ، اضغط عليها و هتلاقي معلومات مفيدة عن كل مشكلة .


اضغط على الصورة للتكبير

Windows7Sins.org

و ممكن تضيف شعار الحملة لمدونتك زي كدا



أضف ودجة خطايا ويندوز 7 إلى موقعك!

-------

كنت كتبت موضوع عن خطايا وندوز سبعة و علقت عليه و اشرت لبعض النقاط و الامثلة الواقعية لتسميم التعليم و استغلال المعايير و ادارة القيود الرقمية DRM

حملة خطايا ويندوز 7 - منتدى طلاب جامعة القاهرة .
حملة خطايا ويندوز 7 - منتدى طلاب جامعة عين شمس .


و للمرة الـ ١٢٠ ! للناس اللي حافظة مش فاهمة و محبي الفزلكة ، دي في الاساس حملة اخلاقية بتنتقد افعال معينة و مش غرضها الاساسي الكلام عن اي حاجة تقنية !! و غرضها توعية المستخدمين بأضرار البرمجيات المقيدة و الاحتكارية و على رأسها شركة ميكروسوفت و برامجها .

 زيها زي المنظمات و الجمعيات البيئية ، لما يكون في جمعية نشاطها هو الحفاظ على البيئة و توعية الناس بمخاطر التلوث و اللي بيكون سببه المصانع و الشركات الكبيرة ، و لما جمعيات البيئة بتنتقد المصانع دي مش بتنتقدها في حد ذاتها انما بتنتقد التلوث اللي بتعمله و بيأثر على البيئة ، و مش منطقي نقول اصل الشركات دي بتشغل ناس كتير و الناس دي فاتحين بيوت و الكلام ده ! لان ببساطة اذا البيئة بتاعتنا اتدمرت (مثلا بسبب ارتفاع درجة حرارة الارض او تخريب طبقة الاوزون) البشر كلهم هيكونوا معرضين للاخطار !!
و السيء في الموضوع ان الشركات دي ممكن تقلل من التلوث بتاعها اذا اتبعت الطرقة الصحيحة في التخلص من مخلفاتها لكن ده هيكلفها شوية فلوس و عشان كدا مش بتعمله !! يعني الجمعيات دي مش بتقول اتوقفوا عن الصناعة انما بتقول انتجوا و لكن بأقل خسائر ، مش حاجة مستحيلة يعني !

و زيها زي مؤسسة مختصة بالصحة ، و وجهت انتقادات لمنتج معين و قالت ده فيه عيوب كذا و كذا و ممكن يجيب امراض كذا و كذا ، المؤسسة ملهاش اي مصلحة خاصة في شراء او بيع المنتج ، يهمها حاجة واحدة بسيطة صحة المستهلكين !

برده مؤسسة البرمجيات الحرة يهمها حاجة واحدة بس و هي حرية المستخدمين على المستوى الرقمي !


ربنا يبعد عننا الناس اللي حافظة مش فاهمة و محبي الفزلكة و الدمغة المقفلة

الأربعاء، 2 ديسمبر 2009

مقابلة لينوكساوية سريعة .

السلام عليكم و رحمة الله و بركاته

من وقت للتاني بحاول اكسر حدود العالم الافتراضي اللي عايشين فيه و اللي اتعرفت من خلاله على عدد كبير من الناس ، و عشان كدا بحاول اقابل بعض الناس اللي اتعرفت عليها من النت اذا جت فرصة مناسبة .

تالت يوم العيد ، قابلت كريم و عبد الرحمن ، عملنا اتجمعنا ناحية الجامعة كدا ، و طبعاً كانت قعدة لطيفة جداً ^_^

كريم كنت قابلته قبل كدا ، من الناس اللطيفة اللي اتعرفت عليه ^_^
عبد الرحمن كانت اول مرة اشوفه ، و هو برده ما شاء الله عليه ، من الناس اللي الوحد يفرح بمعرفتهم ^_^

و الاتنين ليهم اهتمام ب روبي (دي لغة برمجية مش حاجة تانية ! ) و هي لغة ممتازة جدا و سهلة و منافس قوي لبايثون (انا بقى بتاع بايثون )

اتكلمنا في حاجات كتير ، طبعا منها لينوكس و البرمجيات الحرة و شوية حاجات عن البرمجة و حاجات تانية كتير .

 كان لقاء لذيذ جدا ، و ان شاء الله يتكرر تاني ^_^