تجربة خطّية سريعة D:

السلام عليكم و رحمة الله و بركاته

حاليا كنت بحضر بحث عشان في مسابقة بحوث على مستوى جامعة القاهرة، و قررت اشترك فيها، المسابقة جماعية، و بتالي عملنا مجموعة من تلات طلاب (انا واحد منهم) و مشرف أكاديمي (محاضر من الجامعة)، تقريبا خلصنا موضوع البحث، مش فاضل غير التنسيق، الطباعة و التغليف. موضوع البحث واحد من عشر مواضيع، احنا اختارنا الطاقة البديلة ^_^

كل ده ملهوش دعوة بالتدوينة دي، ادعولنا بس

-------

كنت بتسلى شوية و كتبت بعض الكلمات سريعا، يعني في اخطاء عارفها بس مش هصلحها أو اجرب اكتب تاني لان الموضوع على السريع، و كمان كنت بكتب على ورق خشن فحواف الحروف سيئة جدا، و أثر على الكتابة بشكل عام ! كنت حاسس اني بنحت في الصخر! التعديلات على الصور كان لازالة اثار الخلفية و فضلت عدم التعديل على الكلام نفسه او تنعيم الحواف، عموما زي ما قلت كل ده على السريع عشان كدا مش هعدل حاجة ولا أكتب حاجة تاني

القلم المستخدم، قلم خط عربي اللي بيتباع في المكتبات، بسن ٣ ملم.

------------

جربت تحويل صورتين لفيكتور عشان اظبط اطراف الكلمة، و النتيجة كانت كويسة جدا، حولتهم لرسم متجهي vector عن طريق الرائع "Inkscape" .

أحمد أبوزيد - انا يعني - ، على الشمال بعد التحويل لمتجهي.


اضغط على الصورة للتكبير.



مقولة مقتنع بيها جدا، برده، الصورة على الشمال بعد التحويل لمتجهي.



--------

بقية الكتابات :

|

محدش يعترض على العين، هي جت كدا بقى


----








و دي كنت كتبتها من فترة، بس الورق كان انعم شوية (و خفيف برده لدرجة ان الكلام الأسود ظاهر رصاصي هههههههه xD)






مجرد تجربة سريعة مفهاش اي نوع من الدقة، ان شاء الله المرة الجاية ابقى انزل حاجات تانية مكتوبة بتأني اكتر : )

المزيد »

دورة خط لمدة شهر في مدرسة تحسين الخطوط بالجيزة .

تدوينة بحالها اهه عشان بعد كدا محدش يقول مخدتش بالي ! (و عشان محركات البحث برده !)

في دورة مجانية (طلعت مش مجانية اوي يعني ! في ٦٠ جنيه رسوم ادارية) لمدة شهر شهر و نص في مدرسة تحسين الخطوط العربية بالجيزة ، هتبدأ من بكره ان شاء الله ، متأخر شوية بس افضل من مفيش .




مواعيد المدرسة ، مكانها ، اي معلومات تانية ، هتلاقوهم في الموضوع ده "تقرير سريع عن مدرسة تحسين الخطوط العربية بالجيزة"

: )


*** تحديث :
المطلوب ، صورة البطاقة ، صورة من آخر مؤهل ، صورتين (مقاس ٦×٨) + ٦٠ جنيه .

المزيد »

الخميس الرائع .

السلام عليكم و رحمة الله و بركاته

في ايام بتكون رائعة ، الواحد يخرج من بيتهم الصبح عشان يعمل خمس او ست مشاوير ، يلاقي الموضوع ماشي تمام ، و كل موضوع بيتم بنجاح و مش بس كدا انما كمان بيحصل معاه مواقف بترفع روحه المعنوية و ثقته بنفسه .

يوم الخميس اللي فات كان كدا ، و في اخر اليوم روحت زورت واحد بعزه جدا متزوج حديثا ، ربنا يكرمه و يباركله .





انا مش طماع ، مش عاوز كل الايام تكون زي كدا ، بس اتمنى ايام زي دي تيجي من وقت للتاني كدا : )

المزيد »

تقرير سريع عن مدرسة تحسين الخطوط العربية بالجيزة .

السلام عليكم ورحمة الله وبركاته

قبل الامتحانات قولت اني روحت "مدرسة تحسين الخطوط العربية بالجيزة"، واخدت شوية بيانات من هناك عشان اعمل موضوع سريع للتعريف بالمدرسة.

التقرير اكتمل ونشرته على النت، فيه معلومات عامة عن المدرسة، وطريق الوصول ليها، ولوحات من المعرض الاخير اللي تم اقامته في ٢٠٠٩ (لوحات للدارسين في المدرسة)

ودي كانت مقدمة صغيرة للموضوع :

هذا موضوع سريع عن مدرسة تحسين الخطوط العربية بالجيزة، والتي تساهم في الحفاظ على التراث الخطي والذي يعد فن قائم بذاته وجزء لا يتجزأ من تاريخ الأمة العربية والإسلامية، وللأسف الشديد يعاني الخط العربي (واللغة العربية بشكل عام) من تدهور بين مستخدميه، فإذا وجدنا تطبع الأجيال الجديدة بهويات وثقافات أخرى، فهذا في المقام الأول لا يرجع إلى العولمة والانفتاح الحاصل حاليًا، لأن العديد من الدول استطاعت الحفاظ وتقوية هويتها وثقافتها بين أبناءها، بل وامتدت هذه التقوية لتأثر على دول أخرى حتى لو لم ترتبط معها بعلاقات وثيقة! وهذا واضح في ثقافة دول جنوب شرق آسيا. الأحرى بنا دعم وتدعيم هويتنا وثقافتنا العربية، ونفض الغبار عنها، والتي لا تقل في روعتها عن أي ثقافة أخرى!

وقد ورد العديد من الأقوال المأثورة فيما يخص الخط العربي، فقد قال العرب قديمًا: "الخط لسان اليد"، وروي عن سيدنا على –كرم الله وجهه– أنه قال: "الخط الحسن يزيد الحق وضوحًا"، ويقول الخليفة المأمون في الخط العربي: "لو فاخرتنا الملوك الأعاجم بأمثالها لفاخرناها بما لنا من أنواع الخط.. يقرأ في كل مكان، ويترجم بكل لسان، ويوجد في كل زمان"، بالإضافة إلى العديد من الأقوال الأخرى التي تصف روعة الخط العربي وبهائه.

من ناحية أخرى ليس المطلوب أن يكون كل شخص خبير في اللغة والخط العربي، إنما فقط يجب أن يكون لديه القواعد الأساسية، بحيث لا تكون مجرد نصوص في الكتب لا يتعامل بها أحد! والتي تساعد بشكل مباشر في تقوية الهوية والثقافة العربية. كل ما عليك أن تتعرف أكثر على الخط العربي الرائع وأضمن لك أنك ستقع في عشقه سريعًا، فهو يجسد عبقرية أمة من أعظم الأمم التي ظهرت على الأرض.

-----------

التقرير متوفر في شكل PDF، وموجود برده على المنتديات:

تقرير سريع عن مدرسة تحسين الخطوط العربية بالجيزة PDF
تقرير سريع عن مدرسة تحسين الخطوط العربية بالجيزة - منتدى طلاب جامعة القاهرة

وفي كتاب إلكتروني جميل اسمه "رحلة الخط العربي" لأحمد شوحان، بيتكلم عن مراحل تطور الخط العربي، اعتقد انه كتاب مفيد.


أي أسئلة أو ملاحظات مرحب بيها طبعا : )

المزيد »

السما بتمطر تلج !

السما من شوية كانت بتمطر قطع تلج في القاهرة\الجيزة !

كور التلج صلبة بقطر 15.0 : 20.0 مليمتر تقريبا !

بالاضافة الى برق و رعد قوي جدا ، و مطر - لسه شغالين -


رائع ، الواحد بقاله كتير مشفش برق ولا سمع رعد ، و بقاله اكتر مشفش تلج زي كدا !







الدعاء اثناء المطر مستحب ، يا رب يا كريم

المزيد »

أسبوع من العسكرية .

السلام عليكم و رحمة الله و بركاته

كنت قولت في التدوينة اللي فاتت اني عندي ما يعرف بالتربية العسكرية ، و اللي غالبا بتكون مدتها اسبوعين .

ادي اول اسبوع خلص ، بصراحة انا استمتعت جدا بالاسبوع ده بالرغم من صرامة التعامل (طبيعي جدا تكون القوات المسلحة ليها طبيعة صارمة اكتر من اي حاجة تانية) ، في ناس تقعد تقول اسبوعين نقضيهم بالطول او البعرض ، المهم يخلصوا ، و بيطلعوا زي ما دخوا !! التجربة دي فعلا مفيدة جدا ، و اتعلمت فيها حاجات كتير مفيدة .
ده غير الناس اللي بتدفع رشوة او يكون عندهم واسطة عشان يتهربوا منها !!


كنت عاوز اكتب ملخص سريع عن الحاجات اللي اتعلمناها و بعض الحاجات التانية ، بس للاسف مشغول بغباء الفترة دي ، اليوم بيبدأ من الساعة ٦ الصبح ، و برجع البيت على حوالي الساعة ٢.٣٠ ! ، طبعا برجع تعبان جدا ، يا اما اعمل كام حاجة بسرعة ، يا ما ادخل اناااام .

يعني ربنا يسهل على الاسبوع الجاي ان شاء الله ، هكتب شوية حاجات : )

المزيد »

أسبوع من الأجازة : )

السلام عليكم و رحمة الله و بركاته

رجعنا تاني و الحمد لله : )

اولا بس عاوز الفت نظر الناس الى اني قريب جدا ان شاء الله هنتقل للعنوان الجديد "مدونة أحمد أبوزيد !" ، يا ريت اللي مهتم يضيف اللينك الجديد عنده لاني دي هتكون التدوينة قبل الاخيرة ان شاء الله : )
انتقلت فعلا و دي مدونتي الجديدة .

--------

اخيرا الامتحانات خلصت و عدى حوالي اسبوع من يوم ما خلصت ، كانت للاسف امتحانات مش كويسة ، مش عارف في ايه السنة دي ، الامتحانات كانت اصعب من كل سنة ! و مرضت تلات مرات في فترة الامتحانات !! مع اني غالبا بكون حريص بشكل اكبر في فترة الامتحانات اني اتجنب مسببات الامراض عشان الامتحانات ، لكن تلات مرات امرض في فترة الامتحانات دي غريبة فعلا !! ، الحمد لله على كل شيء طبعًا ، بس المشكلة ان الواحد بيزعل لما يكون مذاكر كويس لكن مجموعة من العوامل الخارجيه بتأثر في نتيجته ، بس كنت اتمنى اني احسن تقديري شوية و اجيب جيد جدا بدل ما انا متعلق في اواخر الجيد ، الحمد لله : )



خلينا في دلوقتي : )
اسبوع تقريبا عدى ، استريحت شوية ، و حضرت كتب كتاب اخت واحد من اعز و اقدم اصدقائي (تقريبا احنا مع بعض في كل حاجة من اولى ابتدائي) ، عقباله كدا ان شاء الله ^_^

و مع بداية الاسبوع الجاي ان شاء الله ، عليا ما يسمى بالعسكرية ، و هي ببساطة حوالي اسبوع الى اسبوعين بيتم فيها تعريف الطلاب بالنظام العسكري ، و دي الحاجات اللي المفروض هيكلمونا عنها (التعليم الأولي – التقاليد العسكرية – التدريب الطبيعي – التدريب الكيماوي – فن القتال – القيم السلوكية – تاريخ مصر العسكري الوطني – الأمن الحربي – الشئون الإدارية – فن القيادة – إدارة عسكرية) ده طبعا بعد طابور الجمع الصباحي و شوية حاجات كدا ، و اللي يحب يعرف اكتر عن النظام ده ممكن يشوف صفحة تعريفية من على موقع جامعة القاهرة (التربية العسكرية)

----

تقريبا خصلت تظبيط المدونة الجديدة و حسابي على جوجل ، و حولت كتير من حساباتي على الانترنت لـ "أحمد أبوزيد" ، مش فاضل غير اضافة سكربت يظهر لمستخدمي انترنت اكسبلور 6 و 7 ينبههم لتحديث متصفحهم (و كنت بفكراضيف 8 كمان بس قولت بلاش )

حاولت اختار تصميم بسيط و نضيف ، عملت التعديلات اللازمة عشان يناسب العربي و يناسبني : )

----

بدأت برده في تحضير موضوع عن "مدرسة تحسين الخطوط العربية بالجيزة" اللي كنت قولت عليه قبل الامتحانات ، الخط العربي من الاشياء العبقرية فعلا ! و للاسف يعتبر فن منسي ! ، ايوه مش مطلوب من كل شخص يكون خطاط ، انما لازم يكون عنده الحد الادنى من المعرفة بتراث امته ! مجرد المعرفة دي بتعزز الانتماء عند الشخص و تقوي ارتباطه بأصله ، لان بطبيعة الحال اذا كان المجتمع مش لاقي هويته هيدور على هوية تانية من ثقافات مختلفة سواء صينية او يابانية او اي ثقافة تانية قوية ، مش هتكلم عن الثقافات الغربية لانها بطبيعة الحال تأثيرها نابع من اسباب واقعية و من اتصال حقيقي ، ما علينا يعني ! (بالمناسبة انا من اكتر الناس اللي بتحترم و بتقدر الثقافة و التراث الياباني لانه فعلا رائع ، لكن ده مش معناه مثلا اني هحط الكاتانا الياباني عندي في البيت ولا هلبس كيمونو ! ، الافضل ليا البحث عن تراثي الحقيقي و اللي لا يقل روعة عن غيره لكنه محتاج نفض التراب عنه مش اكتر !)

بالرغم من الفترة الجاية هتكون ملخبطة شوية عشان اخر سنة ليا في الكلية ، و بعد كدا هشوف مواضيع الجيش و الحاجات دي ، لكن هحاول اتعلم نوع من انواع الخط ، و ان شاء الله هحاول اتابع مع مجموعة عرب آيز عشان على حد علمي بيحضروا لعمل خط الكتروني جديد مناسب للعرض على الشاشات : )

----

ناوي باذن الله تحديث كتاب "الدليل العملي في استخدام أوبنتو" ، عشان يكون متناسب مع الاصدار الجديد من ubuntu 10.04 و اللي هي نسخة طويلة الدعم (النسخة للاجهزة المنزلية مدعومة لمدة تلات سنين و نسخة الخوادم لمدة خمس سنين) ، و هحاول احضر للكتاب بشكل كويس ، عشان ميحصلش زي النسخة الاولى ، لان للاسف معملتش غير حوالي ٩٠٪ من الحاجات اللي كنت مخططلها ، و اضطريت الغي بعض التفاصيل (بالنسبة ليا ، التفاصيل الصغيرة دي هي اللي بتعمل فرق فعلا !) ، و بفكر اوفر نسخة مخصصة للطباعة على موقع lulu (موقع لولو بيوفر خدمة الطباعة عند الطلب و معروف برده بالنشر الحر) عشان لو حد مهتم انه يحط نسخه من الكتاب في مكتبة عامة مثلا او يهديه لواحد من اصحابه .

عموما ربنا يسهل ، هبدأ التخطيط للاصدار ده بشكل كويس بحيث الكتاب يكون جاهز مع صدور اوبنتو 10.04 (في اخر شهر اربعة يعني)

-----

امممممممم ، ايه تاني ، اخيرا من فترة تم الاعلان على مدونة موقع Creative Commons انه حاليا بيتم التحضير لترجمة و نقل الرخص للقانون المصري ، للاسف مفيش ولا دولة عربية تم نقل الرخص لقانونها غير الاردن و دلوقتي مصر لحقتها ، و الاتنين ما زالوا في مرحلة النقل يعني مش مكتملين !

كتبت عن الموضوع على مدونة وادي التقنية ، تلاقوا الموضوع هنا التحضير لنقل رخص Creative Commons للقانون المصري .
اعتقد اني هحاول اتابع معاهم ممكن اقدم اي مساعدة ، و اي شخص عاوز يساعد ممكن يشارك ، سواء الناس المهتمة بالقانون او اللغويين او حتى الاشخاص العاديين ، هتلاقوا معلومات اكتر عن الموضوع في الرابط اللي فات : )

-----

ما زلت مشوش شوية و محبط نوعًا ما بسبب الامتحانات ، ، لكن عادي يعني ، الموضوع موضوع وقت و كل حاجة هتكون تمام : )

المزيد »